Nengezhai Bulongo bya Kufunjisha
1. Mambo ka o twafwainwa kukwasha ye tubena kufunjisha kumvwisha byo abena kufunda mu Baibolo?
1 Pa kufunjisha lufunjisho lwa Baibolo, twafwainwa kunengezha bulongo umvwe tukeba kulengela muntu kwingijila Yehoba. Pa kuba’mba ye tubena kufunjisha omvwishe byo abena kufunda mu Baibolo, twafwainwa kwibikako. Kino kikamulengela naye kutako muchima. (Mpitu. 6:5; Mana. 4:23; 1 Ko. 9:26) Pano twakonsha kuba byepi kino?
2. Lulombelo lwakonsha kwitukwasha byepi kunengezha lufunjisho?
2 Lombai Saka Mukyangye Kutendeka Kunengezha: Byo kiji kuba’mba Yehoba ye ukomesha lukunwa wa bukine mu muchima wa muntu, kyanema bingi kumona’mba saka tukyangye kutendeka kunengezha, twamulombelako mu mbaji mo akebewa kumukwasha. (1 Ko. 3:6; Yako. 1:5) Lulombelo lwa uno mutundu lwakonsha kwitukwasha ne atwe bene kumona byo twakonsha kumukwasha kuyuzha muchima wanji ‘maana a kuyukisha’ kyaswa muchima wa Yehoba.—Kolo. 1:9, 10.
3. Twakonsha kunengezha byepi aku na kulanguluka pa muntu ye tufunjisha?
3 Langulukaingapo pa ye Mufunjisha: Yesu wayukile’mba kufunjisha bulongo kwavwangamo ne kulangulukapo pa bantu. Pa bimye bibiji, Yesu bamwipwizhe bwipuzho buntutu bumo bwa kuba’mba: “Lelo ngube ka namba, ntambule bumi bwa myaka?” Pa kukumbula, kechi wakumbwilangatu mu jishinda jimo ne. (Luka 10:25-28; 18:18-20) Ne atweba pa kunengezha, twafwainwa kulangulukanga pa muntu ye tufunjisha. Binembelo ka biji mu lufunjisho byo tusakutanga nanji? Twafwainwa kupelela pepi? Bishinka ka biji mu lufunjisho byakonsha kumukatazha kumvwa nangwa kwitaba? Umvwe saka tulangulukapo pa mepuzho amo o akonsha kwipuzha, tukenengezhezha jimo kukumbula bulongo.
4. Kunengezha bulongo kwavwangamo ka?
4 Kupitulukamo: Nangwa kya kuba abyo byambo twibifunjishapo ku bavula, kikala kimye kitanshi kwibifunjisha ku muntu mukwabo. Umvwe tukeba kumufika pa muchima, kyanema bingi kunengezhezha jimo. Kino kibena kulumbulula’mba ne atweba tubenga byonka byo tutundaika ye tufunjisha. Pitulukaimo mu lolo lufunjisho ne binembelo bijimo saka mubena kulanguluka pa ye mufunjisha, kabiji kampepo ne kushabula pa bishinka.—Loma 2:21, 22.
5. Twakonsha kulondela byepi Yehoba?
5 Yehoba ukeba kumona bantu babena kufunda Baibolo saka bakomenako. (2 Pe. 3:9) Umvwe saka twikalako na kimye kya kunengezha lufunjisho lwa Baibolo, ne atweba tumwesha butemwe.