Kuwamishako Busendwe Bwetu bwa Kusapwila—Kwala Kitendekesho kya Mwisambo pa Kukabwelako

Ene Mambo o Kyanemena: Inge twatana muntu ukeba kufunda Baibolo, twafwainwa kubwelako kimye kyo akekala pa nzubo pa kuba’mba tukatekezhe nkunwa ya bukine yo twabyajile. (1 Ko. 3:6) Kino kilumbulula’mba twafwainwa kwala kitendekesho kya mwisambo ne kumvwañana kimye kyo twakonsha kubwelako. Kabiji kusha bwipuzho bwa kwisambapo kimye kyo tukabwelako kwawama mambo kukalengela mwina nzubo kwitutengela. Inge bwipuzho bwakumbulwa mu buku ye twamushila, mwina nzubo ukatanga yewo buku. Kwala kitendekesho kya mwisambo kimye kyo tukabwelako kwawama mambo atweba bene ne mwina nzubo tuyukila jimo byo tukesambapo. Kimye kyo twabwelako, twakonsha kumulumbulwila’mba twaiya na kukumbula bwipuzho bo twashile, apa bino twatendeka kwisamba.

Byo Mwafwainwa Kuba:

Pa kunengezha bya kwamba mu busapwishi bwa ku nzubo ku nzubo, mwafwainwa kunengezhapo ne bwipuzho bwa kushila mwina nzubo bwa kwisambapo kimye kyo mukabwelako. Mukumbu wa buno bwipuzho wafwainwa kufuma mu buku ye mubena kumushila, nangwa mu buku ye twingijisha pa kufunda Baibolo, pa kuba’mba mukatendeke kwingijisha uno buku kimye kyo mukabwelako.
Pa kupwisha kwisamba na mwina nzubo kimye kitanshi, mubulai amba mukeba mukabweleko na kwisamba nanji jikwabo, apa bino ne kumushila bwipuzho bo mwaji kunengezha. Mu mapunzha amo bantu bapayankana bingi kabiji kechi baswa amba mukabwelako na kwisamba nabo jikwabo ne. Inge mwatana muntu wa uno mutundu, mwakonsha kumwipuzha’mba: “Nanchi kino kyo kimye kyawama kwimutana pa nzubo nyi? [Lekai akumbule] Mulungu ubena kwiya, mbena kukeba kuba’mba nkabwele na kukumbula buno bwipuzho bwa kuba’mba . . . Inge mukapayankana kimye kyo nkabwela, mukakasuluke kumbuula.”
Mwafwainwa kubwelako pa kimye kyo mwalaya mwina nzubo amba mukabwela. (Mat. 5:37) Pa kupwisha mwisambo kimye kyo mwabwelako, mwafwainwa kwala kitendekesho kya mwisambo ukalondelapo.

Esekai Kuba Bino mu uno Ñondo:

Pa kunengezha bya kwamba mu busapwishi, nengezhaipo ne bwipuzho bo mukakumbula kimye kyo mukabwelako. Buulaiko musapwishi ye mubena kwingila nanji bwipuzho bo mwanengezha.