Bonse mu Kipwilo byo Bakonsha Kukwasha Bafunda Baibolo Kukomenako Kufika ku Lubatizhilo

1-2. Bañanyi bakonsha kukwasha ufunda Baibolo kukomenako kufika ne ku lubatizhilo?

BA AMY bekala ku kyalo kya Fiji baambile’mba: “Nayukile’mba bintu byo nafunjilenga mu Baibolo byajinga bya kine. Bino byo natendekele kupwanañana na balongo ne banyenga, po po napimpwile byubilo byami ne kubatizhiwa.” Kyaubile ba Amy kitufunjisha kishinka kyanema bingi kya kuba’mba: Muntu ubena kufunda Baibolo wakonsha kukomenako kufika ne ku lubatizhilo umvwe watambula bukwasho ku bakwabo mu kipwilo.

² Musapwishi yense wakonsha kukwasha ba katataka kwiya mu kipwilo. (Efi. 4:16) Painiya wikala ku kyalo kya Vanuatu wa jizhina ja Leilani, waambile’mba: “Kuji ñambilo ya kuba’mba muzhi yense wingijila pamo pa kukomesha mwana. Namona kyo kimotu ne pa kufunjisha bantu kwikala ke baana ba bwanga; kipwilo kyonse kingijila pamo pa kukwasha muntu kwiya mu bukine.” Ba mu kisemi, balunda ne bafunjishi, bonse bengila mwingilo wanema pa kuba’mba mwana akome bulongo. Mwingilo ye bengila ke kutundaika mwana ne kumufunjisha mafunjisho anema. Ne basapwishi nabo bakonsha kukwasha, kutundaika bafunda Baibolo, ne kumwesha byubilo byawama byo bakonsha kufunjilako. Kino kikebakwasha kukomenako kufika ne ku lubatizhilo.—Maana 15:22.

3. Mwafunjilako ka ku byambo byaambile ba Ana, ba Dorin, ne ba Leilani?

³ Mambo ka musapwishi uji na muntu ye afunjisha Baibolo o afwainwa kumvwina bulongo inge bakwabo bapana bukwasho ku muntu ye afunjisha? Monai byaambile nyenga wa jizhina ja Ana, painiya wiikajila wikala ku Moldova. Wambile’mba: “Muntu ubena kufunda Baibolo ukebewa bukwasho mu bintu byavula bingi, kabiji kyakatazha bingi yewa umufunjisha kumukwasha mu mbaji yonse pa kuba’mba atwajijile kuyilako palutwe.” Kabiji painiya wiikajila mukwabo wingijila mu kyonka kino kyalo aye Dorin waambile’mba: “Bimye byavula, basapwishi bamba byambo bifika pa muchima muntu ye mfunjisha Baibolo. Bamba bintu bimo bibula kwiyapo ne mu milanguluko yami.” Ba Leilani baambilepo ne kishinka kikwabo amba: “Muntu ubena kufunda Baibolo umvwe wamona butemwe bumumwesha balongo ne banyenga ne byo bamuta muchima, kyakonsha kumukwasha kuyuka kuba’mba kine twi bantu ba Yehoba.”—Yoa. 13:35.

4. Ñanyi bintu byo tusakwisambapo mu uno mutwe?

⁴ Nangwa byonkabyo, mwakonsha kwiipuzha’mba, ‘Nga amiwa nakonsha kuba byepi pa kuba’mba nkwashe muntu ubena kufunda Baibolo kukomenako inge kechi yami namufunjisha ne?’ Twayai tumone byo twakonsha kuba inge betusendako na kufunjisha muntu Baibolo, ne byo twakonsha kuba inge ufunda Baibolo watendeka kupwila. Kabiji tusakumona ne bakulumpe mu kipwilo byo bakonsha kukwasha bafunda Baibolo kukomenako kufika ne ku lubatizhilo.

INGE MWATANWAPO PA LUFUNJISHO

5. Ñanyi mwingilo ye mwikala nanji inge mukwenu wimusendako na kufunjisha muntu Baibolo?

⁵ Mwina lufunjisho ye uji na mwingilo wa kukwasha ufunda Baibolo kumvwisha Mambo a Lesa. Inge mukwenu wimusendako ku muntu ye afunjisha Baibolo, mwafwainwa kuvulukanga’mba mubena kwingijila pamo. Mwingilo wenu ke wa kukwasha mukwenu ubena kufunjisha yeo muntu. (Sapwi. 4:9, 10) Ñanyi bintu byo mwakonsha kuba pa kuba’mba mwikale bankwasho bawama?

