Kuwamishako Busendwe Bwetu bwa Kusapwila—Bya Kukumbula Mwina Nzubo Wazhingila

Ene Mambo o Kwanemena: Bantu bavula botutana mu mwingilo baswa kwibasapwila. Pano bino Yesu waambijile jimo amba bamo baketushikwa. (Yoa. 17:14) Onkao mambo, kechi twafwainwa kukumya inge twatana mwina nzubo wazhingila ne. Umvwe twatana bantu ba uno mutundu, twafwainwa kukumbula mu jishinda jitokesha Yehoba ku muchima. (Loma 12:17-21; 1 Pe. 3:15) Kuba bino kukalengela mwina nzubo kufwomoka. Kabiji kikapana bukamonyi ku mwina nzubo ne bantu babena kumonako ne kuswa kwi basapwila inge kwaiya Bakamonyi ba kwa Yehoba kimye kikwabo.—2 Ko. 6:3.

Byo Twafwainwa Kuba:

Batekenyai ne kumwesha byubilo byawama. Kino kikafwomona bukaji. Kange mulanguluke amba bazhingijila anweba ne. (Sapwi. 7:9) Kampepo bazhingila na mambo a makatazho nangwa mwaiya pa kimye kyabula kufwainwa. Kimye kimo bakonsha kuzhingila kwi basapwila na mambo a bubela bo bebabula pa Bakamonyi.—2 Ko. 4:4.
Bakumbulai na jiwi jakooka ne byambo byawama. (Maana 15:1) Nanchi mwaji kwibabusha pa tulo nangwa paji byo baji kubanga nyi? Nangwa kya kuba twakonsha kusapwila ku bantu pa kimye kiji kyonse, bino tulomba lulekelo lwa mambo inge twibasolomoka pa kimye kyabula kufwainwa. Nanchi wazhingila na mambo a nkuwa ya bubela yo bamubula pa Bakamonyi nyi? Umvwe byo kiji, ambai amba: “Naswa kuba’mba kino kyakonsha kwimuzhingijisha. Pano bino, byo bemubula kechi bya kine ne. Nanchi ne mubule byo kiji nyi?” Nanchi ukaana bimo byo twaitabilamo nabiji byaamba pa kupanga muntu mu kipwilo nangwa pa bya mashi nyi? Mwakonsha kwamba’mba: “Naumvwa byo mwaamba. Bantu bakwabo nabo byo bamba. Nanchi musa kuswa kwimumwesha byamba Baibolo pa kino nyi?”
Umvwe kya kuba muntu wazhingila bingi, kyakonsha kuwama kuya kwakubula kumukumbula. Umvwe waamba’mba kechi mbena kukeba kukamonapo Bakamonyi ba kwa Yehoba pano ne, mwafwainwa kumubula amba twaumvwa.

Esekai Kuba Bino Uno Ñondo:

Pa kupopwela kwa kisemi, mweshai byo mwafwainwa kuba inge mwina nzubo wazhingila.
Inge mwafuma pa nzubo ya muntu wazhingila, isambai na ye mubena kwingila nanji byo mwaji kufwainwa kukumbula.