Nkalata Kufuma ku Jibumba Jitangijila

Ku Bakwetu Bakamonyi ba kwa Yehoba:

Byo jaikalapo jishuko kwi atweba ja kutelwa pa jizhina ja Nkambo Walengele bintu byonse, aye Yehoba! Jino jizhina ja myaka, kechi jikonaunwa nangwa kwesakana na akwabo ne. Yehoba ye witutumbile jino jizhina janji kabiji kikatakata kufuma mu mwaka wa 1931, twayukanyikwa bingi na jino jizhina. (Isa. 43:10) Tutemwa bingi kwiyukisha’mba twi Bakamonyi ba kwa Yehoba.

Diabola waeseka bingi na ngovu kuzhimañanya jino jizhina ja Lesa. Ubena kutundaika ba mu mikoka ya bantu kukana jizhina ja Yehoba. Babilona Mukatampe, bufumu bwa ntanda yonse bwa bupopweshi bwa bubela, bwashikwa bingi jizhina ja Lesa kabiji bejifumyamo ne mu ma Baibolo avula. Kupusanako, Yesu aye wanemekele bingi jizhina ja Shanji, kutendekelapo kwijitongola mu lulombelo lwanji lo afunjishe baana banji ba bwanga. Waambile’mba: “Byonkabyo sa mulomba byonka bino amba, Tata wetu wa mwiulu, Jizhina jenu jizhile.” (Mat. 6:9) Palutwe kacheche, pa kulomba kwi Shanji kufuma panshi ya muchima, waambile’mba: “Namwesheshe jizhina jenu kwi aba bantu bo mwampele mu ba panopantanda.” (Yoa. 17:6) Byo twakebesha bingi kulondela byaubanga Yesu, atweba bonse twayai twibikisheko kuyukanyikisha jizhina ja Yehoba mwaya ntanda yonse.

Kinembelo kya mwaka kya mu 2009 kyajinga na mutwe wa kuba’mba, ‘Bujishai bantu mambo awama,’ kitutundaikile kwingila bulongo mwingilo wetu. (Byu. 20:24) Kine, Yehoba witupesheshe bingi kwingila bulongo mu mwaka wa mwingilo wapwa. Bukamonyi bwashimwinwe ntanda yonse ne kuleta lukumo ne munema pa jizhina ja Yehoba. Kibelengelo kyakatataka kya basapwishi 7,313,173 bakwatankenejile pamo kusapwila ne kufunjisha bantu ba michima ya kishinka babena kukeba mashinda mwa kupwishisha makatazho avula o babena kupitamo pa juba pa juba. Kibelengelo kya bantu 18,168,323 batainwe ku Kivuluko kya lufu lwa kwa Kilishitu, kimwesha’mba bantu bavula bakonsha kwinungako kufunda kwita pa jizhina ja Yehoba mpelo ya buno bwikalo bubi saka ikyangye kufika.

Kikulutu mwine Yehoba wikiswisha, tusakutwajijila kusapwila mambo awama a Bufumu na mukoyo, kwingijisha mashinda onse a kukwashishamo bantu baji mu manyaunda etu. (Mat. 24:14; Mako 13:10) Kikale kusapwila ku nzubo ku nzubo, kusapwila kwingijisha makalata, lamya nangwatu busapwishi bwa kushukilwa, twayai twibikeko bingi kuyukanyikisha jizhina ja Yehoba ne nkebelo yanji ku bantu bavula.

Tuji na bishinka byavula bingi bya kuketekela’mba Yehoba katatakatu akazhijike jizhina janji. (Ezi. 36:23) Juba jafwenya kala pepi ja konawinamo aba bonse babula kunemeka jino jizhina. Kine, jino juba jikawamina bingi bakalume ba Yehoba bakishinka bonse, bayukanyikisha jizhina ja Yehoba ne kutumbijika bumfumu bwanji!

Kushonkena kwa nkambi ne kukonkana kwa mikoka kwaubiwe mwaya ntanda yonse mu 2009 kwa “Labainga Mukenkentenga!,” kwamwesheshe’mba kine Yehoba wata muchima bantu banji. Kuno kushonkena kwanemene bingi mu jibumba jetu kabiji kwitutundaikile kuvulukanga juba ja Yehoba.—Mako 13:37; 1 Tesa. 5:1, 2, 4.

Kwambatu kine, Yehoba wawama bingi kwi atweba kabiji witulengela michima yetu kwikala ya lusekelo. Witulajika mu nsono ya munyemvu kabiji ne kwitutangijila mu misezho ya mema azhindama.—Sala. 23:1, 2; 100:2, 5.

Yukai’mba mapesho a Yehoba akekala pe anweba byo mukatwajijila kwingijila Yehoba!

Twimwimuna bonse mutende wa bwina Kilishitu,

Atweba balongo benu,

Jibumba Jitangijila ja Bakamonyi ba kwa Yehoba