Kiyukilo Kya Lwitabilo Lwakosa!
1. Binkunka ka Yesu byo aambijile jimo?
1 Batumwa batelekeshenga bingi Yesu byo aambilenga pa mambo a kwikalapo kwanji pa Bufumu ne mpelo ya buno bwikalo. Patanshi wakyambile’mba, bantu bakaponenwa na binkunka—makondo, kukepelwa kajo, bitentanshi ne myalo. Kya bubiji, waambile’mba, baana banji ba bwanga bakebashikwa, kwibafikizha mu malwa ne kwibepaya. Bangauzhi babubela bakamweka ne kutwala mungi bantu bavula. Kabiji amba butemwe bwa bavula bukayanga na kukepa.
2. Mambo ka o kyaikela kya kukumya kuba’mba mambo awama abena kusapwilwa mwaya ntanda yonse?
2 Panyuma ya kutongaula bino binkunka, kyamweka batumwa bakuminye bingi Yesu byo aambile’mba mambo awama a Bufumu bwa Lesa akasapwilwa panopantanda ponse. (Mat. 24:3-14) Lelo jino, tubena kwimwena kufikizhiwa kukatampe kwa buno bungauzhi buleta lusekelo. Nangwa kya kuba tubena kwikala mu bimye byakatazha, Bakamonyi ba kwa Yehoba bakosako bingi na kusapwila mambo awama. Butemwe bwa bapanopantanda byo bubena kuya na kukepa, atweba bwetu pano po pene po bubena kubayilakotu. Nangwa kya kuba “ba mu mikoka yonse ya bantu” betushikwa, tubena kusapwila mu byalo byavula bingi.
3. Bibelengelo ka bibena kutundaika byo mwamona mu sawakya wa ntanda yonse?
3 Byo kibena kutundaikapo pa kumona mwingilo wa Bakamonyi ba kwa Yehoba ye baingijile mu mwaka wa mwingilo wapwa byonka byo kyamweshiwa pa chati iji pa peja 3 kufika ku 6! Pa myaka 16 yapitapo, baingila maawala kukila pa bilyonyi umo mu mwingilo wa kusapwila ne kulenga baana ba bwanga. Byo kyaikalapo kiyukilo kya lwitabilo lwakosa! Kibelengelo kya bapainiya kyayilako palutwe na 5.8 pesenti, kya basapwishi na 3.1 pesenti ne kya mafunjisho a Baibolo na 4.4 pesenti. Kibelengelo kya bantu babatizwe kyayilako palutwe na 20.1 pesenti kukila kya mwaka wa mwingilo wapwa. Kibena kusangajika bingi pa kumona’mba bantu bafika pepi na mamilyonyi atanu na abiji babena kwingijila Yehoba mu bukishinka. Kino kibelengelo kyabaya bingi kukila bibelengelo byonse byajingako kunyuma kwe! Umvwe mwabalaula bibelengelo biji pa chati, kintu ka kyo mwamona kikatakata kibena kwimutundaika?
4. Makatazho ka mwanamulume umo o ashinjile byo akebelenga kubatizwa?
4 Nangwa kya kuba bino bibelengelo byabaya, twafwainwa kuvulukanga’mba bibena kumwesha bantu baji na lwitabilo lwakosa. Akimonai kya kumwenako. Guillermo wakomejile mu kyalo kya Bolivia. Wasemenwe mu 1935, kabiji waingilanga mu bujimi bwa bichi bya coca kutendekatu kimye kyoajinga na myaka itanu na ina. Kufumatu ku bwanyike bwanji, waendangatu na kunyeuna mabula a coca amba amukwashenga kubula kumvwa mabinjila pa kwingila mingilo ikatampe. Mu kuya kwa moba watendekele kutoma bingi malwa ne kupepa fwanka. Byo atendekele kufunda bintu Yehoba byo akeba’mba bantu bobenga, Guillermo wasankijilepo kupepa fwanka ne kutoma malwa. Lukatazho lukatampe lo ashajile nalo lwajinga lwa kuleka kunyeuna mabula a coca o atendekele saka ajitu mwanyike. Wakoseleko bingi na kulomba kabiji ne kino kisela wikilekele. Byo asankijilepo bino byubilo, wabatizwe. “Pano luno,” wamba’mba, “Mbena kwiumvwa watokeshiwa kabiji walusekelo.”
5. Musaka kuba ka?
5 Yehoba wata bingi bantu muchima. Usaka bantu bonse kulapila. (2 Pe. 3:9) Ne atweba byo byo tusaka. Twayai tutundaikwenga kwingila na ngovu kukwasha bantu bamichima ya kishinka kuyuka ne kumutemwa Yehoba byonka byo twamutemwa.