Sungai

Ñambilo imo Yakwamba Mumwingilo Wamubujimi

Byakwingijisha Kino Kyamukachi

Ñambilo yavula iji panshipo iji mumakope akunyumakwe a Mwingilo Wetu wa Bufumu. Ingijishai yonse yomukeba mumwingilo wenu wabusapwishi nekumona bikafumamo. Sungai kino kyamukachi, nekumonangamo kimye kyomubena kunengezha mwingilo.

Mwakonsha kutundaika muntu kuteleka ku Mambo a Lesa umvwe bukiji-bukiji mwafika pabishinka. Ipuzhai jipuzho jashinkamana pakintu kimo, apa bino mungipipishilo mutange mukumbu wamu Kinembelo. Mwakonsha kweseka kwamba ino ñambilo:

“Byomulanguluka pamambo akimye kyakulutwe, abya mwikala naluketekelonyi, inyi muzhinauka? [Lekai akumbule.] Baibolo yaambijile jimo makatazho otubena kumona lelo jino nebifumamo.”—2 Timo. 3:1, 2, 5; Mana. 2:21, 22.

“Lelo jino bantu baji bingi nabijikila pamambo abutuntulu bwamubiji. Nanchi mwayuka’mba Lesa walaya’mba ukafumyapo kikupu makatazho onse abutuntulu bwamubiji?”—Isa. 33:24; Lum. 21:3, 4.

“Abya mwayuka’mba Baibolo yaambijile jimo’mba kulutwe nalwendo kukekalatu kafulumende umo ukalamanga ntanda yonsenyi?”—Da. 2:44; Mat. 6:9, 10.

“Nanchi mubena kulanguluka’mba ntanda yafwainwa kwikala byepi umvwe kyakuba Yesu Kilishitu yeubena kwiilama?”—Sala. 72:7, 8.

“Bantu bavula bayanda bingi namambo amisalululo iji pakachi kababalume nebabakazhi, bupopweshi nangwatu mushobo. Nanchi mubena kulanguluka’mba Lesa wiumvwa byepi pamisalululo yayewo mutundu?”—Byu. 10:34, 35.

“Twayuka kuba’mba Yesu Kilishitu waubile byakukumya byavula bingi mukimye kyanji. Umvwe mwajinga najishuko jakumushikisha’mba obepo kyakukumya kimo, kika kyomwakonsha kukeba’mba emubile?”—Sala. 72:12-14, 16.

“Bantu bavula bakimwa nakumvwa byamakatazho. Bakeba kumvwa ano makatazho byoakapwa. Bino kwepi kotwakonsha kutana mashinda akine akupwishishamo makatazho etu?”—2 Timo. 3:16, 17.

“Mwakonsha kuyuka Bufumu bomulombela Mululombelo lwa Nkambo (nangwa’mba lwa Tata wetu)?”—Lum. 11:15.

Ñambilo Yakutatwilamo Misambo

Mutanchi wamepuzho aji panshipo, afuma mumitwe iji mubuku wa Ukupelulula, amwesha peja yabuku pomwakonsha kutana mukumbu:

Mamboka otukotela nekufwa? (140)

Nanchi bwikalo bwabafu buji byepi? (141)

Abya paji bishinka byakine byakwitabila mwi Lesa nyi? (223)

Lesa muntu wakine? (225)

Nanchi Lesa kine utako muchima kubitumwekela atweba bantunyi? (224)

Bantu bonse bawama baya kwiulunyi? (394)

Abya muntu kana waya kwiulu popoakonsha kwikala nalusekelo lwakine kine lwakukimye kyakulutwenyi? (395)

Mamboka okyanemena kuyuka nekwingijisha jizhina ja Lesa? (424)

Nanchi kine Yesu Kilishitu Lesa nyi? (430)

Bufumu bwa Lesa bukobaka? (258)

Nga bantu baikelakoka? (265)

Kika kyakonsha kukwasha kukosesha masongola? (132)

Nanchi bupopweshi bonse bwaitabilwa na Lesa nyi? (282)

Muntu wakonsha kuyuka byepi bupopweshi bwakine? (288)

Nanchi Satana uji byepi nangovu muino ntanda? (245)

