Nanchi Mubena Kwikingijisha Bulongo Nyi?
1 “Ntonga bingi kukeba kwikingijisha mu bujimi!” Bino byo byo anembele nyenga umo panyuma ya kutanga Kyamba kya Usopa kya January 1, 2008. Nanchi mwakipitamo kala mu bibaba bimo bitanwa kimye kyonse mu Kyamba kya Usopa kya kusha mu bujimi kabiji ne kumonapo mashinda a kwisambilamo bino bibaba na bantu mu mwingilo wa mu bujimi nyi?
2 “Byo Tufunjilako kwi Yesu”: Luno lubaji kampe lwimukwasha bingi kutendekelamo mafunjisho a Baibolo. Umvwe kikyangye kwimumwekela, esekai kutangila mwina nzubo mutwe wa kibaba kabiji ne kumumwesha Yesu byo aambilepo pa kino kintu kwesakana na byo kyaambiwapo mu jifuka jitanshi. Inge muntu wamwesha lusekelo kimye kitanshi, twajijilai kwisamba nanji kwingijisha tumitwe tucheche, twanengezhiwa mu bumepuzho a kulengela muntu kulangulukishapo. Mulekai akumbulepo. Londololaiko pacheche bipikichala byakwatankana na byo mubena kwambapo, apa bino muye mu jifuka jalondelapo. Mwakonsha kupwisha kichika kitanshi kya kibaba pa kimye kitanshi kabiji ne kukesamba kichika kya bubiji pa kukabwelako. Inengezhai kutwajijila lufunjisho mu buku wa Baibolo Ufunjisha.
3 “Bintu Bilengela Kisemi kwikala kya Lusekelo”: Luno lubaji lunengezhiwa kimye kyonse panyuma ya kupitapo bañondo basatu, ke lwa kukwasha banabalume, banabakazhi ne bansemi bya kwingijisha mafunde a mu Baibolo kimye kyo batalañana na makatazho apwisha mutende mu kisemi. Kabiji mwakonsha kwingijisha bino bibaba kukwashishamo bantu babula Bakamonyi kwikala na maana atanwa mu Baibolo.—2 Timo. 3:16, 17.
4 Bibaba bya Bakyanyike: Kibaba kikalamo kya kuba’mba, “Kya Bakyanyike” ke kibaba kilengela ubena kwikitanga kulanguluka pa jishimikila ja mu Baibolo ne kuyuka kibena kwambiwapo. Mwakonsha kwingijisha bino bibaba kukwashishamo bakyanyike bo mutana mu mwingilo wenu kuyuka buneme buji mu kufunda Mambo a Lesa. (Sala. 119:9, 105) Pa kwisamba na bansemi, mwakonsha kwamba pa kibaba kya kuba’mba, “Funjishainga Baana Benu” kitanwa kimye kyonse mu magazini. Bino bibaba byakonsha kukwasha baana kufunjilako mafunjisho anema ku bantu batongolwa mu Baibolo. Nanchi muji na luno lunengezho lwa kutangila pamo bino bibaba na baana benu nyi?
5 Bibaba Bikwabo: Mu kibaba kikwabo kya kuba’mba “Bantu Batanga Magazini Etu Bepuzha’mba,” mwikala ne bwipuzho bwipuzha bantu babula Bakamonyi. Mwakonsha kwamba pa kino kibaba kimye kyo mubena kusha magazini ku nzubo ne nzubo. Kibaba kya kuba’mba, “Nkalata Kufuma . . . ” ke sawakya ye anemba muntu mwine kumwesha makatazho bamishonale ne bantu bakwabo o bapitamo pa kwingila mwingilo wabo. Bino bibaba byakonsha kukwasha bamwesha lusekelo kumona’mba mambo awama abena kusapwilwa ntanda yonse, mu kufikizhiwa kwa kiyukilo kya kwikalapo kwa Kilishitu.—Mat. 24:3, 14.
6 Kibaba kya kuba’mba, “Fwenyai Kwipi ne Lesa” kikala mu Kutanga Baibolo kwa mu Sukulu ya Mwingilo wa Lesa, kyakonsha kulengela bantu bakishinka kukeba kufunda byavula pe Yehoba. Kibaba kya kuba’mba, “Londai Lwitabilo Lwabo,” ke kya kukwasha bantu kufwanyikizha byaubilenga bantu baji mu mashimikila a mu Baibolo—bintu byo bafuukulanga, makatazho abo, lwitabilo lwabo—kumweka ku babena kwibitanga nobe bibena kubiwa pa kyokyo kimye.
7 Byo kituwaminapo kutambwilanga Kyamba kya Usopa kya kwingijisha mu bujimi! Twayai twibikengako bingi kuyuka bibaba byonse bikalamo ne kwikingijishanga bulongo mu mwingilo wetu.