Kibaba kya Katataka kya Kutendekelamo Mafunjisho a Baibolo
1. Ñanyi kibaba kya katataka kikekalanga mu Kyamba kya Usopa kya bena kengi, kabiji bekinengezhezha ka?
1 Kutendeka mu ñondo ubena kwiya, mu Kyamba kya Usopa kya bena kengi mukekalanga kibaba kya katataka kya kwitukwasha kutendeka mafunjisho a Baibolo. Kikekalanga na mutwe wa kuba’mba: “Fundainga Mambo a Lesa.” Bamo mu nyaunda bakatemwa bingi kwitangila abo bene kino kibaba, nangwa byonkabyo, kino kibaba kya kwingijisha pa kwisamba na mwina nzubo.
2. Kibaba kya katataka bekinengezha byepi?
2 Bikekalangamo: Mutwe ne tumitwe twatucheche betunemba mu bwipuzho bwa kwipuzha mwina nzubo pa kwisamba. Muji binembelo byo babula kunemba byambo bijipo, byo bamweshatu pa kuba’mba mwina nzubo mwine eyowenga kubalaula Mambo a Lesa. Mujitu mafuka epi epi a kukonsha kwisamba na muntu saka mwaimana. Bibaba byonse byakunza ku buku wa Baibolo Ufunjisha pa kuba’mba kimupelelenga kutwajijila na lufunjisho mu uno buku.
3. Pa kuya mu mwingilo wa ku nzubo ku nzubo, twakonsha kwingijisha byepi kino kibaba kya katataka kutendekelamo lufunjisho lwa Baibolo?
3 Bya Kwikingijisha: Pa kusha Kyamba kya Usopa mwakonsha kwipuzha bwipuzho buji bonse bwakonsha kuzakula muchima wa mwina nzubo bwaimena pa bibaba bijimo. Kyakumwenako, Kyamba kya Usopa kya Kizungu kya January 1 kyaamba pa ene mambo Baibolo o anemena. Mwakonsha kwipuzha’mba: “Nanchi mumona kuba’mba, Baibolo Mambo a Lesa nyi, inyi amba bukutu wawama? [Lekai akumbule.] Byambo biji mu uno magazini byawama bingi.” Mumweshai bwipuzho butanshi ne kutanga jifuka jitanshi, apa bino mwatanga ne kinembelo. Tangai bwipuzho jikwabo, ne kwambila mwina nzubo kuba’mba akumbule. Isambaitu byaesakana, kwingijisha mepuzho aji na nambala pa kwisamba. Saka mukyangye kuya, mubulai bwipuzho bo mukesambapo ne kumubula juba jo mukabwelako. Bwelaingako na kwisamba pa kyokyo kibaba kufika ne kimye kyo mukamuletela Kyamba kya Usopa kikwabo. Jishinda jikwabo ke kutendeka lufunjisho lwa Baibolo ponkapo na mwina nzubo kwingijisha kibaba kiji mu Kyamba kya Usopa pa kumumwesha byo tufunda Baibolo.
4. Tukengijishanga byepi kibaba kya katataka pa kubwelako?
4 Mwakonsha ne kwingijisha kino kibaba pa kwisamba na bantu bo mushila magazini kabiji ne pa kubwelako. Mwakonsha kwamba’mba: “Mu Kyamba kya Usopa muji ne kibaba kya katataka. Lekai nemubule bya kwikingijisha.” Tubena kulomba kuba’mba kibaba kya katataka kikakwashe bavula ‘kuyukisha bya bukine.’—1 Timo. 2:4.