Nkalata Kufuma Ku Jibumba Jitangijila

“BUPE bwikale ne anweba ne mutende bifuma kwi Lesa Tata ne Nkambo Yesu Kilishitu.” Luno lo lwajinga lwimu Paulo lo aingijisha mu makalata anji avula o anembelanga bipwilo. Kino kibena kumwesha byo twiumvwa pe anweba bonse.—Efi. 1:2.

Byo tusantapo pa bupe bufuma kwi Yehoba kupichila mu kitapisho kya bukuzhi bwa Kilishitu Yesu! Kupichila mu bukuzhi, twaitabilwa kwi Lesa. Kuba twaikala na kino kintu kupichila mu kwingijisha bulume bwetu atwe bene, kufunda Baibolo na mukoyo, kusapwila mambo awama, nangwa kwingilakotu mingilo ikwabo yawama ne. Kulekelwa kwa mambo ne bumi bwa myaka ne myaka byapewa kwi atweba, kechi na mambo a kwipana kwetu ne, bino ke na mambo a bupe bufuma kwi Yehoba kupichila mwi Yesu Kilishitu.—Loma 11:6.

Paulo wanembejile bakwabo ba mu lwitabilo amba: “Twimusashijila . . . kechi mutambule bupe bwa Lesa ke bwatu ne mambo aye wamba’mba, mu kimye kyaitabilwa nakutelekele, ne mu juba ja lupulukilo nakukwashishe; Talai, pano po pa kimye kyaitabilwa; talai jino jo juba ja lupulukilo.” Kwajinga “kimye kyaitabilwa” Yelusalema saka akyangye konaunwa mu myaka kitota kitanshi. Bantu ba bukishinka batemenwe Yehoba bamwene lupulukilo lwa ku mupashi. Kino kyo kyaletele lupulukilo lwa ku mubiji ku bonse bakishinka banyemenemo mu Yelusalema saka akyangye konaunwa mu mwaka wa 70 C.E.—2 Ko. 6:1, 2.

Ne lelo jino, tubena kwikala mu “kimye kyaitabilwa” ne mu “juba ja lupulukilo.” Aba Yehoba bo asala kwikala bakalume banji kabiji ne boba babena kupuluka ku mupashi baji na luketekelo lwa kupuluka ku mubiji mu “juba jikatampe ja Yehoba” jijitu pepi.—Zefwa. 1:14.

Kwiya kwa juba ja Yehoba kwitulengela kwikala na mutembo mukatampe. Twafwainwa kujimuna bantu pa mambo a jino juba kabiji ne kukwasha bantu ba michima ya kishinka kumwenamo mu bupe bwa Yehoba pa kuba’mba nabo bakakonshe kupuluka. Paulo wanemekele bingi uno mutembo. Wanembele’mba: “Malwa o ami umvwe amiwa ne kusapwila mambo awama ne.” Kabiji wamwesheshe ne byo eumvwinenga mu bino byambo bya kuba’mba: ‘Amiwa ne wa kikoloto ku ba maana ne ku babulao. Onkao mambo ami mwine nasakishatu kusapwila mambo awama ne kwi anweba.’—1 Ko. 9:16; Loma 1:14, 15.

Yehoba uketuzhachisha umvwe twasula mwingilo wetu wanema wa kujimuna bantu. Twayuka byambo Yehoba byo aambijile ngauzhi Ezikyo bya kuba’mba: “Obewa mwana muntu, nakupa bumalonda bwa ba mu kisaka kya Isalela; byo ukomvwanga jiwi jami ukebanjimweneko. Umvwe namwambila mubi namba: Ukafwa kine, ne obewa ne kumujimuna ne, nangwa kumwambila bya kumujimuna’mba afume mu jishinda janji jatama amba apuluke ne, awa muntu ukafwa mu bubi bwanji; pa mashi anji nkeakebela ku kuboko kobe obewa.”—Ezi. 3:17, 18.

Ano moba a kupelako akatazha bingi. Kechi kyapela kwesakanya mitembo ya kisemi, mingilo ya ku mubiji, mingilo ya kipwilo ne mwingilo wa kusapwila ne. Kunungapo, anweba bavula mubena kupita mu misongo, kupopomenwa, bukote, nangwa kumanyikwa. Anweba bavula ‘mwanemenwa.’ Tubena kukeba kumwesha byo twiumvwa pe anweba, kwesakana na byaambile Yesu kuba’mba: “Iyai ko nji, anweba bonse basulwila na mingilo ne kunemenwa, ne amiwa nkemukokolosha.” (Mat. 11:28) Tubena kwimutakaika anweba bonse mwibikako na ngovu kutwajijila kwingijila Yehoba mu bukishinka nangwa kya kuba mutalañana na makatazho akatampe nangwa acheche.

Na mambo a kusapwila ne kufunjisha kwenu kwa na mukoyo ne na mambo a bibusa bya Yehoba, bantu 4,762 babatizwenga mulungu ne mulungu. Mu mwaka wa mwingilo wapwa, bipwilo 1,375 byalengelwe. Tuji na luketekelo kabiji tubena kulomba kuba’mba buku wa bukumo wa Nanchi Baibolo Kine Ufunjisha’mba Ka?, ao uji mu milaka 120, ukakwasha bantu bavula kumwenamo mu bupe ne mutende wa Yehoba mu jino “juba ja lupulukilo.”

Mwane yukai kuba’mba Jibumba Jitangijila jimutemwa bingi kabiji jimulombelelako. Ne atweba twimusanchila bingi pa milombelo yo mwitulombelako.

Atweba balongo benu,

Jibumba Jitangijila ja Bakamonyi ba kwa Yehoba