Mitwe ya Katataka Ikekalanga mu Kyamba kya Usopa

Pa Kibelushi kitanshi mu ñondo twaingijishanga kibaba kya mu Kyamba kya Usopa kya kuba’mba, “Fundainga Mambo a Lesa” kutendekelamo mafunjisho a Baibolo. Kutendeka mu January, pa bino bibaba bapingizhapo kibaba kya kuba’mba, “Mepuzho a mu Baibolo a Kumbulwa,” kikekalanga pa jipa ja kunyuma ya Kyamba kya Usopa kya bena kengi. Twakonsha kwingijisha kibaba kya kuba’mba, “Mepuzho a mu Baibolo a Kumbulwa,” byonkatu byo twaingijishanga kibaba kya kuba’mba, “Fundainga Mambo a Lesa.” (km 12/10 p. 2) Byonkatu byo kyaikalanga kunyuma kwe, mu Mwingilo Wetu wa Bufumu mukekalanga mashinda a kwisambilamo na bantu o tukengijishanga pa Kibelushi kitanshi mu ñondo.