Kumwesha Lusanchilo pa Mwingilo Wetu
1. Mutumwa Paulo wamwenenga byepi mwingilo wanji?
1 Mutumwa Paulo wanemekele bingi mwingilo wanji; wamutumbijikile kabiji ne kuyuka’mba uno mwingilo wamwesheshe lusa lwa Lesa. (1 Timo. 1:12, 13) Nga luno lusanchilo lwakonsha kukwasha byepi bantu ba Yehoba lelo jino?
2. Ki ka kyakonsha kwitukwasha kuyanga mu mwingilo kimye kyonse?
2 Kwingilako Kimye Kyonse Kwanema Bingi: Jishinda jimo jo twakonsha kumwesheshamo lusanchilo lwetu mu mwingilo, ke kumwingila kimye kyonse pa ñondo pa ñondo. Kyawama bingi kuyuka Yehoba byo etupesha pakatampe. Twafwainwa kusanta bingi pa mfweto ikatampe ne icheche ifuma mu kwenda na Lesa. Byonkatu bantu benda na kutamba bya kutambatamba byo batemwa pa kumona bintu byawama nabiji mabwe atentakana, maluba awama, mitumba ikatampe ne binkunenke nangwa banyama ba mungye. Kya kine, kuyuka bintu Lesa byo etubila, kwakonsha kwitulengela kimye kyonse kulanguluka pa bintu byo twakonsha kubulako bantu pa mambo a buwame bwa Yehoba Lesa wetu.
3. Ñanyi mwingilo wanema ba Paulo ne Apolosa ye baingijilenga, kabiji ki ka kyo twafwainwa kulangulukangapo?
3 Paulo ne Apolosa batangijilwenga na Lesa pa kwingila mwingilo wanema wa ku mupashi wa kubyala ne kutekezha. Ne atweba tuji na jishuko jikatampe ja kwingijila pamo ne Lesa. (1 Ko. 3:9.) Byo tuji bantu ba mu kipwilo kya bwina Kilishitu, twatundaikwa kulanguluka langulukangapo pa mingilo yonse ne buwame bwa Lesa pa kuba’mba mwingilo ne milambo yetu bimweshenga’mba tubena kusanchila Lesa. Umvwe twi bantu bamwesha lusanchilo kya kine, kechi tukalekapo ñondo nangwa umo kupita kwa kubula kwambapo pa buwame bwa Yehoba ku bantu ne.
4. (a) Nga byambo biji mu Salamo 116:12 byafikizhiwe byepi mu bwikalo bwa kwa Yesu byo ajinga panopantanda? (b) Nga buwame bwa Yehoba bwakonsha kwitulengela kuba ka?
4 Salamo 116:12 waamba’mba: “Lelo i kika kyo nkamupa Yehoba na mambo a byanji byonse byawama byo angubila?” Abye byambo ke lubaji lumo lwa “Masalamo a Kutota” kampe Yesu o aimbile bufuku saka akyangye kufwa. (Mat. 26:30) Ki ka kyajinga mu milanguluko yanji byo aimbilenga bino byambo kimye kya Kijiilo kya Lupitailo kya Bayudea? Kyamweka walangulukilenga pa mubiji wanji waoloka Yehoba ye amunengezhejile ne kumupana mu bukitapisho mu kumwesha butemwe bwanji bukatampe. (Hebe. 10:5) Po pamotu ne atweba, twamona buwame bwa Yehoba pa kimye kyo twamwingijila. Onkao mambo, twafwainwa kumwesha’mba twamutemwa Yehoba kupichila mu kwingilako pakatampe mu mwingilo. Ee, kikebewa bingi kwibikako mu kwingijila Lesa. Pano bino, mfweto ijimo mu kumwingijila yakila pa byonse byo twasha.−Fili. 3:7, 8.
5. Twakonsha kumwesha byepi’mba tuji na kikoloto kwi Yehoba, Shetu kabiji mpanyi wa ‘bintu byonse’?
5 Kimye kyo Twingilako: Jishinda jikwabo jo twafwainwa kulangulukapo ke kumona kubaya kwa kimye kyo twingilako mu mwingilo. Yehoba Lesa wetu mpanyi bingi! Mutumwa Paulo waambile’mba: “[Yehoba] upana mweo ku bonse, ne muya, ne bintu byonse.” (Byubilo 17:25) Mulenga wetu kechi ukeba’mba bantu kanatu bapane bintu byonse byo baji nabyo ne. Bino, Yehoba wamwesha kuba’mba, umvwa bingi bulongo umvwe bantu bepana abo bene mu kumwesha lusanchilo lwabo mu mpopwelo ya kine. (Hebe. 10:7) Pano, twakonsha kuba byepi pa kuba’mba twikalengako na kimye kyabaya kya kwingijilamo mwingilo wanji?
6. Pa mambo a mwingilo wetu, kikonkwanyi ka atweba bonse kyo twafwainwa kwibikila?
6 Bapainiya ba kukwasha, bapainiya ba kimye kyonse, bapainiya beikajila kubikakotu ne bamishonale, baji na kipimo kya maawala o bafwainwa kufikizha. Basapwishi mu kipwilo nabo batundaikwa kwibikila kikonkwanyi kya maawala o bafwainwa kwingilangako pa ñondo pa ñondo. Tuji na mwingilo mukatampe ye twafwainwa kupwisha mu kino kimye kicheche kyashalako, mpelo ya buno bwikalo saka ikyangye kufika. Myaka makumi abiji apitapo Mwingilo Wetu wa Bufumu waambile’mba: ‘Bamo bakonsha kusapwilanga kimye kyonse mu mwingilo wa mu bujimi pa ñondo pa ñondo kutendekatu na mulungu mutanshi pa Mulungu. Umvwe twafikizha kino kikonkwanyi, kiketulengela kwingilanga kimye kyonse ne pa mobatu akwabo a mu yewo ñondo.’
7. Bwipuzho ka bo twakonsha kwishikisha pa muntu pa muntu pa mambo a kubaya kwa kimye kyo twingilako mu mwingilo kabiji twafuukula kuba ka?
7 Kya kine, kafwako wakonsha kwitubikila kikonkwanyi ne kimye kyo twafwainwa kwingilangako mu mwingilo ne. Nangwa byonkabyo, bwipuzho bwakonsha kwipuzhiwa ke bwa kuba’mba: ‘Nangwa kya kuba kechi njipo na kipimo kya maawala o nakonsha kwingila ne, nanchi kino kyakonsha kundengela kubula kwingilanga kimye kyabaya mu kuba kyaswa muchima wa Yehoba nyi?’ Bantu bonse bafwainwa kwipana abo bene kwi Mulenga wabo, awo ukebanungilapo mapesho akwabo, byonkatu byo kyajinga ku bena Levi kala baingilanga mwingilo wazhila wa Yehoba mu tente wa lusambakeno kabiji ne mu nzubo ya Yehoba mu Yelusalema. Onkao mambo, twayai tufuukulepo kutwajijila kwingila bulongo mwingilo wa Yehoba kupichila mu kusapwila kimye kyonse pa ñondo pa ñondo kabiji inge kyakonsheka, twibikengako kwingila kimye kyabaya mu mwingilo kumwesha’mba twamusanchila Yehoba pa kwitupa uno mwingilo.