Ba Mwingilo wa Bwina Kilishitu Bafwainwa Kulombanga
1. Ki ka kyakonsha kwitukwasha kwingila bulongo mwingilo?
1 Mwingilo wa kusapwila kechi twakonsha kumwingila bunke bwetu ne. Yehoba ye witupa bulume bwa kumwingila. (Fili. 4:13) Wingijisha ba malaika banji kwitukwasha kutana bantu ba michima ya bumukooko. (Lum. 14:6, 7) Yehoba ye ulengela nkunwa ya bukine yo tubyala ne kutekezha kukoma. (1 Ko. 3:6, 9) Kyanema bingi ba mwingilo wa bwina Kilishitu kulombanga kwi Shetu wa mwiulu.
2. Bintu ka byo twafwainwa kulombangapo?
2 Atweba Bene: Twafwainwa kulombanga kimye kyonse kyo tubena kusapwila. (Efi. 6:18) Bintu ka byo twafwainwa kulombangapo? Twakonsha kulomba ku ba’mba tuchinchike ne kwikala na muchima wawama na nyaunda yetu. (Byu. 4:29) Twafwainwa kulomba Yehoba kwitutangijila ku bantu ba michima yawama bo twakonsha kufunjisha Baibolo. Inge mwina nzubo witwipuzha bwipuzho, twakonsha kulomba lulombelo lwa bukiji bukiji kwi Yehoba kuba’mba etukwashe kukumbula bulongo. (Ne. 2:4) Twakosha ne kulomba maana kuba’mba tutangizhengako mwingilo wetu wa kusapwila. (Yako. 1:5) Yehoba utemwa bingi umvwe mu milombelo ke tumusanchile pa kwitupa uno mwingilo wanema.—Kolo. 3:15.
3. Kulombelako bakwetu kulengela byepi mwingilo wa kusapwila kuyilako palutwe?
3 Bakwetu: Twafwainwa ‘kwilombelako’ atweba bene na bene ne kutongola mazhina a bakwetu bamwingilo pa kulomba inge kyakonsheka. (Yako. 5:16; Byu. 12:5) Nanchi kukolwa kwimulengela kubula kwingilako pakatampe mu mwingilo wa kusapwila nyi? Inge byo byo kiji, lombelaingako bakwenu bamwingilo baji na butuntulu bwa mubiji bwawama. Kange mulengulule milombelo yenu ne! Mwakonsha ne kulomba kuba’mba bandamabyalo bekale na muchima wawama na mwingilo wetu wa kusapwila pa kuba’mba balongo betu bekale “mu bwikalo bwa mutende ne bwazhindama.”—1 Timo. 2:1, 2.
4. Mambo ka o twafwainwa kukelwa mu lulombelo?
4 Kutaya mbila ya mambo awama panopantanda ponse ke mwingilo ye twafwainwa kubula kwingila mu ngovu yetu. Inge ‘kasa tukelwa mu lulombelo,’ Yehoba uketukwasha kwingila bulongo mwingilo ye etupa.—Loma 12:12.