Kuwamishako Busendwe Bwetu bwa Kusapwila—Kwikala na bo Mutwajila Magazini

Ene Mambo o Kwanemena: Bantu bavula batanga magazini etu kechi bakeba kufunda Baibolo ne atweba ne. Kampe basekela mu bupopweshi mo baji, nangwa balanguluka’mba kechi baji na kimye kya kufunda ne. Bino inge ke batange magazini etu kimye kyonse, bakonsha kwikala na kizaku kya kufunda Mambo a Lesa. (1 Pe. 2:2) Kibaaba kimo kyakonsha kufika muntu pa muchima nangwa bwikalo bwanji bwakonsha kupimpulwa. Inge ke tuyeko javula, kwisambako nabo pacheche kukebalengela kukasuluka kabiji tukayuka bintu byo batemwa ne byo bapitamo mu bwikalo bwabo. Pa kupitapo kimye, twakonsha kutendeka kufunda nabo Baibolo.

Byo Twafwainwa Kuba:

Pa ñondo pa ñondo, ikalainga na kimye kya kutwajila muntu magazini a katataka a Kyamba kya Usopa ne Labainga! Kampe mwafwainwa kuyangako ne pa bimye bikwabo mu ñondo pa kuba’mba mumulengele kwikala na kizaku kya kutanga bibaaba biji mu magazini o mwamushijile nangwa mabuku o mubena kusha mu yewo ñondo. Nembainga byonse.—Monai Mwingilo Wetu wa Bufumu wa January 2014, ji. 3..
Nengezhainga kimye kyonse pa kubwelako. Kukila kushatu magazini ne kufumako, isambai na mwina nzubo ne kweseka kwikala balunda pa kuba’mba mulengele lusekelo lwanji kubayilako.
Monaingapo bimye bya kutendekelamo lufunjisho. Inge muntu ye mutwajila magazini wimwipuzha byamba Baibolo pa mutwe umo, mutwajilai buku ye tufunjishamo bantu muji mukumbu ne kwisamba nanji. Saka mukyangye kuya ne, mwipuzhai bwipuzho bo mukesamba kimye kikwabo kyo mukabwelako. Inge saka muyako kimye kyonse ne kwisambako nanji pacheche kwingijisha Baibolo nangwa mabuku o twingijisha kufunjishamo bantu, ko kuba’mba mubena kufunjisha lufunjisho lwa Baibolo. Nanchi mwakimutwajilapo mwina nzubo buloshuwa wa kuba’mba Mambo Awama ne kumumwesha byo tufunda Baibolo nyi? Nanchi mwakimumweshapo kala vidyo wa kuba’mba Mambo ka a Kufunjila Baibolo? ne wa kuba’mba Kikala Byepi pa Kufunda Baibolo? Nangwa kya kuba muntu kala wakananga kufunda Baibolo, bintu byakonsha kwaluka mu bwikalo bwanji. Nanchi mwakonsha kweseka jikwabo nyi?

Esekai Kuba Bino uno Ñondo:

Nembai mutanchi wa bantu bo mwakonsha kutwajilanga magazini kimye kyonse. Batwajilainga magazini a katataka ne kwibabuula’mba mukebaletela ne akwabo.