Kyamba Kya Usopa Kya Kufundamo kya Katataka

INO magazini yo mubena kutanga kyo Kyamba kya Usopa kitanshi kya kufundamo. Twakeba namba tulumbulule bulongo mitwe imo ikalanga mu ino magazini ya katataka.

Ino magazini ya kufundamo yanembelwa Bakamonyi ba kwa Yehoba ne boba bafunda Baibolo babena kununguluka bulongo. Inembwanga jimo pa ñondo kabiji ikalanga na mitwe ya kufundamo ina nangwa itanu. Mutanchi wa mitwe ya kufundamo unembwanga pa nkupiko ya ino magazini. Kupusanako na Kyamba kya Usopa kya kusha mu bujimi, ino magazini ya kufundamo kechi ikalanga na bipikichala byapusana pusana pa nkupiko ne, mambo kechi ishajikwanga mu mwingilo wa mu bujimi ne.

Pa peja 2 ya ino magazini, paji byambo bya kwimukwasha kuyuka biji mu mutwe umo umo wa kufundamo nangwa pa mitwe yalondankana ibena kwamba pa kintutu kimo kabiji ne mutanchi wa mitwe ikwabo. Aba batangijila lufunjisho lwa Kyamba kya Usopa bino byambo bibakwashanga bingi pa kunengezha mitwe ya kufunda ku kipwilo.

Mitwe ya kufunda yaipipako kukila byo yajinga kala. Kino kikwashangako kwikala na kimye kyabaya kya kutanga binembelo bibena kutundaika lufunjisho pa Kufunda Kyamba kya Usopa. Twimutundaika kuba’mba mutangenga binembelo byonse byamweshiwa mulungu ne mulungu. Binembelo bimo byamweshiwa byanembwapo amba “tangai,” bino byafwainwa kutangiwa ne kwisambapo kimye kya Kufunda Kyamba kya Usopa. Binembelo bikwabo nabyo byakonsha kutangiwa umvwe kimye ko kiji. Mu mitwe imo, mutanangamo binembelo panembwa’mba “esakanyaiko.” Byo kiji kuba’mba bino binembelo kechi byaamba mu kushinkamika pa bishinka biji mu palagalafu ne, javula kechi bitangiwanga kimye kya kupwila ne. Nangwa byonkabyo, bino binembelo panembwa’mba “esakanyaiko” muji bishinka byanema bingi, nangwa kimo kimye byakonsha kwikalako na bishinka byatundaikako pacheche bishinka bibena kwambiwapo. Twimutundaika kuba’mba nabyo mwibitangenga kimye kyo mubena kunengezha Kufunda Kyamba kya Usopa. Kampe mwakonsha kwambapo bino bishinka pa kukumbulapo.

Sawakya wa pa mwaka kechi unembwanga mu Kyamba kya Usopa ne. Kutendeka mu 2008, unembwanga mu kyamukachi kya Mwingilo Wetu wa Bufumu ne mu Yearbook. Byonka byo kyaambiwapo kala, mu magazini ya kufundamo mwikalanga ne mitwe ikwabo. Nangwa kya kuba ino mitwe yavula kechi ikesambiwangapo kimye kya kupwila ne, bino mwatundaikwa kwiitanganga bulongo. Nayo ke kajo ka ku mupashi kanengezhiwa na ‘kalume wa kishinka ne wa maana.’—Mat. 24:45-47.

Kyapelako, Kyamba kya Usopa kya kufundamo ne kya kusha mu bujimi kechi ke magazini abiji apusenamo ne. Onse abiji ke Kyamba kya Usopa Kibena Kubijika Bufumu bwa Yehoba. Onse abiji pa peja 2 paji palagalafu intutu imo yalondolola nkebelo ya Kyamba kya Usopa. Ku mpelo ya mwaka, onse abiji akabikwa pamo ne kulengamo buku umo. Kabiji bishinka bya mu ano magazini onse abiji bitanwanga ne mu mutwe waamba’mba “Nanchi Mukivuluka Nyi?” monka mu Kyamba kya Usopa kya kufundamo.

Kufumatu mu 1879, kupita mu bimye bya makondo, bwikalo kushupa, ne lumanamo, Kyamba kya Usopa kyatwajijila na kubijika bukine bwa Bufumu bwa Lesa. Twalomba namba na mapesho a Yehoba, kisakutwajijila kubanga byonkabye mu ino nembelo ya katataka. Kabiji twalomba kuba’mba Yehoba emupeshe anweba mutanga byo musakwingijishanga Kyamba kya Usopa kya kufundamo kya katataka.