Nanchi Mubena Kwingijisha Buloshuwa wa Nanchi Lesa Ukebaka Kutatula Mafunjisho Nyi?
1 Abya mwayuka’mba umvwe kimye kyonse mwisamba misambo yamu Baibolo, kikale ipitu namuntu ubena kukeba kufunda bukine nekwisamba pakibaba kimo mubuku uji yense yetwingijisha kufunjishamo bantu, mubena kufunjisha lufunjisho lwa Baibolo nyi? Ee, luno kelufunjisho lwa Baibolo kikale lubena kubiwa panzubo nangwa palamya. Nanchi kuba mwibikishako kuba’mba mu May ne June mukekaleko nalufunjisho lwayewo mutundu mubuloshuwa wa Nanchi Lesa Ukebaka nenyi?
2 Nengezhai Kuba’mba Mukatendeke Lufunjisho: Kimye kyomubena kutambika buloshuwa wa Nanchi Lesa Ukebaka, yukai mwisambo yemukeba kwisambapo. Umvwe mubena kubwelako, vulukai mwisambo yemwisambilepo kimye kitanshi kyomwayileko. Ishikishai’mba: ‘Ñanyi mapalagalafu aji mubuloshuwa akonsha kumukebula kuba’mba nkanungulule mwisambo nekutendeka lufunjisho lwa Baibolo? Umvwe mubena kuya kunzubo nenzubo, langulukai pamitwe yakonsha kukebula wakyanyike, wakikulumpe, wamulume nangwa wamukazhi. Pitulukai mumitwe ikatampe iji mubuloshuwa nekusalapo umo wakonsha kukebula yewo muntu. Panyuma yakusala jishinda jomusakwambilamo kino, pitulukaimo bimye byavula kuba’mba mwibijile. Jino jojishinda jimo jawama kutendekelamo lufunjisho.
3 Kyamukachi mu Mwingilo Wetu wa Bufumu, wa January 2002, muji mashinda 8 a “Byakwamba Pakutambika Buloshuwa wa Nanchi Lesa Ukebaka.” Kabokoshi ka “Ñambilo Yakubula Kuzhobakana” kalumbulula byakwingijisha buloshuwa pakutatula mafunjisho. Mwakonsha kwiibijisha kwamba ñambilo itanshi bino’mba:
◼ “Nanchi mwayuka’mba mukakimyetu kacheche mwakonsha kutana mukumbu wajipuzho janema jamu Baibolo nyi? Kyakumwenako, mamboka bupopweshi bwitela’mba twibena Kilishitu kyobwavujilamo? Abya neanweba mwakilangulukapo kala pabyobyonyi?” Panyuma yakuba wakumbulapo, zhikulai palufunjisho 13 nekwisamba nanji mapalagalafu abiji atanshi. Umvwe saka mukiji nakimye, tangai nekwisambapo kinembelo kimo nangwa bibiji. Kabiji tangai jipuzho japelako jiji peulu yapeja, nekwamba’mba: “Lufunjisho lwashala lwaamba pabiyukilo 5, byakuyukilako bupopweshi bwakine. Nakonsha kutemwa kubwelako nekwisamba nenu bino biyukilo.”
4 Ikalai Namukoyo: Shukilai kimye kyonse kyomwakonsha kwikala nakyo kumwesha byakutatula lufunjisho lwa Baibolo mubuloshuwa wa Nanchi Lesa Ukebaka. Lombai kwi Yehoba kuba’mba emupeshe. (Mat. 21:22) Inge mwibikishako, mukekala nalusekelo lwakukwasha bantu kuyuka mambo awama!