“Mwikale mu Mutende na Bantu Bonse”
1. Ñanyi lujimuno lwa mu Baibolo lo twafwainwa kulondela inge mwina nzubo wazhingila?
1 Bantu ba Yehoba batemwa mutende, kabiji mwingilo wetu wa kutaya mbila ya mambo a mutende. (Isa. 52:7) Nangwa byonkabyo, bimye bimo bantu botutana mu mwingilo bazhingila bingi inge twaya pa mazubo abo. Ki ka kiketukwasha kwikala bamutende inge twatana bantu ba uno mutundu?—Loma 12:18.
2. Mambo ka o kyanemena kwikala na milangwe?
2 Ikalai na Milangwe: Nangwa kya kuba bamo bazhingila na mambo a kubula kukeba kumvwa bukine, bakwabo nabo kechi bazhingila na mambo a kwibasapwila ne, kujitu bintu bikwabo bibalengela kuzhingila. Kampe twaishile pa kimye kyabula kufwainwa. Mwina nzubo wakonsha kuzhingila na mambo a makatazho o aji nao. Nangwa inge mambo awama o a muzhingijisha, twafwainwa kuvuluka kuba’mba kampe wazhingila mambo bamuluwika. (2 Ko. 4:4) Kwikala na milangwe kuketukwasha kubula kuzhingila ne kubula kumona nobe yetu azhingijila.—Mana 19:11.
3. Twakonsha kumwesha byepi mushingi ku mwina nzubo?
3 Mweshainga Mushingi: Bantu bavula mu nyaunda baji na bintu byo baitabilamo na muchima yense. (2 Ko. 10:4) Baji na lūsa lwa kuteleka ku mambo awama nangwa ne. Kechi twafwainwa kulengulula byaitabilamo mwina nzubo nangwa kumulengela kwiumvwa’mba atweba twayuka byavula kukila aye ne. Inge betwambila’mba tufumepo, twafwainwa kumvwina ne kufumapo na mushingi.
4. Kwamba na kifyele kulumbulula ka?
4 Ambainga na Kifyele: Nangwa kya kuba betwambila byambo byatama, twafwainwa kukumbula na butekanye ne na kifyele. (Kolo. 4:6; 1 Pe. 2: 23) Mu kifulo kya kwipachika, twafwainwa kuyuka kyalengela. Kampe twakonsha ne kwipuzha mwina nzubo kyalengela kuba’mba akane. Pa kuba’mba tubule kwibazhingijisha, kyakonsha kuwama kubula kutwajijila na mwisambo.—Mana 9:7; 17:14.
5. Ñanyi bintu byawama bifumamo inge twaikala bamutende mu mwingilo?
5 Umvwe twaikala bamutende, mwina nzubo ukavulukanga byubilo byetu kabiji ukateleka inge bakwabo baiya na kumusapwila. (Loma 12:20, 21) Nangwa akane byepi, juba jimo ukekala mulongo wetu. (Nga. 1:13, 14) Nangwa mwina nzubo ukeba kumvwa bukine nangwa ne, tukanemeka Yehoba kabiji tukalengela mwingilo wetu kubula kunenwa bibi inge twaikala na muchima wa kwikanya kabiji wamutende.—2 Ko. 6:3.