6. Inge bemusendako na kufunjisha muntu Baibolo, mwakonsha kwingijisha byepi jifunde jiji pa Byambo bya Maana 20:18?

⁶ Nengezhai byo musakuya na kufunjisha. Patanshi, ipuzhai mwina lufunjisho kuba’mba emubuuleko biji muntu ye afunjisha Baibolo. (Tangai Byambo bya Maana 20:18.) Mwakonsha kwipuzha’mba: “Ñanyi bintu byo mwayukapo pa muntu ye mufunjisha? Ñanyi mutwe ye musakufundangapo? Ñanyi kishinka kyo mubena kukeba ye mufunjisha Baibolo kumvwisha mu luno lufunjisho? Kujipo kintu kimo kyo nafwainwa kwambapo nangwa kuba, nangwa kyo nafwainwa kubula kwambapo nangwa kuba kimye kyo tusakumufunjishanga nyi? Nakonsha kumutundaika byepi pa kuba’mba atwajijile kukomenako?” Pano bino, mufunjishi kechi wakonsha kwimubuula bya bufyamfya ne, bino bintu byo akonsha kwimubuula byakonsha kwimukwasha bingi. Abino byo bintu mishonale wa jizhina ja Joy byo abuulako basapwishi bo aya nabo ku bantu bo afunjisha Baibolo. Waambile’mba: “Abino bintu bikwasha ye mbena kwingila nanji kuyuka bya kukwasha ye mfunjisha Baibolo ne bya kwambapo kimye kyo tubena kufunda.”

7. Mambo ka o mwafwainwa kunengezhezha lufunjisho inge mukwenu wimusendako ku muntu ye afunjisha Baibolo?

⁷ Inge bemusendako na kufunjisha muntu Baibolo, kyakonsha kuwama kunengezha lufunjisho lo mubena kuya na kufunjisha. (Eze. 7:10) Mulongo Dorin ye twaambapo kala waambile’mba: “Ñumvwa bingi bulongo inge ye mbena kwingila nanji wanengezha lufunjisho. Inge winengezha wakonsha kwamba bintu byakonsha kukwasha ye tubena kufunjisha.” Kikwabo, ye mufunjisha naye ukamona’mba bonse mwajikwinengezha bulongo kabiji naye ukafunjilako. Nangwa inge kechi mwanengezhatu byonse kolololo ne, bino mwafwainwa kuyuka bishinka bikatampe biji mu lufunjisho.

8. Mwafwainwa kuba byepi pa kuba’mba mulombenga milombelo yalumbuluka pa kufunjisha muntu Baibolo?

⁸ Lulombelo ke lubaji lwanema bingi pa kufunjisha muntu Baibolo. Onkao mambo, mwafwainwa kulangulukilapo jimo bya kwamba inge bemwambila’mba mulombe. Kino kikemukwasha kulomba bulongo. (Sala. 141:2) Ba Hanae bekala ku Japan bakivuluka milombelo yalombanga nyenga waingijilanga pamo na bebafunjishanga Baibolo. Baambile’mba: “Namwene kuba’mba uno nyenga wajinga na bulunda bwakosa ne Yehoba, kabiji nakebelenga kwikala nobe aye. Kabiji naumvwanga bingi bulongo inge wantongola pa jizhina pa kulomba.”

9. Kwesakana na byaamba Yakoba 1:19, mwakonsha kuba byepi pa kuba’mba mwikale nkwasho wawama kimye mukwenu kyo abena kufunjisha muntu Baibolo?

⁹ Kwashai ubena kutangijila lufunjisho. Nyenga wa jizhina ja Omamuyovbi wingila bupainiya bwiikajila ku Nigeria waambile’mba: “Nkwasho wawama ulondelamo mu lufunjisho. Usunsapo, bino kechi ulolobwela ne, mambo wayuka’mba kechi ye mwina lufunjisho ne.” Mwakonsha kuyuka byepi kimye kya kwambapo ne bya kwamba kimye kyo mubena kufunjisha muntu? (Maana 25:11) Telekeshainga kimye kibena kwamba mufunjishi ne ye abena kufunjisha. (Tangai Yakoba 1:19.) Umvwe mwauba bino, po po mukayuka kimye kyawama kwambapo. Pano bino, mwafwainwa kulangulukapo bulongo saka mukyangye kwamba. Bintu bimo byo mwafwainwa kubula kuba ke kulolobwela, kuchibikizha bibena kwamba mwina lufunjisho, nangwa kuletapo mutwe ungi. Bino kwambatu byambo bicheche, kwingijisha kimwesho, nangwa bwipuzho, mwakonsha kulengela kishinka kumvwanyika. Bimye bimo, mwakonsha kumona’mba kechi muji na byavula bya kwambapo pa lufunjisho ne. Bino inge mwasanchila muntu ubena kufunda Baibolo ne kumwesha’mba mwamuta muchima, kyakonsha kumutundaika kuyilako palutwe.