Mamboka Lesa oaswishisha buyanji? (310)

Mamboka bubi kyobwavujila bibye? (247)

Ñanyi ubena kulama ino ntanda—Lesa nyi, inyi Satana? (111)

Byakwamba Pakutambika Buloshuwa wa Nanchi Lesa Ukebaka

“Kwakubula nangwa kuzhinaukatune mwakonsha kwitaba’mba bantu bavula baitabila mwi Lesa. Bonse baitabila mwiaye betaba’mba paji bintu bimo Lesa byoakeba kwiatweba. Bino bantu kyobakanakotu kekyakuba’mba, Nanchi Lesa Ukebaka Kwiatweba?” Kepo mumumweshe buloshuwa wa Nanchi Lesa Ukebaka, muzhikule mulufunjisho 1, nekwisambapo.

“Namambo akuvula kwamakatazho mubisemi lelo jino, abya mwakilangulukapo kala jishinda mwakutaina lusekelo mukisemi?” Panyuma yakukumbulapo, lumbululai’mba mu Baibolo Lesa witubula jishinda jakwikelamo balusekelo mukisemi. Tangai Isaya 48:17. Apa bino muzhikule mulufunjisho 8 mubuloshuwa wa Nanchi Lesa Ukebaka, nekutongolapo mavesi amo amu Baibolo abena kupana mikambizho kubonse pamuntu pamuntu mukisemi. Tangai mepuzho kuntatwilo yalufunjisho. Mushikishai umvwe ubena kukeba kutanga mikumbu.

“Mu uno buloshuwa muji lufunjisho lwawama lwamafunjisho atanshi amu Baibolo. Pamapeja onse, musakutanapo mikumbu yamepuzho akatazha bantu pamyaka yavula bingi. Kyakumwenako, Ñanyi mulanguluko Lesa yeajinga nanji pakulenga ntanda?” Zhikulai mulufunjisho 5, nekutanga mepuzho kuntatwilo yalufunjisho. Shikishai mwinanzubo ñanyi jipuzho joatemwishapo, kepo mutange palagalafu muji mukumbu nebinembelo byafwainwa. Mulumbulwilai’mba twakonsha kutana mikumbu yamepuzho akwabo byonka byotwatana mukumbu wajino jipuzho jotubena kwisambapo. Mulayai’mba musakukabwela nejikwabo kwiya nakwisamba pajipuzho jikwabo.

“Kika kyomubena kulanguluka’mba kyokilengela malwañano mumasukulu? Nanchi eya namambo abansemi kukankalwa kufunjisha baananyi? Inyi paji bintu bikwabo bibena kulengela, nabiji byubilo bya Diabola?” Lekai akumbule. Umvwe muntu waamba’mba byubilo bya Diabola byobibena kulengela, tangai Lumwekesho 12:9, 12. Lumbululai Diabola byoabena kutundaika malwañano panopantanda. Kepo muzhikule mulufunjisho 4 mubuloshuwa wa Nanchi Lesa Ukebaka, nekumushikisha umvwe walangulukapo kala Diabola koafumine. Tangai nekwisamba mapalagalafu atanshi abiji. Umvwe muntu wakumbula’mba “bansemi kukankalwa kufunjisha baana” kyokyalengela malwañano mumasukulu, tangai 2 Timoti 3:1-3 nekutongaula bine bintu bibena kulengela luno lukatazho. Kepo muzhikule mulufunjisho 8, mubuloshuwa wa Nanchi Lesa Ukebaka, mutange palagalafu 5, nekutwajijila nakwisamba.

“Nanchi mubena kulanguluka’mba kyawama kuketekela’mba Mulenga yewafwainwa kwitupa maana otukeba akukomesheshamo bulongo kisemi?” Panyuma yamukumbu, mumweshai buloshuwa wa Nanchi Lesa Ukebaka. Zhikulai mulufunjisho 8, nekumulumbulwila’mba ino buloshuwa iji namafunde amu Baibolo kubonse pamuntu pamuntu mukisemi. Mulombai’mba mumumweshe byakwingijisha buloshuwa pamo na Baibolo kuba’mba amwenemo mfweto ikatampe.

