Kuwamishako Busendwe Bwetu bwa Kusapwila—Kutendeka Kufunjisha Muntu Baibolo Kwingijisha Buloshuwa wa Mambo Awama Afuma kwi Lesa!
Ene Mambo o Kwanemena: Pa kuba’mba tufunjishe bantu kwikala baana ba bwanga, twafwainwa kwikala bafunjishi ba Mambo a Lesa. (Mat. 28:19, 20) Atweba bonse twakonsha kufunjisha bulongo bukine kwingijisha bingijisho byo betupa. Buloshuwa wa kuba’mba Mambo Awama Afuma kwi Lesa! Bamunengezhezha kwitukwasha kufunjisha bantu bukine. Twakonsha kumwingijisha pa kutendeka kufunjisha mwina nzubo Baibolo kimye kitanshi kyo twamutaana pa nzubo.
Esekai Kuba Bino Uno Ñondo:
Lombai kuba’mba mwikale na kizaku kya kufunjisha muntu Baibolo, ne kuba’mba Yehoba emukwashe kutaana muntu wa kufunjisha Baibolo ne kwikala mufunjishi wayuka kufunjisha bulongo bukine.—Fili. 2:13.
Kupopwela kwa kisemi nangwa pa lufunjisho lwa pa bunke, ikalaiko na kimye kya kufunda jino jishinda ja kwisambilamo na bantu. Kuba bino kikemulengela kwamba na kushiinwa ne kutendeka kufunjisha muntu Baibolo mu busapwishi.