10. Kushimikizha bintu byo mwapitamo kwakonsha kukwasha byepi muntu ubena kufunda Baibolo?

¹⁰ Shimikizhaipo bintu byo mwapitamo. Kyakonsha kukwasha bingi muntu ubena kufunda Baibolo nge mwamushimikizhako byo mwafunjile bukine, byo mwashinjilepo lweseko lumo, nangwa byo mwimwena Yehoba byo abena kwimukwasha mu bwikalo bwenu. (Sala. 78:4, 7) Muntu ubena kufunda Baibolo wakonsha kutundaikwa bingi inge waumvwa bino bintu. Byakonsha kukosesha lwitabilo lwanji, nangwa kumutundaika kutwajijila kukomenako kufika ne ku lubatizhilo. Kabiji byakonsha kumukwasha kuyuka bya kushinda lweseko lo abena kupitamo. (1 Pe. 5:9) Gabriel wikala ku Brazil kabiji luno ke painiya wa kimye kyonse uvuluka kintu kyamukwashishe kimye kyo afunjilenga Baibolo. Waambile’mba: “Byo naumvwine bintu byapichilemo mulongo, nafunjijileko kuba’mba Yehoba umona makatazho o tupitamo. Kabiji inge bakwetu bashinda, ne amiwa nakonsha kushinda.”

MUNTU UBENA KUFUNDA BAIBOLO INGE WATENDEKA KUPWILA

11-12. Mambo ka o twafwainwa kutambwilanga na lusekelo bantu bafunda Baibolo beya na kupwila?

¹¹ Pa kuba’mba muntu ubena kufunda Baibolo akomeneko kufika ne ku lubatizhilo, wafwainwa kupwilanga kimye kyonse ne kwivwangamo. (Hebe. 10:24, 25) Mufunjishi wanji wafwainwa kumwitako kwiya na kupwila. Inge waiya na kupwila, atweba bonse twakonsha kumutundaika kutwajijila kwiya ku Nzubo ya Bufumu. Ñanyi mashinda o twakonsha kwingijisha pa kuba’mba tumutundaike?

¹² Mutambwilai na lusekelo. (Loma 15:7) Muntu ubena kufunda Baibolo inge twamutambwila na lusekelo ku kipwilo, kyakonsha kumutundaika kutwajijila kwiya ku Nzubo ya Bufumu. Mwimunai na lusekelo ne kwitako balongo bamo kuba’mba bamuyuke ne aye ebayuke, bino kechi mwafwainwa kuba bintu byakonsha kumulengela kubula kukasuluka ne. Isambainga nanji, mambo kimo kimye umufunjisha wakonsha kukelwako kufika pa kipwilo, nangwa wakonsha kupayankana na mingilo ikwabo mu Nzubo ya Bufumu. Mwafwainwa kutako bingi muchima ku bibena kwamba ufunda Baibolo, ne kumwesha’mba mwamuta muchima. Ki ka kyakonsha kufumamo inge mwatambwila na lusekelo muntu ufunda Baibolo? Akyumvwai kyamwekejile ba Dmitrii, babatizhiwe pa myaka icheche yapitapo kabiji luno babena kwingila bunkwasho mu kipwilo. Bashimikizhe kyamwekele kimye kitanshi kyo bayile na kupwila amba: “Mulongo umo wammwene saka naimana pangye ya Nzubo ya Bufumu na kupembela, waishile na kunsenda twatwela ne mukachi. Bavula baishile na kuñimuna. Nakuminye bingi. Kabiji naumvwine bingi bulongo kya kuba’mba nalangulukilenga’mba nanchi inge tupwilatu pa juba pa juba mulungu yense. Kechi nekimwenepo kala kintu kya uno mutundu ne.”

