Nanchi Mwakonsha Kwingilako mu Mwingilo pa Juba ja pa Mulungu Nyi?
1. Twakonsha kufunjilako ka ku byaubile Paulo ne balunda nanji mu muzhi wa Filipai?
1 Bayudea bavula mu muzhi wa Filipai bakokolokanga pa juba ja Sabado. Pa lwendo lwabo lumo lwa bumishonale, Paulo ne balunda nanji bafwakeshe uno muzhi. Kafwako nangwa umo wakonsheshe kwibapamo mambo umvwe kya kuba bakokolokele pa joja juba kwa kubula kuya mu mwingilo. Nangwa byonkabyo, bayukile’mba Bayudea babuñene pangye ya muzhi na kulomba, onkao mambo, baingijishe kino kimye kwibasapwila. Paulo ne balunda nanji basangalele bingi kimye Lidiya ne ba mu nzubo yanji kyo baumvwine Mambo a Lesa ne kubatizhiwa! (Byu. 16:13-15) Byo kiji kuba’mba bantu bavula lelo jino bakokoloka pa Mulungu, mambo ka a kubujila kwingijisha jino juba kuya na kwibasapwila?
2. Makatazho ka bantu ba Yehoba o bashinda pa kuba’mba basapwilenga pa juba ja pa Mulungu kwa kubula kwibakatazha?
2 Lukatazho Lwaishileko na Mambo a Kusapwila pa juba ja pa Mulungu: Mu 1927, bantu ba Yehoba batundaikilwe kwingilako mu mwingilo pa juba ja pa Mulungu. Kino kyalengejile kwibamanyika ku bantu. Mu kyalo kya United States, bavula bebatayile mu kaleya na mambo a kulala mizhilo ya Sabado ya kukokoloka pa Mulungu, kuvulañanya mutende ne kupotesha mabuku ne bikwabotu kwa kubula nkalata kufuma ku kafulumende. Bino, bantu ba Yehoba kechi balekele kusapwila ne. Mu myaka ya mu ma 1930, banengezhenga “mabumba a basapwishi,” kufuma mu bipwilo bya pepi kuba’mba basambakanenga ne kuya na kusapwila mu nyaunda. Mu kimye basapwishi kyo bebakwatanga ne kwibataya mu kaleya, bakwabo batwajijilanga kya kuba kafulumende wakankalwanga kulekesha mwingilo wabo. Nanchi kine tusanchila bano balongo pa kwipana kwabo ko baubile kubena kwitulengela kusapwila pa juba ja pa Mulungu kwa kubula kwitukatazha nyi?
3. Ki ka kilengela juba ja pa mulungu kwikala jawama kusapwila?
3 Juba Jawama Kusapwila: Bantu bavula bekala pa mazubo pa juba ja pa Mulungu. Javula bekalatu na kukokoloka. Pa jino juba, bantu bamo baya ku chechi bakonsha kutemwa kwisamba nabo pe Lesa. Umvwe tupwila pa Mulungu, ko kuba’mba tuvwajila jimo bivwalo bya kuya nabyo mu mwingilo, onkao mambo, kyawama kwingilako mu mwingilo wa mu bujimi saka mukyangye kupwila nangwa panyuma ya kupwila. Inge kyakonsheka, nengezhaipo tukajo twa kusenda.
4. Lusekelo ka lo twakonsha kwikala nalo umvwe twaingilako mu mwingilo pa juba ja pa Mulungu?
4 Umvwe twaingilako mu mwingilo pa juba ja pa Mulungu, kyo kimotu tukekala na kimye kya kukokolokelamo. Kabiji tukekala balusekelo pa kukokoloka na mambo a kuba’mba twaingilako mu mwingilo wazhila. (Mana 19:23) Twakonsha ne kusangalala bingi umvwe twatana muntu uji nobe Lidiya!