‘Maana Beabingisha ku Mingilo Yao’
1. Mwingilo wetu bamumona byepi ku bantu bamo?
1 Kimo kimye bena mazubo babula kwituyuka bulongo nangwa bo babepa pa mambo a biji Bakamonyi ba kwa Yehoba bakana kutambwila mambo awama o twibasapwila. Kampe baumvwine byambo byatama pa mwela ne mu mapepala a byambo bibalengela kwitupata. Mu mapunzha amo, betutela ne kuba’mba “jibumba jatama bingi.” Pano twafwainwa kuba byepi umvwe betwambila bino byambo?
2. Ki ka kyafwainwa kwitukwasha kubula kulefulwa inge betwambila byambo byatama?
2 Twajijilai Kwikala na Muchima Wawama: Yesu ne bakalume bakwabo ba kwa Yehoba ba mu myaka kitota kitanshi javula kechi bebayukile byo bajinga ne, kabiji bebambilanga bingi byambo bya bubela. (Byu. 28:22) Pano bino, byambo byatama byo bebambilanga kechi bibalengelanga kumvwina bumvu mwingilo wabo ne. Yesu waambile’mba: ‘Maana beabingisha ku mingilo yao.’ (Mat. 11:18, 19) Watwajijile kuba kyaswa muchima wa Shanji na kizaku, ne kuketekela amba aba bakebelenga kya kine kufunda bukine bakamona buneme bwa mambo awama. Ne atweba twafwainwa kuchinuzhuka byambo bilefulañana kupichila mu kuvulukanga amba Mwana Lesa naye bamwambilanga byonkabyo.
3. Mambo ka byambo byatama ne kumanyikwa kubiwa kyo byafwainwa kubujila kwitulengela kukumya?
3 Yesu waambile’mba ba panopantanda bakashikwa baana banji ba bwanga byonkatu byo bamushikilwe aye. (Yoa. 15:18-20) Onkao mambo, byambo byatama ne kumanyikwa kubiwa lelo jino kechi byakonsha kwitulengela kukumya ne. Twafwainwa kuketekela bino bintu kuvujilako monka mu kuya kwa moba apelako kabiji ne bukaji bwa kwa Satana byo bubena kubayilako. (Lum. 12:12) Twafwainwa kusekela mambo bino bintu byamwesha amba ntanda ya kwa Satana katatakatu ikonaunwe.
4. Umvwe betwambila byambo byatama na mambo a mambo awama, twafwainwa kukumbula byepi?
4 Kumbulainga Bulongo: Umvwe betwambila byambo byatama, twafwainwa kimye kyonse kukumbulanga bulongo na jiwi jakoka. (Mana. 15:1; Kolo. 4:5, 6) Umvwe kyakonsheka, twakonsha kulondolwela mwina nzubo amba Bakamonyi ba kwa Yehoba bebabepela bingi bintu byavula, nangwa kumwipuzha ene mambo o alangulukila mu jojo jishinda. Kukumbula na jiwi jakoka kwakonsha kumulengela kuzhinauka bintu byo omvwa pa Bakamonyi ba kwa Yehoba kabiji kikamulengela kutelekako ne kimye kikwabo kyo bakamufwakesha kwi Kamonyi. Pano umvwe mwina nzubo wazhingila, kyakonsha kuwama kufumapo mu meso anteka. Twafwainwa kuketekela amba nangwa bantu betumone byepi, Yehoba aye wanemeka bingi mwingilo wetu.—Isa. 52:7.