Nanchi Mwipuzhapo Bantu Bakeba Kufunda Bukine Nyi?
Umvwe mubena kufunjisha lufunjisho lwa Baibolo, mambo ka a kubujila kwipwizha ye mubena kufunjisha inge ujipo na bakwabo, balongo banji, nangwa bantu bo asambakana nabo jonse bakonsha nabo kutemwa kufunda Baibolo byo afunjisha? Javula ubena kufunda wakonsha kutongola mazhina avula. Umvwe ubena kufunda wimwitabizha kumutongola jizhina, mwakonsha kumutongola kimye kyo mwafwakashisha bano bantu kwibepuzha umvwe bakonsha kutemwa kufunda Baibolo. Mwakonsha kwambatu amba, “[Jizhina ja ye mufunjisha] wiyowa bingi kufunda Baibolo, kabiji walangulukile’mba ne anweba mwakonsha kumwenamo mu mutanchi wetu wa lufunjisho lwa Baibolo lwa kubula kulipila.” Apa bino mumumweshe pacheche lufunjisho byo lwikala, kwingijisha buku wa Baibolo Ufunjisha.
Umvwe muji na ye mufunjisha, ubena kukomenako bulongo, mwakonsha kumutundaika kulondolwela luno lunengezho lwa kufunda ku bakwabo ne ba mu kisemi kyanji bakonsha kutemwa kufunda. Wakonsha kwibeta kutanwako pa lufunjisho lwanji. Nangwa umvwe kino kechi kyakonsheka ne, wakonsha kwimunengezhezhako anweba kuba’mba mukasambakane nabo ne kwibamwesha bya kufunda. Kuba kino kutundaika ubena kufunda kutenda kwisamba na bantu maana a mu Baibolo.
Aba bo mubwelako jonse bakonsha nabo kwimupako mazhina amo a bantu bakonsha kutemwa kufunda, nangwa kya kuba abo kechi bakiswa lufunjisho lwa Baibolo lwa kimye kyonse ne. Umvwe mwibashila buku wa Baibolo Ufunjisha, mwakonsha kwipuzhatu amba, “Mwayukapo uji yense wakonsha kutemwa kwikalako na uno buku nyi?”
Byo kiji kuba’mba twayuka buneme bwa kimye kyo tujimo, tukeba kwingijisha mashinda onse kukwasha bantu kumvwa ne kuswa mambo awama. Nanchi mwipuzhapo bantu bakeba kufunda bukine nyi?