“Namambo amakatazho otuji nao mubwikalo bwetu bwaano moba, nanchi mubena kulanguluka’mba lulombelo lwakonsha kwitukwashanyi? [Lekai akumbule.] Bavula bamba’mba lulombelo lwibakosesha. [Tangai Filipai 4:6, 7.] Bino nangwa byonkabyo, muntu wakonsha kulanguluka’mba milombelo yanji kechi ibena kukumbulwane. [Zhikulai mulufunjisho 7 mubuloshuwa.] Uno buloshuwa ubena kulumbulula lulombelo byolwakonsha kwitukwasha.”

“Tubena kwisamba nabakwetu pamambo abupopweshi kyobwavujila panopantanda. Bino, saka kuji Baibolo imotu. Mundangulukilo yenu anweba bene, mamboka okwaikela bupopweshi bwavula? [Lekai akumbule. Zhikulai mulufunjisho 13 nekutanga mepuzho aji kuntatwilo yalufunjisho.] Ano mepuzho akumbulwa muluno lufunjisho.”

Panyuma yakutambika Kyamba kya Usopa ne Loleni!, mushikishai umvwe mwakonsha kutangila pamo nanji palagalafu imo ipi. Umvwe waswa, zhikulai mulufunjisho 5 mubuloshuwa wa Nanchi Lesa Ukebaka. Tangai ndonda yamepuzho aji kuntatwilo yalufunjisho nekumubula’mba ateleke kumukumbu wajipuzho jitanshi byomubena kutanga palagalafu itanshi. Umvwe mwatanga palagalafu, pano ipuzhai jipuzho mumvwe byoasakukumbula. Mutambikai buloshuwa. Inge watambula, mulayai’mba mukeya jibiji mukomvwe byoaumvwa mepuzho abiji ashalako.

Byakwamba Pakutambika Buku wa Kuyuka

Samuji na Baibolo mukuboko, ambai’mba: “Tubena kwisamba pakino kinembelo nabantu bonse muino mpunzha. Kibena kwamba’mba ... ” Tangai Yoano 17:3, apa bino mumushikishe’mba: “Mwaunvwa mulaye yebetulaya umvwe twayuka maana alumbulukanyi? [Lekai akumbule.] Nanchi muntu wafwainwa kwiatana kwepi maana auno mutundu?” Panyuma yamukumbu, mumweshai buku wa Kuyuka, nekwamba’mba: “Uno buku ubena kwamba pakuyuka kutangijila kubumi bwamyaka. Wakumbula mepuzho bantu obepuzha javula pamambo a Baibolo.” Mweshai bijimo, nekumushikisha umvwe wakilangulukapo kala paino mitwe.

“Nanchi mwakilangulukapo kala’mba Lesa naye umona kutama nshiji nebuyanji botumona mubwikalo nangwa botubena kupitamo atweba bene? [Lekai akumbule.] Baibolo itubula’mba Lesa witutemwa kabiji witukwasha mubimye byamalwa.” Tangai bibese bimo bya Masalamo 72:12-17. Zhikulai buku wa Kuyuka mukitango 8, mulumbulwilai’mba mukino kitango muji mukumbu wawama bingi wakumbula jipuzho bantu bavula jobepuzha jakuba’mba, Nanchi Mamboka Lesa o Aswishisha Buyanji? Umvwe kyakonsheka, isambai byambo byamu Binembelo biji mumapalagalafu 3 kufika ku 5, nangwa mukobe byobyo kimye kyomukabwelako.

“Atweba bavula twafwisha batemwe betu. Nanchi mulanguluka’mba tukebamonapo jibijinyi? [Lekai akumbule.] Yesu waambile’mba batemwe betu bakasangulwa. [Tangai Yoano 11:11, 25, 44.] Nangwa kyakuba kino kyamwekele kala, kimwesha Lesa kyoetulaya kwitubila.” Zhikulai pakipikichala kiji papeja 85, mubuku wa Kuyuka mutange netubyambo tuji peulu yakipikichala. Kepo mumweshai kipikichala kiji papeja 86, nekwambapo. Ambai byakwiya nakwisambapo kimye kyomukabwelako pakushikisha’mba: “Nanchi mukeba kuyuka mambo bantu obakotela nekufwanyi?” Bwelaiko nakwisamba kyapitala 6.

