Kange Muleke Butemwe Bwenu Butanshi Ne
1 Yesu watumbijikwa, wajimwine kipwilo kya mu myaka kitota kitanshi kya mu Efisesa amba: “Bino nji na kino kyo natala bibi mwi obewa, namba, waleka butemwe bobe butanshi.” (Lum. 2:4) Kyamwekeshatu patoka kuba’mba, bavula balekele butemwe bwabo butanshi bo batemenwe Yehoba. Kimye kyo twatendekele kufunda bukine, butemwe bwa kutemwa Lesa ne bakwetu bantu bwakomejilengako bingi, kabiji kino kitulengejile kusapwila na kuchinchika luketekelo lwetu lwa bukumo. Ki ka kiketukwasha kubula kuleka butemwe bwetu butanshi ne kubula kubwela panyuma mu mwingilo?
2 Lufunjisho lwa pa Bunke ne Kutanwa ku Kupwila: Ki ka kyalengejile butemwe bwa kutemwa Lesa ne bakwetu kubailako kimyetu kitanshi kyo twafunjile bukine? Nanchi ke na mambo a byonse byo twafunjile pe Yehoba kimye kyo twafunjilenga Binembelo nenyi? (1 Yoa. 4:16, 19) Onkao mambo, pa kuba’mba butemwe bwetu “buyengatu na kuvula,” twafwainwa kutwajijila kufunda maana alumbuluka a kuyuka kabiji ne kukebesha mu “bine byazhika bya Lesa.”—Fili. 1:9-11; 1 Ko. 2:10.
3 Kutwajijila kwikala na lufunjisho lwa pa bunke ke kintu kyakatazha bingi mu ano moba a kupelako ayula na bya kutabataba ne bintu bilabikañana. (2 Timo. 3:1) Twafwainwa kwikalapo na kimye kya kujiilamo kajo ka ku mupashi. Kutanwa ku kupwila kimye kyonse nako kwanema bingi, kikatakata ‘byo tubena kumona aja juba kasa jibena kufwenya pepi.’—Hebe. 10:24, 25.
4 Mwingilo: Kwingila na mukoyo mu mwingilo kwitukwasha kusunga butemwe bwetu butanshi bo twatemenwe Lesa. Byo tusapwila mambo awama, twivululako atweba bene milaye yawama ya Yehoba, kabiji kino kitukwasha kukosesha luketekelo lwetu ne butemwe bwetu kubula kukepa. Kufunjisha bukine bwa mu Baibolo kukebewa kupesapesa ne kumvwisha bulongo bishinka atweba bene, kabiji kino kikosesha lwitabilo lwetu.—1 Timo. 4:15, 16.
5 Yehoba ye wafwainwa bintu byonse, kuvwangakotu ne butemwe bwetu. (Lum. 4:11) Kange muswishe butemwe bwenu butanshi kupwa ne. Bulamishai butemwe bwenu butanshi kupichila mu kwikala na mukovyokovyo wa lufunjisho lwa Baibolo lwa pa bunke, kutanwa ku kupwila kimye kyonse kabiji ne kwikala babambakana mu kusapwila ku bantu bintu byo mwanemeka kufuma panshi ya muchima wenu.—Loma 10:10.