Lupimpu Lwawama Lwaubiwa ku Kyamba kya Usopa!

¹ Ku ntendekelo ya uno mwaka, bipwilo byatambwijile kya kubijika kisangajika kya kuba’mba: Kutendeka mu January 2008, Kyamba kya Usopa kikanembelwanga mubiji, kimo kikekala kya kusha mu bujimi, kikwabo kya balongo betu bena Kilishitu bonkatu! Apo kampe mubena kuzhinauka’mba: ‘Pano nga ano magazini abiji akapusana byepi? Buwame ka buji mu kwikala na magazini apusana? Nanchi mu ano magazini mukekalanga ne mbaji yakatataka nyi?’

² Lupusano Lukekalapo: Kyamba kya Usopa kya Kusha mu Bujimi kikafumanga panyuma ya kupitapo bañondo basatu. Mitwe yonse ya mu ino magazini ikekalanga ya bena kengi. Kikwabo kikafumanga pa ñondo pa ñondo kabiji kikatelwanga’mba kya Kufundamo. Kino kechi kikekala kya kusha mu mwingilo wa mu bujimi ne. Kikekalanga na mitwe yonse ya kufunda mu ñondo umo kubikapotu ne mitwe ikwabo yawama ya bena Kilishitu bepana. Kyamba kya Usopa kya Kusha mu Bujimi kechi kikakwashangatu Bakamonyi bonka ne, bino kikatakata kikakwashanga ne babula Bakamonyi bakamweshanga lusekelo lwa kukeba kufunda Baibolo. Pano bino, Loleni! ukanembelwanga bantu bonse, kuvwangakotu ne bantu baluzhinauko kabiji ne boba bamba’mba kechi bena Kilishitu ne.

³ Buwame Bukekalapo: Mu Kyamba kya Kufundamo kechi kikakebewanga kulumbulula byambo nabiji “painiya” kuba’mba bantu babula Bakamonyi bomvwishe mwatala bino byambo ne. Mu ino magazini mukekalanga ne byambo byanengela bikanengezhiwanga kukwasha kikatakata Bakamonyi ba kwa Yehoba ne boba bafunda Baibolo babena kukomenako ku mupashi. Nga Kyamba kya Kusha mu Bujimi kikekalanga byepi? Byo kiji kuba’mba mitwe yasalwa ne jishinda ja kunembelamo bikanengezhiwanga na mulanguluko wa kukwasha bena kengi, muntu wabula Kamonyi ukamwenangamo bingi mu kutanga magazini yense kufuma ku ntendekelo kufika ne kwakapela. Nangwa byonkabyo, Bakamonyi ba kwa Yehoba nabo bakamwenangamo bingi mu kutanga magazini onse abiji. Na mambo a kuba’mba tukashilanga bantu Kyamba kya Usopa kimo pamo na Loleni! umo mu mwingilo wa mu bujimi pa ñondo pa ñondo, tukayukishanga bulongo mashinda a kushilamo magazini mu ñondo yense.

⁴ Mbaji Yakatataka: Mbaji imo yawama yakatataka yalangulukwapo kwikala mu Kyamba kya Usopa kya Kusha mu Bujimi. Lubaji lumo lukambanga pa mafunjisho atanshi a mu Binembelo mu ñambilo yapela kumvwa. Lubaji lukwabo lukamweshanga Baibolo byo akonsha kukwasha bisemi. Bibaba bya kufunda Baibolo bikanembelwanga kukwasha bakyanyike. Ano magazini onse a kusha mu bujimi akekalanga na mutwe ukambanga pa bibaba bimo bya mu Baibolo biketufunjishanga pa mambo a byubilo bya Yehoba.

⁵ Tubena kulomba Yehoba kupesha luno lunengezho lwa katataka lwa Kyamba kya Usopa. Mwane lekai ano magazini pamo ne Loleni! akafike ku bantu bavula bafwainwa mambo awama.—Mat. 10:11.