“Kusha Magazini a Kala Nangwa Buloshuwa Yense Wakonsha Kuzakula Bantu Muchima”

Mu bañondo bonse, mo tusha buku wa Baibolo Ufunjisha ne kutendeka lufunjisho lwa Baibolo pa kimye kitanshi, betutundaika “kusha magazini a kala nangwa buloshuwa yense wakonsha kuzakula bantu muchima” umvwe mwina nzubo uji nanji uno buku kala, pano bino kechi ukeba kufunda Baibolo ne. Mambo ka?

Mu mabuloshuwa ne mu magazini a kala muji mitwe yakonsha kwingila ne pa kino kimye. Bintu bimo biji mu ano magazini ne mabuloshuwa byakonsha kufika mwina nzubo pa muchima. Onkao mambo, umvwe mubena kulonga mabuku mu kyola kyenu kya mu busapwishi, bikaimo mabuloshuwa apusana pusana kubikakotu ne a kala. Inge mufwao magazini a kala, kampe mwakonsha kuya po mutambwila magazini ne kutambulapo amo. Kabiji inge mwina nzubo uji na buku wa Baibolo Ufunjisha, pano bino kechi ukeba kufunda Baibolo ne, mwakonsha kumumwesha magazini ne mabuloshuwa amo o muji nao ne kumwambila kusalapo o atemwa. Panyuma ya bino, mwakonsha kubwelako na kubaisha lusekelo lwanji lwa kukeba kufunda bukine. Kino kampe kyakonsha kumulengela kutendeka kufunda Baibolo kulutwe.