Nanchi Musapwila na Kuchinchika nyi?
1 Petelo ne Yoano batwajijile kusapwila mambo a Bufumu na kuchinchika nangwa kya kuba bebakwachile ne kwibapingila. (Byu. 4:17, 21, 31) Nga atweba lelo jino, kusapwila na kuchinchika kwayila muka?
2 Sapwilainga na Kuchinchika: Kyambo kiji na bwaluluzhi bumo na kyambo kya “kuchinchika” ke “kukosa.” Kino kyambo kyalulula “kubula moyo, kwikala na “bulume bwa kubula kuchina kintu ne kwikyuminatu popolo.” Ku bena Kilishitu bakine, kusapwila na kuchinchika kulumbulula kwamba kwakubula moyo ku bakwabo pa kimye kyafwainwa kusapwila mambo awama. (Byu. 4:20; 1 Pe. 3:15) Kilumbulula kuba’mba kechi tumvwa bumvu bwa kusapwila mambo awama ne. (Sala. 119:46; Loma. 1:16; 2 Timo. 1:8) Onkao mambo, kuchinchika kyo kyubilo kikebewa mu kwingila mwingilo wetu wa kusapwila mambo awama a Bufumu mu ano moba apelako. Kwitutundaika kusapwila bantu mambo awama ku mapunzha konse kobakonsha kutanwa.—Byu. 4:29; 1 Ko. 9:23.
3 Kuchinchika pa Sukulu: Nanchi moyo ye wimulengela kukankalwa kusapwila ku bakwenu bana basukulu nyi? Kya kine kimye kimo, kechi kyapela ne; kishupa bingi. Nangwa kiji byonkabyo inge mwalomba kwi Yehoba, ukemukosesha kwamba na kuchinchika ku bakwenu. (Sala. 138:3) Kuchinchika kukemukwasha kuyukanyikwa’mba mwi Bakamonyi ba kwa Yehoba ne kushinda myendeleko. Kusapwila kwenu pa sukulu kwakonsha kupulusha boba bemuteleka.—1 Timo. 4:16.
4 Kuchinchika pa Nkito: Nanchi ku nkito mwayukanyikwa’mba mwi Bakamonyi ba kwa Yehoba? Jishindatu jimo jomwakonsha kubujilamo bakwenu mambo awama ke kwibasapwila. Kuchinchika kwakonsha kwimukwasha pa kulomba lūsa lwa kwimupako moba a kuya na kutanwa ku kupwila kwa bwina Kilishitu ne kupwila kukatampe.
5 Chinchikai Kimye kyo Muji mu Lweseko: Kuchinchika kwanema bingi kimye kyo tuji mu lweseko. (1 Tesa. 2:1, 2) Kwitukwasha kukosela mu lwitabilo lwetu umvwe betupingila, kwitwendeleka nangwa kwitumanyika. (Fili. 1:27, 28) Kwakonsha kwitukwasha kwimana bakosatu popolo, umvwe betukanjikizha kuzhilulula mafunde otujimo a Lesa wetu, Yehoba. Kwitukwasha kwikala mutende na bakwetu, umvwe betuzhingijisha.—Loma 12:18.
6 Nangwatu tuji mu makatazho a mutundu ka, twayai tukoselemo mu kusapwila mambo awama na kuchinchika.—Efi. 6:18-20.