Kimye ka Kyawama Kubwelako ku Bantu Bakeba Kufunda?
1. Ki ka kyakonsha kwitukwasha kulenga baana ba bwanga?
1 Kubwela ku bakeba kufunda pa Bufumu bwa Yehoba kukwasha kulenga baana ba bwanga. (Mat. 28:19, 20) Kusala kimye kyawama kya kubwelako kwaimena pa mutanchi wetu ne wa yeo ukeba kufunda. Mambo ka o twafwainwa kubwelako bukiji?
2, 3. Mambo ka o twafwainwa kubwelako bukiji?
2 Mambo ka o Twafwainwa Kubwelako Bukiji? Mpelo ya buno bwikalo byo yafwenya kala pepi ko kuba’mba mwingilo wa kusapwila “mambo awama a bufumu” katataka akapwe. (Mat. 24:14; 1 Pe. 4:7) Onkao mambo “juba ja lupulukilo” saka jikyangye kufika twafwainwa kumvwina mukambizho wa ‘kusapwila mambo kasa tutengelela jimo’ kwavwangamo ne kubwelako bukiji ku bakeba kufunda.—2 Ko. 6:1, 2; 2 Timo. 4:2.
3 Satana ukebesha bingi konauna nkunwa ya Bufumu yo twakonsha kubyala mu muchima wa muntu ukeba kufunda. (Mako 4:14, 15) Ba mu kisemi, bo bengila nabo ne bakwabotu bebendeleka bakeba kufunda. Kubwelako bukiji kwitulengela kutwajijila na mwisambo nangwa kya kuba kuji bakeba kwibalekesha.
4. Twakonsha kuba ka pa kimye kitanshi kyo twisamba na muntu pa kuba’mba tukabweleko?
4 Layai: Kyawama bingi kulayañana juba ja kubwelako pa kimye kitanshi kyo mwisamba na muntu. Shai bwipuzho bwakukumbula pa kubwelako. Kyanema bingi kunemba bulongo byo mwisamba pa kimye kitanshi ne juba jo mukabwelako. Umvwe kyakonsheka, mwakonsha kumulaya kubwelako juba jalondelapo nangwa inge papitatu moba acheche. Umvwe mwisamba na muntu pa Kibelushi nangwa pa Mulungu wingila mukachi ka mulungu, kimo kimye wakonsha kuswa kumufwakesha jibiji pa Kibelushi nangwa pa Mulungu. Umvwe mwalayañana juba, fikizhai mulaye wenu.—Mat. 5:37.
5. Kubwelako bukiji kwakonsha kwitukwasha byepi kwingila mwingilo witupele Yesu wa kulenga baana ba bwanga?
5 Kyawama bingi kubwelako bukiji ku muntu ukeba kufunda bukine. Onkao mambo layai juba ne kubwelako bukiji, mambo “kimye kyashalako bekikepesha kala.” (1 Ko. 7:29, NW) Umvwe saka tubwelako bukiji ku bakeba kufunda bukine pa Bufumu, mu mwingilo wetu mukafuma byawama.