Lufunjisho 1

Lesa Wimulomba Anweba Kwikala Mulunda Nanji

Lesa usaka anweba kwikala mulunda nanji. Mwakilangulukapo kala kuba’mba mwakonsha kwikala mulunda na Muntu wakijishapo buneme mu kulengwa konse nyi? Abalahama, wajiko kala kene bamutelele’mba mulunda na Lesa. (Yakoba 2:23) Bamo nabo batongolwa mu Baibolo beyowele bulunda na Lesa kabiji bapeeshiwe kyabaya bingi. Lelo jino, bantu mwaya ntanda yonse baaluka ke balunda na Lesa. Ne nuwa mwakonsha kwikala mulunda na Lesa.

Kwikala mulunda na Lesa kwawamisha kukila kwikala mulunda na muntu uji yense. Lesa kechi ulengesha bumvu balunda nanji bakishinka ne. (Masalamo 18:25) Kwikala mulunda na Lesa kwawama kukila kwikala na bunonshi. Inge munonshi wafwa, bangitu bo basenda mali anji. Nangwa byonkabyo, abo beyowa bulunda na Lesa baji na nsabo ibula kuvutulwa na muntu ungi.—Mateo 6:19.

Bantu bamo bakonsha kweseka kwi mukanya kufunda pe Lesa. Nangwatu bakwenu bamo ne ba mu kisemi kyenu bakonsha kwi mukanya kufunda. (Mateo 10:36, 37) Inge bantu bakwabo bemuseka nangwa kwimuchinya, ishikishai anwe bene’mba: ‘Nanchi ñanyi ye nkeba kutokesha pa muchima—bantu nyi Lesa?’ Langulukai pa kino: Inge kyakuba muntu umo wimukanya kuja, nanchi mwakonsha kumumvwina nyi? Kechi mwakonsha kumumvwina ne! Kajo kakebewa pa kuba’mba mwikale bomi. Bino Lesa wakonsha kwimulengela kwikala na bumi myaka ne myaka! Onkao mambo kechi muleke muntu emukanye kufunda byo mwakonsha kwikala mulunda na Lesa ne.—Yoano 17:3.