13. Byubilo byenu byakonsha kulengela muntu ufunda Baibolo kuba byepi?

¹³ Mweshainga byubilo byawama. Byubilo byenu byafwainwa kukwasha muntu ufunda Baibolo kushiinwa kuba’mba wataana bukine. (Mat. 5:16) Ba Vitalii babena kwingila bupainiya luno ku Moldova baambile’mba: “Namwene bantu mu kipwilo byo baikelenga bwikalo bwabo, byo balangulukanga, ne bintu byo baubanga. Kino kyandengejile kushiinwa kuba’mba Bakamonyi ba kwa Yehoba kine benda na Lesa.”

14. Byubilo byenu byakonsha kukwasha byepi ufunda Baibolo kukomenako?

¹⁴ Pa kuba’mba muntu ubena kufunda Baibolo afikilemo kubatizhiwa, wafwainwa kwingijishanga bintu byo abena kufunda. Kuba bino kechi kwapeela ne. Bino ufunda Baibolo inge wamona byo mubena kumwenamo mu kwingijisha mafunde a mu Baibolo, kyakonsha kumutundaika kulondela mu ngayo yenu. (1 Ko. 11:1) Langulukai pa kyakwashishe ba Hanae, bo twaambapo kala. Bashimikizhe’mba: “Bintu byonka byo nafunjilengapo byo byaubilenga balongo ne banyenga. Nafunjijileko byo nafwainwa kutundaikanga bakwetu ne kwibalekelako mambo, ne bya kumwesha butemwe. Kimye kyonse baambanga byawama pa bakwabo. Nakebelenga kulondela byubilo byabo.”

15. Kinembelo kya Byambo bya Maana 27:17 kitukwasha byepi kuyuka ene mambo o twafwainwa kwikela balunda na muntu ubena kufunda Baibolo inge watwajijila kupwila?

¹⁵ Lengai bulunda na muntu ubena kufunda Baibolo. Muntu ufunda Baibolo inge watwajijila kupwila, twajijilai kumuta muchima. (Fili. 2:4) Mwakonsha kwisambanga nanji kuba’mba mumuyuke bulongo. Mwakonsha kumusanchila pa byo abena kupimpula byubilo byanji ne kumwipuzha pa lufunjisho lwanji lwa Baibolo, pa kisemi kyanji, ne pa nkito yanji. Bino kechi mwafwainwa kwipuzha mepuzho akonsha kumulengesha bumvu ne. Misambo ya uno mutundu yakonsha kukosesha bulunda bwenu ne aye. Umvwe mwaikala balunda na muntu ubena kufunda Baibolo, mukamukwasha kukoma kufika ne ku lubatizhilo. (Tangai Byambo bya Maana 27:17.) Ba Hanae luno ke bapainiya ba kimye kyonse. Byo bavulukile byo kyajinga kimye kitanshi kyo bayile na kupwila, baambile’mba: “Byo natendekele kwikala na balunda mu kipwilo, nakebeshanga kuya na kupwila, kabiji nayanga na kupwila nangwatu inge nakooka. Neyowanga bingi kupwanañana na balunda nami bo nalengele mu kipwilo, kabiji kino kyankwashishe kuleka kwikala mulunda na bantu babula kupopwela Yehoba. Nakebelenga kukosesha bulunda bwami na Yehoba ne na balongo ne banyenga. Onkao mambo, nafuukwilepo kubatizhiwa.”

16. Ñanyi bintu bikwabo byo mwakonsha kuba pa kuba’mba mukwashe ufunda Baibolo kukasuluka mu kipwilo?

¹⁶ Muntu ubena kufunda Baibolo inge watwajijila kuyilako palutwe ne kupimpula byubilo byanji, mukwashai kuyuka’mba pano waikala ke lubaji lwa kipwilo. Mwakonsha kuba bino kupichila mu kwikala na muchima wa kutambwila benyi. (Hebe. 13:2) Ba Denis bekala mu kyalo kya Moldova bavuluka kimye kyo bafunjilenga Baibolo amba: “Pa bimye byavula, balongo inge banengezha bijiilo bya mutentamo, betwitangako amiwa ne bakazhi bami. Betushimikizhanga Yehoba byo ebakwasha mu bwikalo bwabo. Kino kitutundaikile bingi. Ino misambo itukwashishe kushiinwa kuba’mba twafwainwa kwingijila Yehoba ne kuba’mba tukekalanga bulongo inge twauba kino.” Inge muntu ubena kufunda Baibolo wafikilamo kwikala musapwishi, mwafwainwa kwingilanga nanji mu mwingilo. Musapwishi umo mu kyalo kya Brazil wa jizhina ja Diego waambile’mba: “Balongo bavula bansendangako mu mwingilo. Kino kyankwashishe kwibayuka bulongo. Nafunjijileko byavula, kabiji naumvwinenga’mba Yehoba ne Yesu baji kwipi ne amiwa.”

