Tainga Muchima Bakwenu—Kupichila mu Kwibobila Lusa
1 Byo avulukile kimye kitanshi kyo asambakene na Kamonyi wa kwa Yehoba, wamukazhi wabulanga kukeba Bakamonyi waambile’mba: “Kechi nkivuluka byo twisambilepo ne, bino byo mvulukakotu ke lusa lo amwesheshe, lusekelo kabiji ne kwipelula. Namukasulukijile bingi.” Bino byambo bimwesha buneme bwa kuteshesha kya kine muchima boba bo tusapwila.—Fili. 2:4.
2 Butemwe Buba Lusa: Jishinda jimo jo twakonsha kumwesheshamo butemwe ku bakwetu ke kupichila mu kwikala na lusa. (1 Ko. 13:4) Muntu uji na lusa uta muchima bwikalo bwa bakwabo, kabiji ne kukeba kwibakwasha. Ee ibyo kuba’mba kusapwila ke mwingilo umwesha’mba muntu uji na lusa. Bino kuta muchima kwa kine ko twata bantu kechi kukamwekelatu mu kwibasapwila ne. Musango ye tubilamo nabo bintu—bulunda bwetu ne abo, byubilo byetu byawama, byo tuteleka, bintu byo twamba ne byo twibyamba, kabiji ne byo tumweka pa kwisamba na bakwetu—bikamwesha’mba kine twibata muchima.—Mat. 8:2, 3.
3 Kuta muchima bantu kwa na butemwe kuketulengela kupana bukwasho mu mashinda alumbuluka. Kimye kyo asapwijilenga ku nzubo ne nzubo, mulongo painiya bamupangile ku mwanamukazhi wakikulumpe wafwilwa kimye kyo ayukile amba uno mulongo Kamonyi. Wamwambijile uno mulongo amba wakanjijile pa kandandalashi na kubika babu wa malaichi kimye kyo akonkonshelenga ku kinzhilo. Uno mulongo wamukumbwile’mba “kechi kyawama kwingila uno mwingilo bunke bwenu ne.” Wamwambijile uno mulongo kutwela mu nzubo. Wamubikijile babu ingi, wabwela waya ne kuya. Kimye mwananji wamulume kyo ashile kuba’mba amumonepo, wamubujile kyamwekele. Waumvwine bingi bulongo kya kuba wa mulondejile uno mulongo kuba’mba amusanchile. Mu kuba kino mwafumine mwisambo wawama, walengejile uno mwananji kuswa lufunjisho lwa Baibolo.
4 Kupichila mu kwikala na lusa, tumwesha butemwe bwa Yehoba ku bantu banji, kabiji ne kulengela mambo a Bufumu kuwama. Onkao mambo, twayai jonse ‘twilumbululenga atweba bene byo tuji ba mwingilo ba Lesa . . . kupichila mu kumwesha lusa.’—2 Ko. 6:4, 6.