Bonse Bakonsha Kukwashako Kulenga Baana ba Bwanga Bakatataka
1 Mwana wa bwanga wakatataka kechi ulengwatu na muntu umotu ne. Yehoba wakonsha kwingijisha bonse “ba mu mwingilo umo” ne aye, kukwasha bantu babena kufunda Baibolo kukomenako ku mupashi. (1 Ko. 3:6-9) Atweba bonse pa muntu pa muntu, kechi tukwashatu bakatataka kupichila mu mikumbu yetu yapita mu kyaji pa kupwila kwa bwina Kilishitu ne, bino ne mu byubilo byetu byawama bimwesha kwingila kwa mupashi wa Lesa mu bwikalo bwetu. (Yoa. 13:35; Nga. 5:22, 23; Efi. 4:22, 23) Bi ka bikwabo byakonsha kubiwa pa kukwasha bakatataka?
2 Byo Tuji Kipwilo: Atweba bonse twakonsha kumwesha lusekelo ku boba batatula kutanwa ku kupwila kupichila mu kwibemuna ne kwisamba nabo kasa tukyangye kutendeka kupwila ne panyuma ya kupwila. Byo avulukile pa kimye kitanshi kyo atainwe ku kipwilo, mwanamulume umo waambile mba: “Mu jubatu jimo, nataine bantu ba bilungi bingi ba butemwe bwa kine kukila ne ba muchechi mo nayanga. Kyamwekeletu patoka kuba’mba, nataine bukine.” Waishile kubatizwa panyuma ya ba ñondo batanu na babiji kufuma po atendekejile kupwila.
3 Mutakaikainga kufuma panshi ya muchima ufunda Baibolo byo abena kukomenako ku mupashi. Nanchi wachinchikapo kala lukatazho lwa kupatwa nyi? Nanchi kimye kyonse utanwa ku kupwila nyi? Abya waji kwibikako kukumbulapo nyi? Nanchi wanembeshako mu Sukulu ya Mwingilo wa Teokalasi nangwa kutendekako kuya mu mwingilo nyi? Mutakaikai byo ebikako kukomenako. Kino kikamutundaika kabiji ne kumukosesha.—Mana. 25:11.
4 Batangijila Lufunjisho lwa Baibolo: Basapwishi bamo bakwasha bantu bo bafunjisha Baibolo kwipwiluluka na uji yense wa mu kipwilo kupichila mu kwitapo basapwishi bakwabo kuya nabo ku lufunjisho. Ambilai ye mubena kufunjisha kutanwa ku kupwila kwa kipwilo ponkapotu. Umvwe watatula kutanwa ku kupwila, muyukanyikishai ku ba mu kipwilo. Nanchi ubena kwibikishako kuleka kisela kyatama nabiji kupepa fwanka nyi? Abya kujipo wa mu kisemi kyanji ubena kumukanya kufunda nyi? Wakonsha kukwashiwa umvwe wisambapo na musapwishi umo wapitapo kala mu lukatazho lwa uno mutundu kabiji ne kwilushinda.—1 Pe. 5:9.
5 Bakatataka bakebewa bukwasho bwa ku mupashi kufuma ku ba mu kipwilo. Bonse bakonsha kwibakwasha kukomenako kupichila mu kwibata muchima.