Baishainga Lusekelo lwa Bantu Kupichila mu Kwibatwajila Magazini
1. Twakonsha kwingijisha byepi magazini kubaishishamo lusekelo lwa bantu?
1 Bantu bavula bo tutana mu mwingilo betutambwila kabiji baswa ne kutambulako mabuku etu, bino kibashupa bingi pa kubatu’mba baswe lufunjisho lwa Baibolo lwa kimye kyonse. Jishinda jimo jo twakonsha kubaishamo lusekelo lwabo ke kupichila mu kwibatwajila magazini. Umvwe mwashajika magazini, nembai jizhina ne keyala ya yewo muntu, juba jo mwamonañana, magazini o atambula, kinembelo kyo mwisambapo kabiji ne bintutu bikwabo byo mwamona byakonsha kumwesha’mba byobyo atemwa. Kimye kyonse umvwe magazini a bukumo afika, monaimo bishinka bimo byakonsha kufika pa michima ya bomutwajila magazini, kabiji ne kwibitongola kimye kyo mwibafwakashila. (1 Ko. 9:19-23) Mu kuya kwa moba, bintu byo batanga mu magazini etu bikebazakula michima ne kukeba kufunjilapo bikwabo.
2. Mambo ka o kibena kukebewa bukiji bukiji bantu kumukeba Yehoba, kabiji bintu ka bikwabo byo twakonsha kuba pa kuba’mba twibakwashe?
2 Nangwa byonkabyo, twayuka kuba’mba bantu bavula kechi bakekala bakalume ba Yehoba na mambotu a kwitangila abo bene magazini ne. Na mambo a kuba kibena kukebewa bukiji bukiji bantu kumukeba Yehoba, bintu ka bikwabo byo twakonsha kuba pa kuba’mba twibakwashe? (Zefwa. 2:2, 3; Lum. 14:6, 7) Twakonsha kubaisha lusekelo lwabo kupichila mu kwisamba nabo kinembelo kyakonsha kwibakwasha kimye kyonse kyo twibatwajila magazini.
3. (a) Twakonsha kunengezha byepi misambo yapusana pusana ya kwisamba kinembelo kimo? (b) Mitwe ka bantu baji mu nyaunda yenu yo batemwa kwambapo?
3 Mwisambo wa Kwisamba Kinembelo Kimo: Langulukai pa bantu bomutwajila magazini, ne kunengezha misambo yapusana pusana ya kwisamba kinembelo kimo pa bintu bimo byo babena kupitamo. (Fili. 2:4) Kya kumwenako, umvwe kya kuba umo wafwisha mutemwe wanji, mwakonsha kubwelako javula na kwisamba Baibolo byo aamba pa mambo a bantu bafwa byo baji kabiji ne kuba’mba kukekala lusanguko. Mwakonsha kwingijisha byambo biji mu buku wa Ukupelulula pa mitwe ikatampe ya kuba’mba “Imfwa” ne “Ukubuuka” kuba’mba munengezhe misambo ya kwisamba kinembelo kimo. Monka mu kwisamba nabo, mwakonsha ne kuvulukapo mitwe imo yakwatankanako nabiji yaamba pa bikola, bukote, ne lufu byo bikafumishiwapo kikupu. Kintu kine kikatampe ke kukeba mutwe wakonsha kuzakula muntu muchima kabiji ne kumumwesha Baibolo byo aambapo.
4. Mambo ka o kyanemena kukwasha bantu kuba’mba bomvwishe Binembelo byo tubena kwambapo, kabiji twakonsha kuba byepi kino?
4 Bakwashai Bomvwishe: Nangwa kya kuba javula kikebewa kwisamba ino misambo mu kwipipishatu bino saka yaumvwanyika, kukebewa bintu byavula bingi kukila kutangatu kinembelo kyo mwakeba. Satana wapofula michima ya bantu kuba’mba babule kumvwa mambo awama. (2 Ko. 4:3, 4) Nangwatu boba bayukako Baibolo pacheche bakebewa kwibakwasha kuba’mba bomvwishe. (Byubilo 8:30, 31) Onkao mambo, ikalaiko na kimye kya kulumbulula mwatala kinembelo kabiji ne kupana kya kumwenako, byonkatu byo mwakonsha kuba na jashi mu Sukulu ya Mwingilo wa Teokalasi. (Byubilo 17:3) Monai kuba’mba awo muntu waumvwisha buneme bwa kwingijisha Mambo a Lesa mu bwikalo bwanji.
5. Muntu ye mutwajila magazini wakonsha kwikala byepi lufunjisho lwa Baibolo?
5 Umvwe muntu watemwa byo abena kufunda, mwafwainwa pachepache saka mubaishako mwisambo wenu kupichila mu kwisambako binembelo bya mu Baibolo bibiji nangwa bisatu kimye kyonse kyo mwamufwakashila. Monaipo kimye kimo kyawama kushajikilamo buloshuwa wa Nanchi Lesa Ukebaka nangwa buku wa Kuyuka. Mu jino jishinda, muntu ye mutwajila magazini, wakonsha kwikala ke lufunjisho lwa Baibolo.