Bufumu Bwa Lesa bo bu Ka?

BUSAPWISHI bwa Yesu bwajinga na ñanyi kishina? Kwesakana na mwine Yesu, kyajinga Bufumu bwa Lesa. (Luka 4:43) Byo aambilenga ku bantu, bamumvwinenga kasa atongola Bufumu javula. Nanchi bakuminye nyi? Abya bamwipwizhepo pa buno Bufumu byo buji nyi? Ine. Mashimikila a Mambo awama kechi atongolapo mepuzho a uno mutundu ne. Nanchi Bufumu bwa Lesa bwayukanyikilwe ku bano bantu nyi?

Kishinka ke kya kuba’mba, Binembelo bya ku kala byo banemekele bingi Bayudea amba byazhila, byalumbulwile buno Bufumu, kabiji ne kwambatu kipasu byo buji ne byo bukoba. Lelo jino, ne atweba twakonsha kufunda byavula bingi pa mambo a buno Bufumu byonka byaubile Bayudea kupichila mu kutanga Baibolo. Twayai twisambepo pa bishinka bitanu na bibiji Baibolo byo etufunjisha pa mambo a buno Bufumu. Bayudea ba mu moba a Yesu ne boba bajingako saka akyangye kwiya panopantanda, bayukileko bishinka bitanshi bisatu. Bikwabo bisatu byalondelapo Kilishitu mwine nangwa batumwa banji bo bebisolwele mu myaka kitota kitanshi. Aki kyapelako kyaiya kuyukanyikwa mu ano moba etu.

1. Bufumu bwa Lesa ke kafulumende wa kine, ukekala myaka ne myaka. Bungauzhi butanshi bwa mu Baibolo bwasolwele kuba’mba Lesa ukatuma mupokolweshi wa kupokolola bantu bakishinka. Byo atelwa’mba ‘lukunwa,’ ukafumyapo makatazho onse aishileko na mambo a bunsatuki bwa ba Adama, Evwa ne Satana. (Ntendekelo 3:15) Byo papichile myaka nobe kajo, Mfumu wakishinka aye Davida bamubujile bintu bya lusekelo bingi pa mambo a uno ‘lukunwa’ nangwa’mba Mesiasa. Ukekala Mfumu wa buno Bufumu. Buno Bufumu bwapusana bingi na bufumu bukwabo bwashala, mambo abo bukekala myaka ne myaka.—2 Samwela 7:12-14.

2. Bufumu bwa Lesa bukafumyapo makafulumende a bantu. Ngauzhi Danyela wapewe kimwesho mo amwene bufumu bukatampe bwalondakenenga mu bwikalo bonse bwa bantu kufikatu ne buji lelo. Akimonai mpelo ya lusekelo ya kyokya kimwesho: “Mu moba a boba bamfumu [ba bumuntu bakapelako] aye Lesa wa mwiulu ukaleta bufumu bo bakabula konauna myaka ne myaka, nangwa pachechetu ne, kabiji abwa bufumu kechi bakebupana ku mutundu ungi ne. Kabiji bukalalaula buno bufumu bonse ne kwibupwishatu shata! Pa kuba abo bukekala myaka ne myaka.” Onkao mambo, bufumu nangwa’mba makafulumende onse a panopantanda—kubikapotu ne makondo abo, lumanyiko ne bubi bwabo—bikonaunwa kabiji kechi bikekalako jibiji ne. Byonka byaamba bungauzhi bwa kwa Danyela, Bufumu bwa Lesa bukumotu bukalamenga panopantanda ponse. (Danyela 2:44, 45) Buno Bufumu bwa kine kabiji bo bonkatu bukekalako.a

3. Bufumu bwa Lesa bukapwisha makondo, bikola, bipowe bya nzala ne lufu. Bungauzhi bwa mu Baibolo busangajika bwatongola bintu byo bukoba Bufumu bwa Lesa panopantanda. Abwe Bufumu bukoba bintu byakankalwa nangwa bikabula kuba makafulumende a bantu. Akifwanyikizhai—bilwilo bya nkondo byonse bakebyonauna kabiji kechi bikekalako jibiji ne! “Aye upwisha makondo ne kwapela ntanda.” (Salamo 46:9) Badokotala, bipatela nangwa bikola biji byonse kechi bikekalako jibiji ne. “Kafwako nangwa umo wikala mu yewa muzhi ukamba’mba: Nakolwa, ne.” (Isaya 33:24) Kechi kukekala jibiji bipowe bya nzala, kukepelwa kwa kajo, buuse, kuyanda nangwa kufwa na nzala ne. “Kukekalanga kuvula bingi kwa kajo panopantanda.” (Salamo 72:16) Kechi mukekala jibiji bijilo, kulaala pa majila, bilende, mamochale nangwa kuyanda kuji konse kwikalapo na mambo a lufu ne. Lufu, aye mulwanyi wetu witupampata bakamonauna. Lesa “ukamina lufu kya kuba’mba kechi lukekalapo jibiji ne, kabiji ukashimuna mipolo ku meso a bantu bonse.”—Isaya 25:8.

