Kusanchila Lesa pa Lusa Lwanji
1 Mutumwa Paulo saka akyangye kwikala mwina Kilishitu, wajinga na lupata lwa kukanya bwina Kilishitu kukumbana monse monse. Bino, na mambo akuba kechi wayukile kyo aubilenga ne, waubijilwe lusa. Yehoba wamwesheshe Paulo lusa ne kumupa mwingilo wanema bingi wa kusapwila. Ne aye Paulo wamunemekele bingi uno mwingilo. (Byu. 26:9-18; 1 Timo. 1:12-14) Kusanchila lusa lwa Yehoba kwamulengejile Paulo kwipana aye mwine kwingila uno mwingilo.—2 Ko. 12:15.
2 Ne atweba byo twapewa uno mwingilo, twaubilwa lusa lwa Lesa. (2 Ko. 4:1) Byonka byajinga Paulo, ne atweba twakonsha kumwesha lusanchilo lwetu pa luno lusa kupichila mu kwingila na ngovu kukwasha bakwetu kukomenako ku mupashi. Jishinda jimo jo twakonsha kubilamo bino ke kutendeka kufunjisha bantu mafunjisho a Baibolo.
3 Kutendeka Mafunjisho a Baibolo: Kwikala na mutanchi wa bantu bakutwajila magazini jo jishinda jimo ja kutendekelamo mafunjisho a Baibolo. Byo twibatwajila magazini kimye kyonse aba baji pa mutanchi wetu, popo tuyuka bijikila byo baji nabyo. Mu kupita kwa kimye, mutwe umo wa mu magazini o twibatwajila wakonsha kwitulengela kutendekelamo lufunjisho lwa Baibolo mu buloshuwa wa Nanchi Lesa Ukebaka? Monka mu kwibatwajila magazini, apo kampe twakonsha kutwajijila kwisamba mu buloshuwa wa Nanchi Lesa Ukebaka?
4 Lulombelo ne Kwingila na Ngovu ko Kukebewa: Lulombelo ne kwingila na ngovu, kuketukwasha bingi kubaishako mwingilo wetu wa kusapwila. Nyenga umo painiya wajingatu na muntu umo ye afunjishanga lufunjisho lwa Baibolo, walombele kwi Yehoba kuba’mba amukwashe ekale na bantu bavula bakufunjisha. Bino kechi walombeletu lulombelo wabwela walubako ne, waingijile ne na ngovu kwesakana na kyo alombele. Walangulukilepo bulongo byo aingijilenga mwingilo wanji kabiji wataine kuba’mba kimye kyo abwelelenga ku bantu bo esambile nabo, kechi waambilengapo bya kutendeka nabo lufunjisho lwa Baibolo ne. Pano byoatendekele kwambapo, ne kimyetu ne, waikele na bantu bakwabo babiji bakufunjisha.
5 Byo tujipo na jishuko ja kusapwila “mambo awama a bupe bwa Lesa.”! (Byu. 20:24) Lekai lusanchilo lwa kusanchila Lesa pa lusa lwanji lwitutundaike kwingila na ngovu tukwashe bakwetu kumwenamo mfweto mu lusa lwa Yehoba.