BAKULUMPE MU KIPWILO BAKONSHA KUKWASHA BYEPI BAFUNDA BAIBOLO?

17. Bakulumpe mu kipwilo bakonsha kukwasha byepi bantu babena kufunda Baibolo?

¹⁷ Monaingapo kimye kya kwisamba na bantu babena kufunda Baibolo. Anweba bakulumpe mu kipwilo, inge mwata muchima bantu babena kufunda Baibolo, mukebakwasha kukomenako kufika ku lubatizhilo. Mwakonsha kwisambangako nabo kimye kyonse inge baiya na kupwila. Kabiji bakayuka’mba mwibata muchima inge mwavuluka mazhina abo, kikatakata inge batendeka kukumbulapo. Mwafwainwa kunengezha bulongo mutanchi wenu pa kuba’mba muyilenga pamo na basapwishi ku bantu bo bafunjisha. Umvwe ke mube bino, mwakonsha kukwasha bingi ufunda Baibolo. Painiya wa jizhina ja Jackie wikala ku Nigeria, washimikizhe’mba: “Bantu bavula bo mfunjisha Baibolo bakumya bingi inge bayuka’mba mulongo ye naiya nanji mukulumpe mu kipwilo. Umo waambile’mba: ‘Bantangi ba ku chechi kwetu kechi bakonsha kwikyuba ne. Bayatu na kupempula banonshi, kabiji napotu kana bebapa mali.’” Uno muntu luno watendeka ne kupwila.

18. Bakulumpe mu kipwilo bakonsha kwingila byepi mwingilo ye bebapa wanembwa pa Byubilo 20:28?

¹⁸ Funjishainga ne kutundaika boba baji na bantu bo bafunjisha Baibolo. Anweba bakulumpe mu kipwilo, muji na mwingilo wanema bingi wa kukwasha basapwishi pa kuba’mba bengilenga bulongo mwingilo wa kusapwila ne kufunjisha. (Tangai Byubilo 20:28.) Inge musapwishi waumvwa bumvu kutangijila lufunjisho inge mwaingila nanji, anweba tangijilai lolo lufunjisho. Ba Jackie bo twaambapo kala bashimikizhe’mba: “Bakulumpe mu kipwilo kimye kyonse bangipuzha pa bantu bo mfunjisha Baibolo. Inge kuji mumo mo mbula kuba bulongo pa kufunjisha muntu, bambuulako bya kuba.” Bakulumpe mu kipwilo bakonsha kutundaika bafunjishi ba Mambo a Lesa kutwajijila kwingila na mukoyo. (1 Tesa. 5:11) Ba Jackie banungilepo’mba: “Ñumvwa bingi bulongo inge bakulumpe mu kipwilo bantundaika ne kumbuula’mba bansanchila pa byo ñingila na ngovu. Byambo bya uno mutundu bintekenesha bingi, byumvwanyikatu nobe muntu watoma mema a munyango kimye kyo kwatwa bingi kyuya. Byambo byabo bya kifyele bindengela kumvwa’mba mbena kwingila bulongo mwingilo wa kufunjisha bantu Baibolo, kabiji ngikala bingi na lusekelo.”—Maana 25:25.

19. Ñanyi kintu kyakonsha kwituletela lusekelo atweba bonse?

¹⁹ Nangwatu inge kya kuba pa kino kimye kechi tujipo na muntu ye tufunjisha Baibolo ne, bino twakonsha kukwasha boba babena kufunda kukomenako kufika ku lubatizhilo. Twakonsha kukwasha mukwetu ubena kufunjisha muntu Baibolo kupichila mu kusunsapo inge twanengezha bulongo. Bino kechi twafwainwa kwamba byavula ne. Twakonsha kulenga bulunda na bantu babena kufunda Baibolo inge baiya ku Nzubo ya Bufumu, kabiji twafwainwa kumweshanga byubilo byawama. Bakulumpe mu kipwilo bakonsha kutundaika babena kufunda Baibolo kupichila mu kumonapo kimye kya kwisamba nabo. Kabiji bakonsha kutundaika basapwishi kupichila mu kwibafunjisha bya kwingila ne kwibatakaika. Kwambatu kine, kafwako kintu kikwabo kyakonsha kwituletela lusekelo kyakila pa kuyuka kuba’mba twakwashisheko muntu kutemwa Shetu eye Yehoba ne kutendeka kumwingijila ne.