4. Bufumu bwa Lesa buji na Kalama wasalwa na Lesa. Mesiasa kechi witongwele aye mwine nangwa kutongolwa na bantu bandengamambo ne. Watongolwa na Yehoba Lesa mwine. Jizhina ja mushingi ja Mesiasa ne ja kuba’mba Kilishitu jilumbulula’mba watongolwa na Lesa. Mu milaka ine itanshi, bino byambo byonse bibiji bilumbulula’mba “Mushingwa.” Onkao mambo, uno Mfumu washingwa nangwa’mba watongolwa kwi Yehoba kwingila uno mwingilo wiikajila. Lesa waambile pe aye amba: “Talai wa mwingilo wami, ye nalama, ye nasalulula, mo amwena lusekelo muchima wami; nabika Mupashi wami pe aye, kabiji ukaleta buchibamambo bwaoloka ku mikoka ya bantu.” (Isaya 42:1; Mateo 12:17, 18) Mulenga wetu ye wayuka bulongo Kalama ye tukeba.

5. Kalama wa Bufumu bwa Lesa wamwesha buneme bwanji ku bantu bonse. Yesu wa ku Nazala wimwesheshe amba ye Mesiasa walayilwe. Wasemekejilwe mu kisemi kyoasajile Lesa. (Ntendekelo 22:18; 1 Byambo bya Moba 17:11; Mateo 1:1) Byo ajinga panopantanda, wafikizhe bungauzhi bwavula bwanembelwe kala bwaambilenga pe Mesiasa. Kabiji bamuyukanyikishe kufuma ne mwiulu amba Mesiasa. Mu ñanyi jishinda? Lesa waambile kufuma mwiulu, kumuyukanyikisha’mba Mwananji; bamalaika nabo bamutongwele Yesu amba ye Mesiasa walayilwe; kabiji Yesu waubilenga bya kukumya ku meso a bantu—bino byonse wibyubilenga na bulume bwa Lesa.b Yesu wamwesheshenga javula byo akekala Kalama. Kechi wajingatu na bulume bwa kukwasha bantu ne, bino wakebeshenga kwibakwasha. (Mateo 8:1-3) Watemenwe bantu, wajinga wa lusa, wachinchika kabiji wikepesha. Jishimikila ja bintu byo aubile panopantanda jiji mu Baibolo kuba’mba bonse bejitangenga.

6. Bufumu bwa Lesa buji na ba 144,000 bakalamanga pamo ne Kilishitu. Yesu waambile’mba bantu bakwabo kuvwangakotu ne batumwa banji bakalamanga nanji mwiulu. Watelele jino jibumba’mba “kajitanga kacheche.” (Luka 12:32) Palutwe kacheche mutumwa Yoano bamubujile’mba kano kajitanga kacheche kakekala na bantu 144,000. Bakekala na mwingilo usangajika bingi mwiulu, wa kulama pamo ne Kilishitu kwikala bamfumu ne bañanga.—Lumwekesho 5:9, 10; 14:1, 3.

7. Bufumu bwa Lesa bubena kulama mwiulu, kabiji bwinengezha kutatula kulama panopantanda ponse. Kino kishinka kyapelako ke kishinka kimo pa bishinka bikatampe byo twafwainwa kufunda. Baibolo witupa bishiino byavula bya kuba’mba Yesu wapewa lūsa lwa kwikala Mfumu wa mwiulu. Pa kino kimye ubena kulama mwiulu, kabiji katatakatu akatendeke kulama panopantanda ponse ne kufikizha bungauzhi bo twaambapo kala. Pano twakonsha kusumininwa byepi’mba Bufumu bwa Lesa bubena kulama? Kabiji bukatendeka kimye ka kulama panopantanda?

[Tubyambo twa mushi]