“Abya mwakilangulukapo kala ene mambo bantu obakebela bumi bwamyaka nemyakanyi?” Panyuma yamukumbu, zhikulai mukitango 6 mubuku wa Kuyuka, nekutanga palagalafu 3. Ambaipo pabinembelo bijimo. Pamepuzho abiji aji kumpelo yapalagalafu, mushikishai umvwe ukeba kuyuka mikumbu. Umvwe waitaba, isambai mapalagalafu akwabo acheche alondelapo.

“Tubena kushikisha bantu umvwe baitabila mubino byambo ... ” Tangai Ntendekelo 1:1, nekumushikisha’mba: “Nanchi mwaitabila bino byambonyi?” Umvwe waitaba’mba ee, ambai’mba: “Neamiwa nebitabila. Pano nanchi abya mubena kulanguluka’mba umvwe Lesa yewalengele bintu byonse, yeubena kulengela nebubi bonse bwenyi?” Panyuma yakumvwa byoakumbula, Tangai Musapwishi 7:29. Zhikulai buku wa Kuyuka mukitango 8, nekutanga palagalafu 2. Umvwe wakana byambo biji mu Ntendekelo 1:1, mukoseshai kumona biyukilo bimwesha’mba Mulenga koaji.—Monai buku wa Ukupelulula, mapeja 252-4.

“Nanchi mwakonsha kwitaba’mba namambo a kwalauka-alauka kwabyubilo lelo jino, tukebewa mizhilo yaketekelwa mubwikalonyi? [Lekai akumbule.] Nangwa kyakuba kebuku wakala, Baibolo witufunjisha maana abya kwikala bulongo ano moba nekwikala balusekelo mukisemi.” Kepo zhikulai mukitango 2 mubuku wa Kuyuka, mutange palagalafu 10 nemukuku mutanshi mupalagalafu 11, kuvwangako ne 2 Timoti 3:16, 17.

“Mubena kukeba kuyuka bwikalo bwetu nentanda byoikekala kimye kyakulutwenyi? [Lekai akumbule.] Baibolo itongola kimye kyakulutwe nakyambo kimo—Paladisa! Lesa momoabikile bamulume nemukazhi batanshi kimye kyoebalengele. Umvwai bino byambo bibena kwamba byoyashi ikekale.” Zhikulai papeja 8 mubuku wa Kuyuka, nekutanga palagalafu 9, pakamutwe kakuba’mba “Bumi mu Paladisa.” Isambai nepabishinka biji mupalagalafu 10, nekutanga kinembelo kya Isaya 55:10, 11. Mubulai’mba mukeba kutwajijila kwisamba nanji bikekala bumi mu Paladisa ukabwezhiwa, nekutanga mapalagalafu 11-16.

Kimye kyomubena kubwela kubomwashijile Kyamba kya Usopa ne Loleni! mwakonsha kwamba bino amba:

“Kimye kyonemufwakashijile nemushijile Kyamba kya Usopa. Nayuka namba mwamwene kuba’mba mutwe yense wamagazini ke Kyamba kya Usopa Kibena Kubijika Bufumu bwa Yehoba. Lelo nakeba namba nemulumbulwile buno Bufumu byobuji nebyobwakonsha kwimubila anweba nekisemi kyenu.” Kepo zhikulai palufunjisho 6 mubuloshuwa wa Nanchi Lesa Ukebaka, tangai nekwisambapo nayewo muntu kwesakana nakimye kyoemupa.

“Katatakatu ponemufwakashijile nekwimushila nemushijile magazini a Kyamba kya Usopa ne Loleni! Ano magazini alengela bantu kubaishako munema wakunemeka Baibolo nemizhilo yayo yawama. Mambo akuba nammona namba kyanema bingi muntu yense kuyuka Mambo a Lesa, naiya jibiji namba nemumweshe kintu kimo kyakonsha kwimukwasha kuba byobyo.” Mumweshai buloshuwa wa Nanchi Lesa Ukebaka nangwa buku wa Kuyuka, nekumulomba kufunda naye lufunjisho lwa Baibolo.

