Tumali twa Muwayawaya Tubiji Twakepesha

Jishinda jimo ja kutundaikilamo Bufumu ke kupichila mu kubingulako mubingu wakukwasha mwingilo wa ntanda yonse. Ibyepi inge kechi tuji na mali ne?

Kimye kimo Yesu wamwene mwanamukazhi wafwilwa kasa abingulako mu kakilambwilo kajinga mu nzubo ya Lesa tumali twa muwayawaya tubiji twakepesha. Kutemwa Yehoba kwamulengejile ‘kutayamo mali anji onse o ajinga nao.’ (Mako 12:41-44) Yesu waambile kuba’mba mubingu wanji wanemene bingi ku meso a Lesa. Kyo kimotu ne bena Kilishitu batanshi, bamonanga kubingula mibingu kuba’mba kwanema bingi. Bena Kilishitu banonshi ne bayanji babingwilenga kwesakana na byonka byo bajinga nabyo. Mutumwa Paulo waambile pa kyakumwenako kya bena Makedonya kuba’mba ‘nangwa kya kuba bajinga bayanji . . . betusashijile na mukoyo pa mambo a kupana bya bupe.’—2 Ko. 8:1-4.

Onkao mambo, umvwe ke tubinguleko “tumali twa muwayawaya tubiji twakepesha” twafwainwa kuyuka kuba’mba umvwe betumvwanga pamo ekala ke mali avula. Kupana kwa kufuma panshi ya muchima kukasangajika Shetu wa mwiulu mpanyi, mambo “Lesa watemwa muntu upana na lusekelo.”—2 Ko. 9:7.