Kange ‘Mwisule na Mambo a Bwanyike Bwenu Ne’

1. Ñanyi lutundaiko mutumwa Paulo lo apele nsongwalume Timoti?

¹ “Kechi uleke muntu akusule mambo a bwanyike bobe ne; kabiji wikale wa kumwenako abo baitaba, mu byambo, ne mu bwikalo, ne mu butemwe ne mu lwitabilo, ne mu bumuchima watoka to.” (1 Timo. 4:12) Paulo wavulwilengako Timoti pa byo kyanemena kwingijisha bulume bwanji bwa mu bwanyike mu mwingilo wa Lesa. Timoti kechi wafwainwe kusula bulume bwanji bwa kukwasha bantu ne, bino wafwainwe kwingijisha jishuko jiji jonse jamumwekejilenga.

2. Mashuko ka bakyanyike o baji nao mu kipwilo?

² Bakyanyike bavula, myaka yabo ya bwanyike ipwila pa sukulu. Umvwe byo byo kiji ne kwi anweba, abya mumona pa sukulu kuba’mba yo nyaunda yenu ya kusapwilamo busapwishi bwa kushukilwa nyi? Kuta muchima ku mikambizho imufunjisha bansemi benu bakamwa Lesa, kupwila kwa kipwilo ne lufunjisho lwa pa bunke bwenu, kwakubula nangwa kuzhinaukatu ne, kwimupa maana awama a ku mupashi ao umvwe mwiabulako bakwenu, akonsha ‘kwimupulusha anwe bene ne abo bemumvwa pamo.’—Mana. 1:8, 9; 1 Timo. 4:16.

3, 4. Nga kulangulukishapo kwa nsongwakazhi umo kwafwetelwe byepi, nanchi ne anweba mwakitalañanapo kala na kintu kiji nobe kino nyi?

³ Kupichila mu Kwingijisha Bimye Byonse: Bimye bya kwingijisha bintu byo mwayuka bimwekatu pa juba ne pa juba. Bino byo byajinga kwi Esther ufunda mu guledi 8 ku kibunji kya ku kabeta ka ku bulenge. Mufunjishi wa kwa Esther bamutongolanga ku baana basukulu kuba’mba washinta bingi. Kimye kimo mufunjishi kyo azhingijile, panyuma ya kufwomoka bukaji walombele lulekelo lwa mambo ku baana basukulu kuvwangakotu ne Esther. Waambile’mba “Mundombelelengako pa kuba’mba pimpulwe.” Esther wasungile bino byambo mu muchima kabiji waishile kusolomoka uno mufunjishi na Kyamba kya Usopa kya March 1, 2005 kiji na kishina kya kuba’mba, “Mwakonsha Kupwana Byepi na Bakwenu?”

⁴ Panyuma ya kutanga kino kibaba byubilo bya uno mufunjishi byamwekele kupimpulwa kabiji wabwelele walomba jikwabo lulekelo lwa mambo ku baana basukulu. Na mambo a bukwasho bwa mukwashishe Esther, wamunembejile kuba’mba: “Nasanta bingi pa byo wangubila. Konsha wayuka lupimpu lwaingila ino magazini mu bumi bwami ne. Neumvwinenga wapopomenwa, pano ino magazini yantekenesha bingi.”

5. Mambo ka o twafwainwa kubujila kwikela na ndangulukilo yabula kufwainwa pa mambo a mutembo wetu wa kubula kwikala “ba panopantanda”?

⁵ Kupichila mu Kupusanako: Kange mulubeko ne, kuba’mba, umvwe mwakosela bukine bantu ba panopantanda bakemupata—pano bino, kino kikemupa jishuko ja kusapwila “mambo awama a mutende.”—Yoa. 15:18, 19; Byubilo 5:27-32; Isa. 52:7.

6, 7. Ki ka kyakonsha kufumamo mu kulondela mafunde a mu Baibolo na muchima yense?

⁶ Priscar wikala mu kibunji kya pakachi wabatizwe saka aji na myaka jikumi na umo. Kwakubula nangwa kutaya kimye ne, lwitabilo lwanji lwaesekelwe. Juba jimo, batangi ba pa sukulu bakambizhe kuba’mba mwana wa sukulu yense wafwainwa kuya na kwingila mu bujimi bwa sukulu bwa fwanka. Priscar mu mushingi wakaine kuya na kwingilako. Mukwabo aye Masia byo amwipwizhe ene mambo o esajijilepotu bunke bwanji kukana kwingilako, Priscar waingijishe mitwe iji mu buku wa kuba’mba Ifipusho Abacaice Bepusha—Ifyasuko fibomba.—yp-CW pe. 272-5.

⁷ Uno mwana wa sukulu waswile kutambula buloshuwa wa Nanchi Lesa Ukebaka kabiji ne lufunjisho lwa Baibolo lwatendekele. Panyumatu ya bañondo batanu na umo, Masia, ye bafunjishanga kwi Priscar, wabatizwe. Byo mwafuminepo byawama pa kwikala wapusanako na bakwabo!—1 Pe. 5:8-10; Da. 1:14-17.

8. Yehoba umona byepi kwibikako kwenu kwa kumupa lukumo?

⁸ Kechi kyenyi kwendelekwa pa sukulu nangwa kumvwa moyo kuba’mba bakwetu basakwitulengulula na mambo a kwingilako mwingilo wa kusapwila ne. Mwakonsha kukosesha byepi lwitabilo lwenu pa kuba’mba mushindenga meseko onse eseka lwitabilo lwenu? Ketekelainga mwi Yehoba, ne kukeba kwitabilwa kwi aye. (Mana. 29:25) Sekelainga mu busendwe bwenu bwa kwingijisha Mambo a Lesa mu mwingilo. (2 Timo. 2:15) Bantu bakwabo kubikapo ne bakyanyike bonse bakeba kuyuka bintu bya kulutwe, kabiji Yehoba ukemwingijisha kwibakwasha.—Mat. 21:15, 16; 2 Mfu. 5:2-4.

9. Mwakonsha kulengela byepi bakwenu kubula ‘kusula bwanyike bwenu’?

⁹ Mu bañondo babena kwiya, mukekala na bimye bya kusapwilako—abya mukebingijisha nyi? Kupichila mu kwikala bakumwenako mu byubilo byawama bya bwina Kilishitu ne mu kusapwilako kimye kiji kyonse kyawama, mukamwenamo anwe bene ne bakwenu pamo. Kabiji kafwako nangwa umo ukakonsha ‘kusula bwanyike bwenu’ ne.—1 Timo. 4:12.