Nkalata Kufuma Ku Jibumba Jitangijila

KULONDA byaubile Yesu, ne atweba tulomba kwi Lesa na mukoyo amba: “Jizhina jenu jizhile.” Kukebesha kwetu kwa kwikela monka mwayila kulomba kwetu kumwekela mu bwikalo bwetu byo tuji Bakamonyi ba kwa Yehoba. Nangwa byonkabyo, kuji byavula bikebewa kechi kuyukatu jizhina ja Lesa ne. Twafwainwa kumupanga Lesa lukumo pa kimye kiji kyonse. Ee, kintu kyakijishapo kunema muntu kyo afwainwa kwikala nakyo ke kutelwa amba Kamonyi wa kwa Yehoba.—Mat. 6:9; Isa. 43:10.

Monka mwaambile Salamo 110:3, bantu ba Yehoba babena kwingila na muchima yense mu mwingilo wanji ye akambizha’mba wafwainwa kwingijiwa. Mambo ka bantu bamafumbi onse kabiji ne ba bwikalo bwapusana pusana o abena kwingijila mu mwingilo wa kusapwila? Kine kintu kikatampe ke na mambo a butemwe bwabo bo batemwa Lesa ne kwipana ko bepana kwi aye. Mpitulukilo ya mu mizhilo 6:5, 6 yakambizha kutemwa Yehoba na ‘muchima wetu yense, mweo wetu yense ne bulume bwetu bonse.’ Buno butemwe bufuma panshi ya muchima bwitulengela kwingijisha kimye kyetu, bulume bwetu ne bintu byetu kutwajilamo palutwe bintu bya Bufumu, kino kyavwangamo ne kwingilako mu mwingilo kwesakana na pakonsha kwituswisha bwikalo bwetu kupelela.

Butemwe Yehoba bo atemwa bantu bo bulengela kuba’mba mambo awama a Bufumu bwanji asapwilwe panopantanda ponse. Kechi ukebapotu nangwa pacheche muntu uji yense konaika ne, bino ukeba bantu kusha mashinda abo atama ne kwiya ku Mulenga wabo kuba’mba bekale na bumi. (2 Pe. 3:9) Yehoba waamba’mba: “Kechi mmwenamo lusekelo nangwa pachechetu mu lufu lwa ndengamambo ne, poso mu kuba’mba ndengamambo aleke jishinda janji, namba amone bumi.” (Ezi. 33:11) Kimye kyo tuya mu mwingilo, twikala kimwesho kya kine kya butemwe bwa Yehoba bo atemwa bantu. Kwa kubula nangwa kuzhinaukatu ne, kino kishinka kitulengela kwikala balusekelo kabiji basangalala umvwe twaingilako mu uno mwingilo wanema.

Butemwe bwetu bukatampe bo twatemwa Yehoba bumwekela ne mu byo tumona Mambo anji anembeshiwa na mupashi, Binembelo Byazhila. Kwa kubula Baibolo, umvwe kechi twamuyuka Lesa ne kufwenya kwipi ne aye byonka bitukambizha Yakoba 4:8 ne. Kabiji umvwe kechi twayuka ene mambo o twaikelako ne kikobiwa kulutwe ne. Kabiji inge kechi twayuka kuba’mba mushakulu wetu Adama ye walengela makatazho o tubena kupitamo ne. (Loma 5:12) Byonkabyo, umvwe kechi twayuka butemwe bukatampe bwa Lesa bwamwekela mu kupana Mwananji umotu kwikala bukuzhi bwetu ne. Mu mashinda avula, Yehoba ubena kwituyukisha bintu, kwitupa maana anji ne milangwe. Byo twanemekapo bupe bo etupa, Mambo anji anembeshiwa na mupashi! Lusanchilo lwetu pa buno bupe bwakilamo kunema, lwitulengela ‘kupulushapo bimye’ bya kutanga, kufunda ne kulangulukalangulukapo pa mafunde anji. (Efi. 5:15, 16; Sala. 1:1-3) Kechi twafwainwa kumvwanga mukose wa kutanga Mambo a Lesa kimye kyonse ne. Bino, butemwe bo twatemwa Lesa bwafwainwa kwitulengelanga kutanga Mambo anji ne kwitukwasha kutwajijila kumuyukisha kabiji ne kubayisha butemwe bwetu bo twamutemwa.

Twafunda mu Baibolo kuba’mba Adama byo alengele mambo kwi Yehoba, walengejile baana banji bonse kubikapotu ne atweba kubula kwikala na luketekelo mu bwikalo. Nangwa byonkabyo, Lesa wanengezhezhe jishinda ja kupulushishamo bantu, ne kumona’mba nkebelo yanji ku ntanda ikafikizhiwe.—Nte. 3:15.

Kwa kubula nangwa kuzhinaukatu ne, atweba bonse tukebesha bingi kuzhijika jizhina ja Lesa wetu. Byo tubena kuyukilapo byavula pe Lesa wa kukumya Yehoba, kitulengela kukwatankena pamo nanji ne jibumba janji kuyukanyikisha jizhina janji jikatampe ne nkebelo yanji. Twasumininwa kuba’mba twaitabilwa kwi aye ne kubilwa bibusa kabiji ne kuba’mba tukekala myaka ne myaka mu ntanda ipya.

Atweba ba mu Jibumba Jitangijila tubena kwimubula anweba balongo ne banyenga yetu kuba’mba twimutemwa bingi. Kabiji tubena kwimusanchila bingi pa kwibikako kwenu kwa kwingijisha kino kimye kyashalako kusapwila bantu bavula mambo awama “malwa akatampe” saka akyangye kutendeka. (Lum. 7:14) Kupichila mu kuba bino mubena kwibalengela kwikala na jishuko jintutu jimo jo mujipo najo ja kumuyuka Lesa ne Kilishitu jitangijila ku bumi bwa myaka ne myaka.—Yoa. 17:3.

Atweba balongo benu,

Jibumba Jitangijila ja Bakamonyi ba kwa Yehoba