Kwashai Bakwenu Kutana Jishinda Jaya ku Bumi bwa Myaka
1 Nangwa kyakuba bupopweshi bonse bwamba’mba bubena kufunjisha bantu bya kwingijila Lesa, mafunjisho abo aenda kupusana. “Ngauzhi” Yesu kechi wafunjishepo’mba bupopweshi bonse ke mashindatu apusana pusana abena kuya ku lupulukilo ne. (Yoa. 7:40; Mat. 7:13, 14) Nangwa kyakuba wayukile’mba bamo bakamweshangatu’mba “baji na kipashañanotu kya munema wa kunemeka Lesa,” Yesu waketekejile’mba bamo bakatana bupopweshi bwa kine ne kwikala monka.—2 Timo. 3:5; Yoa. 4:23.
2 Nga bakwetu bakonsha byepi kufunda bukine bwa Lesa ne kumupopwela moakebela? Lupusano lwa bupopweshi lwakonsha kupwa mu mutende inge kyakuba baswa kumvwina byaamba ine nsulo ya bukine bwa Mulenga wetu. Ino nsulo ke Baibolo. (Yoa. 17:17) Nangwa kyakuba bavula balondela mpopwelo ya bansemi yabo nangwa ya bakwabo bakinkalankulo, bantu bepelula bakonshatu ‘kufwenya kwipi ne Lesa’ inge ke bebalawile bene Binembelo ne kwingijisha byo babena kufunda mu bwikalo bwabo. Umvwe ke bobe bino bekala na bulume bwa kukana byubilo byonse bibula kumutokesha pa muchima.—Yako. 4:8.
3 Buloshuwa wa Mwijitana Jishinda Jaya Kubumi Bwamyakanyi? walondolola bingi bulongo lwitabilo ne bisho byo baitabilamo bavula. Inge ke bamone Byambo bya Lesa byo byaamba pa bino bintu, bantu bakishinka bakoseshiwa kufumamo mu bupopweshi bwa bubela buji bonse nangwa kyakuba ba mu bisemi byabo ne bakwabo bakinkalankulo bebakanye byepi.—Mat. 10:36; 2 Ko. 6:17, 18.
4 Lufunjisho lutanshi ne lwa bubiji mu uno buloshuwa, lwaamba pa bishinka byawama bya kuketekela mu Baibolo ne kwiiswa’mba kyo kipimo kya kuyukilako bupopweshi bwa kine. Lufunjisho 3, 4 ne 5 lwalondolola binembelo byo byaamba pa mambo a bekala mwiulu, bafu, ne kupopwela bapashi. Lufunjisho lwashala lukwasha bantu bakeba kufunda bukine kuyuka bupopweshi bwakine ne kwibakwasha kwingijisha byo babena kufunda. Bipikichala bijimo bya bintu byayukanyikwa byambiwa moba onse bibena kwamba pa byambo bibena kwambiwapo. Byamwekele mu bwikalo bwa bantu byaambiwapo bya boba baleka byubilo byatama bimwesha kuba’mba Yehoba ukakwasha boba bakeba kuba byawama ne kusankilapo byatama.—Fili. 4:6; Yako. 4:7.
5 Bantu ba mu mikoka yonse ya bantu babena kumvwina lwito lwa ‘kutwela pa kibelo kyakepa’ ne kwenda mu jishinda jaya ku bumi bwa myaka ne myaka. Tuji na bishinka bitulengela kwingila na ngovu mwingilo wetu ne kuketekela bulume bwa Byambo bya Lesa bupimpula bwikalo bwa bantu. Kupichila mu byambo ne byubilo byetu, twayai tubuleko bakwetu ene mambo o kyawamina kwikala mu bupopweshi bwa kine kuba’mba nabo bakamone mfweto kufuma kwi Yehoba myaka ne myaka!—Mat. 7:13, 14; 2 Ko. 10:4, 5; Sala. 37:29.