Bomutwajila Magazini—Kyapela Kutendeka Kufunda Nabo Baibolo
1. Kufumatu ne ku kala, mambo ka jibumba ja Yehoba o jitundaikila basapwishi kwikala na bantu bo batwajila magazini?
1 Bantu bavula kechi batemwa kufunda Baibolo ne atweba ne, bino bomvwa bingi bulongo kutanga magazini etu. Na mambo a bino, jibumba ja Yehoba jitundaika basapwishi kwikala na bantu bo batwajila magazini jonse. Bantu batanga magazini etu kimye kyonse, bekala na mujojo wa kukeba kumvwa Mambo a Lesa. (1 Pe. 2:2) Mu kuya kwa moba, bintu byo batanga byakonsha kwibafika pa muchima ne kwibalengela kukeba kufunda Baibolo.
2. Twakonsha kulengela byepi bo tutwajila magazini kwikala na kizaku kya kukeba kufunda?
2 Tekezhainga Nkunwa ya Bukine: Mu kifulo kya kwibapangatu magazini bena nzubo ne kuya, isambaiko nabo pacheche ne kulenga bulunda. Kuba bino kukemukwasha kuyuka biji bwikalo bwanji, byo atemwa, byo aitabilamo abyo bikemulengela kuyuka mwa kwisambila nanji. (Mana 16:23) Inengezhainga saka mukyangye kuya. Inge kyakonsheka, ambaipo kishinka kimo ne kinembelo kiji mu magazini pa kuba’mba mutekezhe nkunwa ya bukine iji mu muchima. (1 Ko. 3:6) Nembai juba jo mwayako, buku ye mwasha, mutwe, ne binembelo byo mwisambapo.
3. Twafwainwa kubwelako bimye binga ku bantu bo tutwajila magazini?
3 Twafwainwa Kubwelako Bimye Binga? Mwafwainwa kubwelako pa ñondo jimo ponka pa kutwala magazini akatataka. Nangwa byonkabyo, umvwe ye tutwajila magazini watemwa kufunda kabiji tuji na kimye kya kuyako, twakonsha kuyako pa bimye byavula. Inge papita mulungu umo nangwa ibiji kufuma po mwashijile magazini, mwakonsha kubwelako ne kwamba’mba, “Naji kwiya namba twisambeko pacheche pa kishinka kimo kiji mu magazini o nemushijile.” Kuba bino, kukebalengela kukeba kutanga yewo mutwe uji mu magazini. Umvwe kya kuba watanga kala kyo kyo kibaba, twakonsha kumushikisha byo alangulukilenga pa uno mutwe ne kwisambako nanji pacheche. Umvwe watemwa kutanga mabuku etu, mwakonsha kubwelako ne kumumwesha talakiti, buloshuwa, nangwa buku ye tubena kusha mu yewo ñondo.
4. Twafwainwa kuba byepi pa kuba’mba tuyuke bo tutwajila magazini umvwe bakonsha kukeba kufunda Baibolo?
4 Kechi mwafwainwa kupembelela mwina nzubo kwimubula kuba’mba nkeba kufunda Baibolo ne. Tendekelaipo anweba. Nangwa kya kuba ukana kufunda Baibolo, pa kimye pa kimye mwafwainwa kwingijishanga kibaba kya kuba’mba “Mepuzho a mu Baibolo a Kumbulwa” kikala mu Kyamba kya Usopa ne kumona umvwe ukeba kwisamba nanji. Kampepo mwakonsha kutatula kufunda nanji Baibolo pa nzubo. Nangwa byonkabyo, umvwe kya kuba’mba kechi twakonsha kutendeka kufunda nanji ne, twafwainwa kutwajijila na kumutwajila magazini pa kuba’mba ekale na kizaku kya kukeba kufunda.