Ku Batanga Magazini Etu

TUBENA kwimubulako namba kutendeka na ino magazini, kuji lupimpu lwaubiwa ku nembelo ya Kyamba kya Usopa. Saka tukyangye kulondolola luno lupimpu lwaubiwa, patanshi tukyambe pa bintu byabula kupimpulwa mu ino magazini.

Jizhina ja ino magazini ja kuba’mba Kyamba kya Usopa Kibena Kubijika Bufumu bwa Yehoba, kechi japimpulwa ne. Mu jino jishinda, Kyamba kya Usopa kikatwajijila kunemeka Yehoba aye Lesa wa kine kabiji ne kutekenesha bantu bonse bekitanga na mambo awama a Bufumu bwanji. Bibaba biji pa peja 5 kufika ku peja 9 ya ino magazini, byaamba pa buno Bufumu byo buji kabiji ne kimye kyo bukeya. Kunungapo, Kyamba kya Usopa kisakutwajijila kukosesha bantu kwikala na lwitabilo mwi Yesu Kilishitu, kutumbijika bukine bwa mu Baibolo, ne kulumbulula mwatala bintu bibena kubiwa panopantanda kwesakana na byaamba bungauzhi bwa mu Baibolo byonka byo kikelwa kuba myaka yonse.

Pano lupimpu ka lwaubiwa? Lekai tulumbulule bintu bimo bya lusekelo bisakwikalanga mu ino magazini ya Kikaonde inembwanga panyuma ya kupitapo bañondo basatu.a

Mu ino magazini musakwikalanga ne mitwe ikebewa kulangulukapo. Kibaba kya kuba’mba, “Mwayuka Nyi?” kisakwambanga pa mabulañano abena kulumbulula bintu bimo byashimikizhiwa mu Baibolo byo byajinga. Kibaba kya kuba’mba, “Fwenyai Kwipi ne Lesa” kisakulumbululanga byo twakonsha kufunda pe Yehoba kufuma mu bibaba bimo bya mu Baibolo. Kibaba kya kuba’mba, “Bantu Batanga Magazini Etu Bepuzha’mba” kyambanga pa mikumbu ya mepuzho a mu Baibolo o bepuzha bantu bavula. Kya kumwenako, bantu bavula bepuzha’mba “Nanchi Bufumu bwa Lesa buji mu muchima wa muntu nyi?” Musakutana mukumbu wa buno bwipuzho pa peja 13.

Bibaba byavula bisakwikalangamo byanengezhiwa kukwasha bisemi. Kibaba kya kuba’mba, “Bintu Bilengela Kisemi Kwikala kya Lusekelo,” kikambanga pa makatazho atanwa mu bisemi ne kumwesha mafunde a mu Baibolo byo akonsha kukwasha kwiapwisha. Kibaba kya kuba’mba “Funjishainga Baana Benu,” kikalanga kya bansemi kyo bafwainwa kutangilanga pamo na baana babo. “Kibaba kya Bakyanyike” kikwabo ke kya kwibakwasha kwikala na mwingilo wa kutanga Baibolo.

Kukekalanga ne bibaba bikwabo bicheche bikanembwanga mu ino magazini inembwanga panyuma ya kupitapo bañondo basatu. Kibaba kya kuba’mba “Londai Lwitabilo Lwabo” kitutundaikanga kuba byaubilepo muntu umo waambiwa mu Baibolo. Kya kumwenako, pa peja 18 kufika ku peja 21 ya ino magazini, musakutangapo jishimikila jawama bingi ja ngauzhi Elaija kabiji ne kufunda byo twakonsha kulonda lwitabilo lwanji. Kibaba kya kuba’mba “Nkalata Kufuma . . .” kyambanga pa jishimikila kufuma ku bamishonale ne ku bakwabotu baji mu mapunzha apusana pusana mwaya ntanda. Kibaba kya kuba’mba “Byo Tufunjilako kwi Yesu” kyambanga pa mafunjisho atanshi a mu Baibolo mu jishinda japela.

Twaketekela kuba’mba Kyamba kya Usopa basakwikitemwanga bingi bantu bonse banemeka Baibolo bakeba kuyuka uno buku kine byo afunjisha. Twaketekela namba ino magazini isakwimukwashanga kupwisha kilaka kyenu kya kukeba kuyuka bukine bwa mu Baibolo.

BANEMBI

[Tubyambo twa mushi]