Kabokoshi Ka Mepuzho

◼ Twafwainwa kwingila byepi mingilo ya kipwilo?

Kukwatankana kwa bantu ba Yehoba ko kwalengela amba bintu mu kipwilo byendenga monka mo byalondakena. (1 Ko. 14:33, 40) Akilangulukai byavwangwa mu kupwilatu kumo kwa kipwilo. Kununga pa kupwila, kuji ne mingilo ikwabo yavula ikalako kupwila saka kukyangye kutendeka ne panyuma ya kupwila ingila balongo ne banyenga. Mingilo ikwabo ingijiwa kwakubula kumonako bakwetu nayo yanema bingi. Atweba umo umo twakonsha kutundaika byepi luno lunengezho?

Ipanai. Aba baji na muchima wa kwipana bakekala na byavula bya kuba. (Sala. 110:3) Ubilai lusa babela ne bakikulumpe. Kwashai mwingilo wa kuwamisha Nzubo ya Bufumu. Twakonsha kwingila mingilo ikwashañana kwakubula wa kwitutuma’mba tube bino. Kyo tukebewa ke kwikala na kizaku kya kukwashañana.

Ingilainga mu kwipelula. Bantu bepelula baji bingi na lusekelo lwa kwingijila bakwabo. (Luka 9:48) Kwipelula kuketuzhikijila kubula kutambwila mingilo yavula kukila yo twakonsha kwingila. Kabiji kuketukwasha ne kubula kukila pa lūsa lo tuji nalo.—Mana. 11:2.

Ketekelwai. Mosesa watundaikilwe kusala ‘banabalume bakishinka bashikwa mazhikakanwa’ kwingila mingilo mu Isalela wa kala. (Lupu. 18:21) Kino kyo kyubilo kikebewa ne lelo jino. Ingilainga na muchima yense mwingilo yense ye mwapewa. (Luka 16:10) Umvwe kechi mwakonsha kwingila mwingilo ne, monai’mba kuji lunengezho lwafwainwa kuba’mba muntu mukwabo amwingile.

Panai byenu byawamisha. Bena Kilishitu bakambizhiwa kwingila na muchima yense nangwatu mu mingilo ya ku mubiji. (Kolo. 3:22-24) Kyanema bingi kwingila na muchima yense kutwala palutwe mpopwelo ya kine. Nangwatu mwingilo amwekane kukepa, ukwasha bingi kipwilo umvwe waingijiwa bulongo.

Mwingilo yense witupa kimye kya kumwesheshamo butemwe bwetu bwa kutemwa Yehoba ne balongo betu. (Mat. 22:37-39) Twayai twingilenga mu bukishinka mingilo iji yonse yo twapewa.