Ikalai Bachinchika Bino Bamutende
1 Bantu bavula bo tusapwilako baitabila kyakosa bingi mu bintu byapusenamo na bukine bwa mu Baibolo. Byo kiji kuba’mba twafwainwa kusapwila na kuchinchika, bino twafwainwa ne kwikala mu “mutende na bantu bonse,” ne kuchinuzhuka kwibazhingijisha. (Loma 12:18; Byubilo 4:29) Twakonsha kwikala byepi bachinchika kabiji pa kimye kimo kwikala bamutende kimye kyo tubena kusapwila mambo a Bufumu?
2 Ambai pa Bishinka byo Mwakonsha Kuswañana: Muntu wa mutende kechi wipachika na bakwabo ne. Kulengulula lwitabilo lwa mwina nzubo lo aitabilamo kyakosa bingi, kwakonsha kumulengela kubula kuteleka ku byambo byetu. Umvwe waamba milanguluko yaya mungi, na maana twakonsha kuletapo kishinka kyo twakonsha kuswañana nanji. Kupichila mu kwamba pa kintu kyo aitabilamo ne aye, twakonsha kufwomona milanguluko yanji kabiji ne kumuzakula muchima.
3 Umvwe twatalapotu byonkabya pa mulanguluko wa mwina nzubo waya mungi, nanchi kilumbulula amba tubena kupeezha bukine nyi? Ine. Byo tuji bamwingilo bena Kilishitu, mwingilo wetu kechi wa kukana milanguluko yonse yabula kufwainwa yo tutana ne, bino ke wa kusapwila mambo awama a Bufumu bwa Lesa. (Mat. 24:14) Mu kifulo kya kulengulula mulanguluko wabula kufwainwa waambiwa, twafwainwa kwikimona kino kwikala jishuko ja kuyuka biji mu muchima wa yeo muntu.—Mana. 16:23.
4 Munemekai Mwina Nzubo: Kuji bimye bimo byo twafwainwa kuchinchika ne kwikala bakosa pa kukana mafunjisho a bubela. Nangwa byonkabyo, byo tuji bantu bamutende, kechi tunenañana nangwa kwamba byambo bya mukeyu pa kutongola boba baitabila ne kufunjisha mafunjisho a bubela ne. Kwibika pa kifulo kya peulu kwakonsha kulengela bantu kubula kuteleka, bino kwamba mu jishinda jimwesha kwikepesha ne mushingi kushinkula michima ya bantu batemwa bukine. Kumwesha mushingi bantu bo tubena kwisamba nabo ne kunemeka lwitabilo lwabo kulengela munema wabo kutwajijila, kabiji kino kibapelela kuswa mambo etu.
5 Mutumwa Paulo waambile pa bintu byaitabijilemo boba bo asapwijilengako kabiji ne kukebesha kwibabula mambo awama mu jishinda jakonsheshe kuzakula michima yabo. (Byubilo 17:22-31) Na muchima yense waalukile kwikala “bintu byonse ku bantu bonse,” kuba’mba ‘apulushepo bamo.’ (1 Ko. 9:22) Twakonsha kuba kintutu kimo kupichila mu kwikala bamutende byo tubena kusapwila na kuchinchika mambo awama.