Twajijilai Kwambanga Mambo a Lesa na Kuchinchika
1 Byo tuji bamwingilo ba bwina Kilishitu, twayuka’mba kechi bonse bakaswa inge twibasapwila ne. (Mat. 10:14) Nangwa byonkabyo, kechi tuswisha bantu babula kukeba kuteleka kwitulengela kubula kuyukanyikisha mambo awama ne. (Mana. 29:25) Ki ka kitukwasha kutwajijila kwamba mambo a Lesa na kuchinchika?
2 Mutumwa Paulo wamunemekele mwingilo ‘na mambo a kuwama kwine kwa maana a kuyuka Kilishitu Yesu.’ Kino kya mulengejile kwambanga na “kuyukisha kwa kine kukatampe.” (Fili. 3:8; 1 Tesa. 1:5) Nangwa kya kuba bamo bamonanga mambo o asapwilanga’mba atutu, wayukile kuba’mba “mambo bo bulume bwa Lesa buleta lupulukilo ku bonse baitabila.” (Loma 1:16) Onkao mambo, nangwatu kimye kyo atalañenenga na makatazho watwajijile ‘kwamba mambo mwi Yehoba na kuchinchika.’—Byubilo 14:1-7; 20:18-21, 24.
3 Nsulo ya Bulume Bwetu: Kechi bwajinga bulume bwanji mwine Paulo bwamulengejile kwambanga na kuchinchika ne. Kwamba pe aye mwine ne Silasa, Paulo wanembele’mba: “Pakuba nangwa twamanamine ne kubiwa byatamisha bya bumvu ku Filipai, . . . twachinchikile mwi Lesa wetu mu kwimwambila mambo awama a Lesa monka mu bulwi bwavula.” (1 Tesa. 2:2; Byubilo 16:12, 37) Kabiji kimye kyo ajinga mu kaleya mu Loma, Paulo wabujile bakwabo ku mulombelelangako kuba’mba atwajijile kuyukisha mambo awama ‘na kuchinchika, byonka byo afwainwa kwamba.’ (Efi. 6:18-20) Kupichila mu kuketekela mwi Lesa, kukila kwiketekela aye mwine, Paulo watwajijile kwamba mambo a Lesa na kuchinchika.—2 Ko. 4:7; Fili. 4:13.
4 Byo byo kiji ne lelo jino. Mulongo ye kyakatazhanga kwiyukisha aye mwine ku bakwabo mo baingijilanga amba Kamonyi wa kwa Yehoba kabiji ne kwibasapwila, walombejilepo pa kino kabiji ne kutendeka kusapwila. Umo mo baingijilanga pa kutendeka wakainenga kwisamba nanji, bino kimye kyo aambile pa mambo a luketekelo lwa lusanguko, lufunjisho lwa Baibolo lwatendekele. Kufumatu pa kyokyo kimye, mulongo waingijishenga kimye kiji kyonse kusapwila. Ku mpunzha ikwabo ko aingijilenga, wakwashishe bantu 34 mo baingijilanga kubatizwa mu myakatu 14. Twakonsha kuketekela kuba’mba Yehoba uketukosesha netuwa ‘kutwajijila kwambanga mambo a Lesa na kuchinchika.’—Byubilo 4:29.