Maana ‘Apela Kwiamona’
1. Mambo ka bantu bamo o kibakatezha kufunda?
1 Solomone waambile’mba: ‘Maana apela kwiamona.’ Nangwa byonkabyo, bavula kibashupa bingi kufunda. Nangwa kya kuba tukeba kuyuka bintu bipya, bamo kibashupa bingi kwikalapo na kimye ne lutundaiko lwa kukeba kufunda ne kupesapesa. Kyanema bingi kwikalapo na kimye kya kulangulukapo pa bintu “bine byazhika bya Lesa” biji mu mabuku etu.—Mana. 14:6; 1 Ko. 2:10.
2. Ki ka kikebewa pa kuba’mba twikale na ‘maana a kuyuka bintu ne a kwibipima’?
2 Mwakonsha kwamba’mba, ‘Solomone kyamupelejile mambo bamukwashishenga kwi Lesa!’ Ee ibyo, Lesa wamupele Solomone ‘muchima wa maana ne wa milangwe.’ (1 Mfu. 3:12) Pano bino, Solomone wibikileko bingi kukeba kuyukisha bulongo mashinda a Yehoba. Waambile’mba, ‘Natesheshe muchima wami mu kukeba ne kupalanguzha maana.’ (Sapwi. 1:13) Yehoba wamubijile bibusa na mambo a uno muchima wa kukeba kufunda. Ibyo kuba’mba Solomone kyamupelejile bingi, pano bino ne atweba twakonsha kwikala na ‘maana a kuyuka bintu ne a kwibipima’ umvwe twaikala na muchima wawama ne mutanchi walumbuluka bulongo ne na bukwasho bwa Lesa.—Mana. 1:4; 2:6.
3. Ki ka kimukwasha kwikala na mutanchi wawama wa kufunda?
3 Ikalai na Mutanchi: Mutumwa Paulo wakambizhe bena Kilishitu bakwabo ‘kwendela monka mu [mutanchi].’ (Fili. 3:16) Mutanchi nangwa’mba jishinda ja kubilamo bintu jikwasha bingi mu mbaji yavula ya bwikalo nabiji kuyuka kimye kya kufunjilamo ne bintu bya kufunda. Bavula bekimona’mba kubika Baibolo ne mabuku a kufundamo pepi, kibavululako kukeba kufunda. Kwikala na kimye kya kufunjilamo nabiji lukelokelo nangwa mabanga kikwasha bamo kumona’mba babena ‘kupulushako bimye’ bya kufunjilamo.—Efi. 5:16.
4. Bya kwituvululako ka byakonsha kwitukwasha pa kunengezha lufunjisho lwa buku lwa Kipwilo?
4 Tangai, Bwelulukaimo ne Kuvuluka: Twayai tumone bya kwituvululako bimo bya byo twakonsha kufunda mabuku engijishiwa pa lufunjisho lwa buku lwa Kipwilo. Patanshi akimonai kibese kisakufunjiwa. Javula bibese bya kufunda bitanchikwa mu Mwingilo Wetu wa Bufumu. Kya bubiji, akitalatalai biji byobyo byambo byo musakufunda. Umvwe tubena kufunda mabuku abena kulondolola kyepelo kimo kimo kya buku wa mu Baibolo, twafwainwa kutanga byobyo byepelo bisakufunjiwa. Kino kiketulengela kuyuka byobyo binembelo byo tusakufunda. Umvwe tubena kufunda mabuku nabiji buku wa Icaba Inkaama Ku Nsansa Sha Lupwa nangwa wa Fwenyai Kwipi ne Yehoba, kyakonsha kwitukwasha bingi inge twatanga binembelo biji mu kabokoshi ka kubwelulukamo nangwa’mba kabokoshi ka lufunjisho kaji ku mpelo ya kitango kyonse.
5. Bintu ka bansemi ne bakulumpe ba lufunjisho lwa buku lwa Kipwilo byo bafwainwa kuba kabiji mambo ka?
5 Byo mubena kutalatala mu mapalagalafu o musakufunda, monai tumitwe twatucheche, tubokoshi muji byambo, ne bikwabotu pa kuba’mba muyukileko jimo biji mu lolo lufunjisho. Bansemi ne Bakulumpe ba Lufunjisho lwa Buku lwa Kipwilo bakakeba kwambapo pa bya kumwenako ne bipikichala kabiji ne bintutu bikwabo bya kufunjishishamo. Kwambapo pa bino bintu kukakwasha bakyanyike ne boba babula kuyukisha kutanga kumvwisha.
6. Bintu ka byo twafwainwa kuba pa kuba’mba kitupelelengako kukumbula?
6 Abya mwakonsha kukumbula mikumbu yaumvwanyika bulongo nyi? Bamo bekimona’mba kikwasha bingi kukitangilamo jimo mu byobyo byambo byo basakufunda, apa bino kebengijishe mepuzho ajimo kushila bishinka bikatampe biji mu mapalagalafu onse. Kunengezhezha jimo kukemukwasha kubula kwikala na moyo wa kwamba kabiji kikemupelela bingi kukumbulapo pa lufunjisho lwa buku lwa Kipwilo. Kino kikemufweta bingi.
7. (a) Mambo ka o mwalangulukila’mba kikwasha bingi kubwelulukamo ku mpelo ya lufunjisho lwa byambo byo mwafunda? (b) Mambo ka o kiletela lusekelo ne kulengela lufunjisho kuwama inge kemubuleko bakwenu bintu byo mubena kufunda?
7 Ku mpelo ya lufunjisho lwenu, bwelulukaimo mu tumitwe twatucheche, mu bipikichala ne mu bintutu bikwabo bya kufunjishishamo mumone inge mukivuluka bibese byonse. Esekai kwesakanya bintu byo mwafunda ku bintu byo mwayukila jimo kabiji ne byo mwapitamo. Po po mukatendeka kumvwisha bishinka ne milanguluko ya mu Binembelo. Na mushingi, bulaiko ba mu kisemi kyenu, bakwenu ne bakwabotu bintu byo mubena kufunda. Mu kupita kwa kimye bino bintu byo mwayuka bikemulengela kwikala ba maana. Kepo na bukwasho bwa Yehoba mukamona’mba ‘maana apela kwiamona’ byonka byo kyajinga kwi Solomone.—Mana. 14:6.