Mukwekele Wiikajila wa Kutendeka Kufunjisha Bantu Baibolo mu September

Mu September, tukengila na ngovu kutendeka kufunjisha bantu bavula Baibolo bekala mu nyaunda yetu kwingijisha buloshuwa wa Mukekala Myaka ne Myaka! Basapwishi bakonsha kufuukulapo kwingilako bupainiya bwakukwasha bwa maola 30. Tukengila byepi uno mukwekele?

• Pa Kimye Kitanshi: Ingijishai bwipuzho buji ku nkupiko ya kunyuma pa kulengela bantu kutako muchima ne kwibamwesha bya kufunda Baibolo. Vulukainga boba bateleko muchima ne bantu bo mwalaile kubwelako. Nangwa kya kuba kala bakaine kufunda Baibolo bino bakonsha kutako muchima ku jishinda jakatataka jo tubena kufunjishishamo kwingijisha buloshuwa wakatataka. Kechi twafwainwa kusha buloshuwa pa mazubo pabula bantu nangwa kutumina buloshuwa bantu babujile kutako muchima ne. Kavoto ka Mwingilo mu kipwilo kakonsha kunengezha moba akwabo a kusambakana kwa kuya mu mwingilo mu uno ñondo.

• Pa Bimye Bikwabotu: Inge mu kipwilo kyenu mwingijisha ne twakutanchikapo mabuku pa kusapwila, bikaingapo buloshuwa wa Mukekala Myaka ne Myaka! Buulai bonse batako muchima kuba’mba inge batambula buloshuwa bakonsha ne kutendeka kufunda Baibolo kyatutu. Bamweshai byo tufunjisha bantu Baibolo ponkapotu nangwa nengezhai kuba bino juba jikwabo. Kalama wa mwingilo wakonsha kwambila basapwishi bafikilamo kuya na kwingijila ku nyaunda ya busulu ne kutendeka kufunjisha bantu Baibolo. Mwakonsha ne kutendeka kufunjisha Baibolo bantu bo mwingilo nabo nangwa bo mwasapwila busapwishi bwa kushukilwa.

Yesu witukambizhe kuya na ‘kufunjisha bantu kwikala baana ba bwanga.’ (Mat 28:19, 20) Onkao mambo, uno mukwekele wiikajila etukwashe kutendeka kufunjisha bantu Baibolo kwingijisha buloshuwa wa Mukekala Myaka ne Myaka!