Kyamba kya Usopa kya Katataka kya Kizungu Kyapela Kumvwa
TWI balusekelo bingi kwimubulako pa mambo a Kyamba kya Usopa kitanshi kya kisungu kyo bapezhako kumvwa. Tukeseka kwingijisha kino Kyamba kya Usopa kya katataka pa mwaka umo kabiji inge kyaingila bulongo kikatwajijila kunembwa. Kikekala na mitwe ya kufundamo ne mitwetu ikwabo umvwe kwaikala mpunzha. Twaketekela kuba’mba kino kikakwasha Bakamonyi ba kwa Yehoba bavula ku mupashi. Mambo ka?
Kizungu ke mulaka wambiwa bingi na balongo bavula mu byalo nabiji Fiji, Ghana, Kenya, Liberia, Nigeria, Papua New Guinea ne Solomon Islands. Nangwa kya kuba balongo betu mu bino byalo bakonsha kwamba mu milaka yabo, bino javula bengijisha kizungu pa kupwila kwa kipwilo ne mu mwingilo wa mu bujimi. Nangwa byonkabyo, kizungu kyo bengijisha kyapela kukila kyokya kiji mu mabuku etu a kizungu. Kabiji kuji bantu bakwabo ba Yehoba bavilukila mu byalo bingi ko bengijisha kizungu nangwa kya kuba kechi bekiyukisha ne. Kunungapo, kafwako bipwilo bingijisha mulaka wabo ne.
Bibaba byo tufunda pa mulungu pa mulungu kufuma mu Kyamba kya Usopa kya kufundamo, ke jishinda jine jo tutambwilamo kajo ka ku mupashi pa kimye pafwainwa. Onkao mambo, pa kuba’mba bonse mu luonde bamwenengamo mu kano kajo, Kyamba kya Usopa kya katataka kya Kizungu bekinembela mu jishinda japeela kumvwa. Kino Kyamba kya Usopa kya katataka kikekala na nkupiko yapusanako. Tumitwe tucheche, mafuka, mepuzho a kupitulukamo ne bipikichala biji mu bibaba bya kufundamo bikekalatu pamo na byobya biji mu Kyamba kya Usopa kinembwa kimye kyonse. Kino kikalengela bonse bakengijishanga Kyamba kya Usopa kya kala ne kya katataka kukumbulapo pa lufunjisho. Pa kuba’mba tuyuke lupusano lujipo mu ano magazini abiji, monai kyakumwenako panshipo kiji ne mu jifuka 2 mu kibaba kitanshi kya kufundamo kiji mu uno magazini.
Twaketekela kuba’mba luno lunengezho lwa katataka lukakumbula milombelo ya bantu bavula baamba kwi Yehoba amba: ‘Mpai maana namba, mfunde mikambizho yenu.’ (Sala. 119:73) Kabiji twaketekela’mba aba babula kuyukisha mulaka wa Kizungu kubikapotu ne baana bamo bakanengezhanga bulongo Kyamba kya Usopa kya kufundamo pa mulungu pa mulungu. Yehoba ‘watemwa balongo betu bonse’ kabiji tubena kumusanchila bingi kuba’mba ubena kwingijisha ‘kalume wakishinka kabiji wa maana’ kwitupa kajo ka ku mupashi pa kimye pafwainwa.—1 Pe. 2:17; Mat. 24:45.
Jibumba Jitangijila ja Bakamonyi ba kwa Yehoba