Taiko Muchima Kukeba Bantu Bashinka Matwi Baji mu Nyaunda Yenu

¹ Yehoba ubena kwita bantu amba: “Iyai . . . ne aye wasaka naye atambule mema a bumi a bupetu.” (Lum. 22:17) Pa bantu babena kwitaba luno lwito, paji ne bantu bashinka matwi babena kuvujilakotu. Na mambo a kino, bipwilo bicheche mu kino kyalo kyetu muji mabumba a mulaka wa kwamba na maboko ao abene kumwenamo mu kupwila kwa kipwilo mu Mulaka wa Kwamba na Maboko wa Kina America.

² Nangwa kya kuba mabumba a kwamba na maboko atatu muchima mu kusapwila bantu bashinka matwi ne bantu babula kumvwisha bulongo baji mu manyaunda abo, bino kobakiji ne bantu bakwabo ba yenka uno mutundu bafwainwa kutanwa ne kusapwilwa mu kino kyalo.

³ Mwakonsha Kukwasha Byepi? Kimye kyo muji mu mpunzha muji bantu bavula, abya mwakimonapo kala bantu babena kwingijisha mulaka wa kwamba na maboko nyi? Abya mwayukapo muntu umo pa nkito yenu nangwa pa sukulu po muji ujipo na mulongo wanji washinka matwi nyi? Taiko muchima kukeba bantu bashinka matwi kimye kyo mubena kwingila mingilo yenu ya juba ne juba. Pano bino mwakonsha kumona byepi amba basapwilwa mambo a Bufumu?

⁴ Basapwilainga: Bulai jibumba jingijisha mulaka wa kwamba na maboko ku mpunzha kwikala muntu washinka matwi. Bantu bashinka matwi bavula bafunda bingi lubilo bukine umvwe ke bapwanañane pamo na Bakamonyi bashinka matwi pa kupwila kwa kipwilo kwikala mu Mulaka wa Kwamba na Maboko wa Kina America. Onkao mambo, umvwe muji na jibumba jingijisha mulaka wa kwamba na maboko koko kwenu, munembeshi mu kipwilo wafwainwa kutuma mabulañano a pa bonse bantu bashinka matwi banji mu nyaunda yenu ku jino jibumba.

⁵ Ibyepi umvwe mu nyaunda yenu kechi mujipo bantu bakonsha kupana bukwasho ku bantu bashinka matwi mu kimasamasa kyenu ne? Mwakonsha kukwasha byepi? Mambo ka a kubula kubwelako ne kwisamba na mulongo wanji uji yense umvwa? Umvwe kyakonsheka, ingijishai vidyo ya mulaka wa kwamba na maboko pa kuba’mba mubayisheko kizaku kya muntu washinka matwi. Basapwishi bamo bafunda Mulaka wa Kwamba na Maboko wa Kina America pa kuba’mba bakonshe kukwasha bantu bashinka matwi bulongo.—Byubilo 16:9, 10.

⁶ Kupichila mu kuta muchima kukeba bantu bashinka matwi mu mpunzha yenu, mwakonsha kwibapa jishuko ja kutambula mema a bumi a bupetu.—Mat. 10:11.