Kintu kyo Babena Kulomba Bantu Bonse Panopantanda

FWANYIKIZHAI kuba’mba bantu bakukankalwa kubala babena kulomba kintutu kimo. Babena kulomba ntangi mwine wakila mu kulengwa konse kwibapa kintu kyo babena kukeba. Bino nangwa byonkabyo, bantutu bacheche mwi abo bo bayuka kino kintu kyo babena kulomba. Nanchi kintu kya uno mutundu kine kyakonsha kubiwa nyi? Kino kintu kyubiwa moba onse. Ki ka bano bantu bonse kyo babena kulomba? Babena kulomba Bufumu bwa Lesa amba bufike!

Kwesakana na kupesapesa kumo, kyatanyiwe kuba’mba kuji mabupopweshi nobe 37,000 atelwa’mba a bwina Kilishitu aketekela mwi Yesu Kilishitu kwikala Ntangi wabo. Mu ano mabupopweshi onse muji bantu bakila pa mabilyonyi abiji. Bavula ba mwi abo balomba lulombelo lutelwa javula’mba Tata Wetu nangwa’mba Lulombelo lwa Nkambo. Nanchi luno lulombelo mwiluyuka nyi? Byonka Yesu byo ebafunjishe baana banji ba bwanga, lutendeka bino amba: “Tata wetu wa mwiulu, Jizhina jenu jizhile. Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.”—Mateo 6:9, 10.

Pa myaka yavula yapitapo bino byambo byabwezhiwa bwezhiwapo javula bingi mu mushingi na bapopweshi mu machechi abo. Bebyamba ne mu kisemi, nangwa pa bunke bwabotu mu bimye byawama nangwa mu bimye byatama. Bino byambo bebyamba kufuma panshi ya michima yabo. Bavula bebisungilatu ku mutwe kabiji bebyambatu kwa kubula ne kuyuka nangwa kuyukisha mo byatala ne. Bano bantu ba mu Kilishitendomu kechi bo bonkatu baketekala mu Bufumu bwa Lesa kabiji ne kulomba’mba bufike ne.

Luno Lulombelo Luji ne mu Bupopweshi Bwabula bwa Bwina Kilishitu

Mu bupopweshi bwa Bayudea, muji lulombelo lwayukanyikwa bingi lutelwa’mba Kaddishi lulombewa mu nshinagoga nangwa pa majila. Nangwa kya kuba byambo bijiimo kechi bya lufu nangwa bya bulanda ne, javula luno lulombelo lulombewa mu kimye muntu kyoafwisha mutemwe wanji. Balomba’mba: “Mwane [Lesa] ekajike Bufumu bwanji bukiji . . . mu kimye kya bumi bwenu.”a Lulombelo lukwabo lwa kala lwa lombewanga mu nshinagoga lwaamba pa kwikala na luketekelo mu Bufumu bwa Mesiasa wafumine mu nzubo ya Davida.

Bantu bakwabo babula mu bupopweshi bwa bwina Kilishitu batana kuba’mba mulanguluko wa Bufumu bwa Lesa wibatokela bingi ku muchima. Kwesakana na pepala wa byambo wa The Times of India, kinemanga wa mu myaka kitota kya bu 19, aye ntangi wa bupopweshi bwa bena India wakebelenga kuyuka kintu kimo kijipo mu bupopweshi bwa Bahindu, Bamozilemu kabiji ne mu bwa bena Kilishitu waambile’mba: “Bufumu bwa Lesa bwa kine kechi bukeya ne, poso ba ku musela ne ba ku muzhika bakatwatankene pamo.” Kabiji mufunjishi kata wamukazhi wa pa koleji mu muzhi wa Strathfield mu kyalo kya Australia wanembejile banembeshi ba pepala wa byambo amba: “Byonka biji ba Mozilemu bonse, naketekela namba Yesu ukabwela ne kwikajika Bufumu bwa Lesa.”

Kwa kubula nangwa kuzhinaukatu ne, aba bonse baketekela mu Bufumu bwa Lesa ne kwibulomba bavula bingi. Pano akilangulukapo pa kino kishinka kyawama bingi.

Apo kampe mwayuka’mba atweba Bakamonyi ba kwa Yehoba, banemba ino magazini, tuya ku nzubo ne nzubo mu bimasamasa na kwisamba na bantu pa mambo a Baibolo. Luno lo tubena kwamba, tubena kwingila uno mwingilo mwaya ntanda yonse mu byalo 236 mu milaka kukila pa 400. Bufumu bwa Lesa kyo kine kishina kya busapwishi bwetu. Ne mutwe wa ino magazini ke wa kuba’mba Kyamba kya Usopa Kibena Kubijika Bufumu bwa Yehoba. Javula twipuzha bantu kana balomba buno Bufumu nangwa ne. Bavula bakumbula’mba, ee. Pano bino, umvwe twibepuzha’mba buno Bufumu bo bu ka, bavula bakumbula’mba “kechi nayuka ne.” Kimye kimo mikumbu yabo kechi yumvwanyika ne kumvwanyikatu ne.

Mambo ka bantu bavula o balombela kintu kyo babula kuyuka? Abya na mambo a kuba’mba Bufumu bwa Lesa kechi bwayukanyikwa nenyi? Ine. Bufumu bwa Lesa bwalumbululwa bingi bulongo mu Baibolo. Kunungapo, byambo bya mu Baibolo pa mambo a Bufumu byakonsha kwimulengela kwikala na luketekelo lwa kine mu ino ntanda ya malwa. Mu kibaba kyalondelapo, tusakumona Baibolo byo alondolola luno luketekelo. Apa bino tumone kimye kikakumbwilwamo lulombelo lwa Yesu lwa pa mambo a Bufumu.

[Tubyambo twa mushi]