Kwashai Mwina Nzubo Kulangulukapo
1. Ñanyi jishinda jawama kusolomokelamo bantu mu mwingilo?
1 Ñanyi jishinda jawama kusolomokelamo bantu mu mwingilo? Abya ja kuminatu kumo nyi, inyi ja kukwasha mwina nzubo kulangulukapo ne kwitaina mukumbu wa kine? Mutumwa Paulo wakwashanga bantu kulangulukapo kimye kyo esambanga na Bayudea mu Tesalonika kabiji “bamo baitabijile.” (Byu. 17:2-4) Ki ka kyavwangwamo mu kukwasha bantu kulangulukapo?
2. Twakonsha kulondela byepi byaubanga Paulo kimye kyo tusapwila mambo awama?
2 Langulukainga pa byo Beumvwa ne Nkomeno Yabo: Pa kuba’mba mukwashe bantu ba mu nyaunda yenu kulangulukangapo, mwafwainwa kuyuka byo beumvwa. Paulo watendekele mwisambo na Bangiliki babujile kwitabila ba mu Aleopagusa kupichila mu kutongola bintu byo bayukijile jimo ne kwitabila. (Byu. 17:22-31) Onkao mambo, pa kunengezha bya kwisamba, langulukainga pa bintu byo mwaitabilamo pamo na bantu ba mu nyaunda yenu ne byo mwapusenamo. (1 Ko. 9:19-22) Umvwe mwina nzubo wakana byo mubena kwamba, esekai kwamba pa bintu byo ayukila jimo ne kwisamba nanji pa byonkabyo bintu.
3. Twakonsha kwambañana byepi na bantu kupichila mu kwingijisha bulongo mepuzho?
3 Ingijishainga Bulongo Mepuzho: Kechi twakonsha kukwasha kañenda kufika ko abena kuya inge kechi twayuka ku mpunzha kwine ko aji ne. Kyo kimotu, kechi twakonsha kukwasha mwina nzubo kutana mukumbu inge kechi twayuka byo abena kulanguluka ne. Saka akyangye kutendeka kwambañana na muntu, Yesu waipuzhanga mepuzho pa kuba’mba ayuke bibena kulanguluka yewo muntu. Kyakumwenako, Yesu bamwipwizhe ku muntu amba: “Ñanyi kintu kyo nafwainwa kuba pa kuba amba nkekale na bumi bwa myaka?” Saka akyangye kumukumbula, Yesu wakebelenga kuyuka byalangulukilenga yewa muntu. (Luka 10:25-28) Pa kimye kikwabo, kimye Petelo kyo akumbwile mukumbu wabula kufwainwa, Yesu waingijishe bulongo mepuzho pa kolola milanguluko yanji. (Mat. 17:24-26) Mu jishinda jimotu, umvwe mwina nzubo washikisha bwipuzho nangwa wakumbula byabula kufwainwa, twakonsha kwingijisha mepuzho pa kumukwasha kulanguluka pa bintu.
4. Mambo ka o twafwainwa kukwashisha mwina nzubo kulanguluka pa bintu?
4 Umvwe twakwasha mwina nzubo kulanguluka pa bintu, tulondela Mufunjishi Wayukisha, aye Yesu kabiji ne basapwishi bakwabo bafunjishanga bulongo mu myaka kitota kitanshi. Tunemeka mwina nzubo ne kumupa mushingi. (1 Pe. 3:15) Ne kyakonsha kufumamo, awo muntu wakonsha kwituswisha kubwelako jikwabo.