**“Kuwamishako Busendwe Bwetu bwa Kusapwila—Kumwesha bya Kufunjisha Baibolo Kwingijisha Buku wa Baibolo Ufunjisha.”**

Ene Mambo o Kwanemena: Bantu bavula kechi bayuka byo kilumbulula inge twaamba’mba tufunjisha bantu Baibolo kyatutu. Bakonsha kulanguluka amba bafwainwa kwinunga ku jibumba ja babena kufunda Baibolo nangwa kunemba makalata pa kufunda. Kukila ku mubulatu pa kanwa, bino bamweshai byo tufunjisha bantu. Mu maminiti acheche nangwa mwaimanatu, mwakonsha kumwesha muntu jishinda japeela jo tufunjilamo Baibolo ne byo bakonsha kumwenamo.

Byo Twafwainwa Kuba:

Inge mwilumbulula, ipuzhai mwina nzubo inge ulangulukapo pa byo bakekala na kisemi kyanji kulutwe na lwendo.
Lumbululai kuba’mba bantu bavula balanguluka byonkabyo, ne kwibamwesha mutanchi wa bijimo mu buku wa Baibolo Ufunjisha. Balumbulwilai amba uno buku muji mafunjisho apeela kumvwa amwesha bifunjisha Baibolo pa byo kikekala kulutwe na lwendo ne mitwe ikwabo, ne kwibepuzha kitango kyo bafwainwa kutemwa kufunda.
Bapai buku ne kuzhikula pa kitango kyonka kyo baji kusala. Balumbulwilai kuba’mba mepuzho aji ku ntendekelo ya kitango akumbulwa mu mafuka alondelapo.
Ambilai mwina nzubo kutanga jifuka jitanshi inge wakonsha kutanga. Apa bino tangai bwipuzho bwa jojo jifuka, ne kutana mukumbu na mwina nzubo. Monai kinembelo kyonse kijimo mu jifuka kyakwatankana na mukumbu ne kwisambapo. Bamweshai byo mwashabula pa mikumbu mu buku wenu.
Tangai jifuka jalondelapo, ne kwambila mwina nzubo kukumbula bwipuzho kwa kubula kutanga biji mu jifuka.
Musanchilai ne kumvwañana juba jo mukabwelako na kupwisha mafuka ashalako.
Inge kyakonsheka, mutambishai vidyo uji pa jw.org wa mutwe wa kuba’mba, Kikala Byepi pa Kufunda Baibolo?

Esekai Kuba Bino Uno Ñondo:

Lombai Yehoba kwimupesha pa kuba’mba mukatendeke lufunjisho lwa Baibolo lwa katataka.—Fili. 2:13.
Esekai kumwesha byo mwafwainwa kutendeka lufunjisho lwa Baibolo kwingijisha buku wa Baibolo Ufunjisha, nangwa tambishai vidyo wa Kikala Byepi pa Kufunda Baibolo? nangwa jimotu kimye kyo muji mu mwingilo.