Mukwekele Wiikajila wa Kushajika Buloshuwa wa Katataka
1 Bantu bavula bashupikwa bingi na mambo a makatazho a ino ntanda, kabiji bantutu bacheche bo bayuka kyalengela ino ntanda kwikala byo iji, kimye kya kulutwe byo kikekala, ne byo bakonsha kuba pa kuba’mba bakapuluke malwa abena kwiya. (Ezi. 9:4) Pa kuba’mba twibakwashe bayuke kimye kyo tujimo, mukwekele wiikajila wa kushajika buloshuwa wa katataka wa Labainga Mukenkentenga! ukekalako kutatula pa Kimo, October 18, kufika pa Mulungu, November 14.
2 Uno buloshuwa wakonsha kushajikwa kimye kya mwingilo wa ku nzubo ne nzubo, kimye kya kubwelako, kimye kyo mubena kusapwila busapwishi bwa kushukilwa, nangwa bwa mu mukwakwa ne mu mapunzha a busulu. Pano bino, buloshuwa wa Labainga mukenkentenga! kechi wafwainwa kushajikwatu kishajikeshajike ne. Ukashajikwangatu ku boba baji na lusekelo mu byamba Baibolo pa bintu bibena kumwekana mu ntanda. Aba bajiko na lusekelo pacheche mwafwainwa kwibapa talakiti.
3 Mwakonsha kulengela muntu kuteleka kupichila mu kwamba’mba:
◼ “Bantu bavula batako bingi muchima ku makatazho ne bintu bishinkisha bulaka bibena kumweka ano moba. [Ambaipo kya kumwenako kyayukanyikwa mu kimasamasa.] Nanchi mwayuka’mba bino bintu byaambiwepo kala mu Baibolo nyi? [Lekai akumbule, apa bino mutange kinembelo kyaamba pa lukatazho lo mwatongola, nabiji Mateo 24:3, 7, 8; Luka 21:7, 10, 11; nangwa 2 Timoti 3:1-5.] Baibolo umweshatu patoka ano moba etu byo aji ne bikekala bwikalo bwa bantu kulutwe na lwendo. Nanchi mukeba kuyukilapo byavula nyi? [Lekai akumbule, apa bino ne kushajika buloshuwa umvwe ao muntu wamwesha lusekelo kya kine.] Uno buloshuwa kechi wa kupotesha ne. Umvwe mukeba kupanako bupe bwa kufuma panshi ya muchima wenu ku mwingilo wetu wingijiwa mwaya ntanda yonse, bupe bwenu busanchilwa bingi.”
4 Nangwa kampe ino nsolomokelo yakonsha kwimuwamina:
◼ “Bantu bavula ano moba babena kulefulwa bingi na mambo a bintu bishinkisha bulaka biji panopantanda nangwa kulefulwa na mambo a bintu bya malwa byuba bantu. Bamo bakumyatu’mba kana mambo ka Lesa o alekela bino bintu ne kuba waubapo kimo kya kwibilekesha ne. Baibolo witubula’mba bukumotu Lesa akobepo kimo kuba’mba akakuule bantu ku makatazho. Akimonai mfweto Lesa yo akobila bantu. [Tangai Masalamo 37:10, 11.] Nanchi mukeba kuyukilapo byavula nyi?” Ambai byambo bya kupezhako kwesakana na byonka byo byaambiwa peulu po.
5 Nembai jizhina ja muntu yense watambulako buloshuwa ne keyala wanji, kabiji bwelaiko ku bobo bantu. Mashinda a byo mwakonsha kuba kimye kya kubwelako akekala mu Mwingilo Wetu wa Bufumu wa November 2004. Umvwe ao muntu uji bingi na lusekelo kimyetu kya kubwelako kwenu kutanshi, ponkapotu mwakonsha kutatula lufunjisho lwa Baibolo kupichila mu kwingijisha buloshuwa wa Labainga mukenkentenga! nangwatu buku mukwabo nabiji buloshuwa wa Nanchi Lesa Ukebaka Kwiatweba?
6 Makope a uno buloshuwa wa katataka akekala konka panyumatu ya Kupwila kwa Mwingilo mukambiwa jino jashi. Kyalangulukwa kuba’mba basapwishi ne bapainiya bakatambuletu mabuloshuwa aesakana o bakonsha kushajika mu moba acheche a mukwekele. Mwane kine Yehoba apeshe uno mukwekele wiikajila kuba’mba kimuletelenga lukumo kabiji ne kuba’mba akwashe ba michima ya kishinka konse konse.—Sala. 90:17.