Umvwe mubena kutambika buku wakala uji yense wamapeja 192, mwakonsha kweseka ino ñambilo:

“Bantu bavula bamba bingi palufunjisho lwawama. Mundangulukilo yenu anweba bene, mubena kulanguluka’mba ñanyi lufunjisho muntu loafwainwa kufunda pakuba’mba ekale nalusekelo lukatampe nekwikala nabumi? [Lekai akumbule. Kepo tangai Byambo bya Mana 9:10, 11.] Uno buku [tongolai mutwe wabuku yemubena kutambika] ubena kulumbulula Baibolo. Ubena kutongola nsulo yamaanatu amo akonsha kutangijila kubumi bwamyaka nemyaka.” Mumweshai kyakumwenako kimo mubuku nekumutundaika kutanga.

Mabuku Akwabo

Ñambilo imo yakwamba pakutambika mabuku nemabuloshuwa akwabo itanyiwa mu Watch Tower Publications Index pamutwe wakuba’mba:

Presentations (Ñambilo)

List by Publication (Ndonda Yamabuku)

Ñambilo Yakubula Kuzhobakana

Kutatula lufunjisho lwa Baibolo, esekai kwambapo imo yaino ñambilo yakubula kuzhobakana:

“Nanchi mwayuka’mba mukakimyetu kacheche mwakonsha kutana mukumbu wajipuzho janema jamu Baibolo nyi? Kyakumwenako, ... ” Kepo, mushikishai jipuzho jimo jiji kuntatwilo yalufunjisho luji lonse mubuloshuwa wa Nanchi Lesa Ukebaka kabiji jomubena kulanguluka’mba jakonsha kumulengela kuteleka.

“Nemusolomoka namba nemubuleko lunengezho lwa lufunjisho lwa Baibolo lwakubula kulipila. Angishai nemumweshe byotuba mumaminititu atanu. Abya muji nakimyenyi?” Umvwe wakumbula’mba ee, ingijishai lufunjisho 1 mubuloshuwa wa Nanchi Lesa Ukebaka mumumweshe byakufunda, mutangetu kinembelo kimo nangwa bibiji byomwasala. Panyuma yakuba kino mushikishai’mba: “Ñanyi kimye kyomukekalako namaminiti 15 pakuba’mba tukafunde lufunjisho lukwabo?”

“Bantu bavula baji na Baibolo, pano bino kechi bayuka’mba ikumbula mikumbu yamepuzho anema otuji nao pamambo akimye kyakulutwene. Kwingijisha kino kyakukwasha kufunda [buloshuwa wa Nanchi Lesa Ukebaka nangwa buku wa Kuyuka] muawala umo nangwa kukilapo mumulungu, mwakonsha kuyuka mafunjisho akatampe a Baibolo mubañondotu bacheche. Nakonsha kwimumwesha byotufunda.”

“Naiya namba nemumweshe kozi yakufunda Baibolo panzubo yakubula malipilo. Umvwe mubena kukeba, nakeba namba nemumweshe mumaminititu acheche bantu mubyalo 200 byobafunjila pamo Baibolo panzubo bukisemi. Twakonsha kwingijisha mutwe umo waino mitwe kwisambapo. [Mumweshai mitwe iji mubuku wa Kuyuka.] Ñanyi mutwe kikatakata wimukebula muchima?” Lekai mwine asale. Zhikulai pakitango kyoasala nekutatula lufunjisho mupalagalafu itanshi.

“Mfunjisha lufunjisho lwa Baibolo kwakubula kulipilishane kabiji mbena kukeba nebakwabo bantu bakeba kufunda. Aye buku yoyotwingijisha kufundamo Baibolo [Mumweshai buku wa Kuyuka.] Kozi ikalatu yabañondo bacheche kabiji ikumbula mikumbu yamepuzho nabiji yakuba’mba: Mamboka Lesa oaswishisha buyanji? Mamboka otukotela nekufwa? Nanchi kika kimwekela batemwe betu bafwa? Kabiji twakonsha kufwenya byepi kwi Lesa? Nemumweshe byotufundanyi?”

Umvwe mwatana ñambilo ibena kutundaika bantu kumvwa, twajijilai nakwiingijisha! Yambai kwesakana nabuku yemubena kutambika yewo ñondo.