Ki ka Kimulengela “Kwikala na Lusekelo”?
1. Ki ka kimulengela kwikala na lusekelo pa kupwa kwa ñondo?
1 Umvwe ñondo wapwa kabiji bemwambila kupana sawakya wa mwingilo, ki ka kimulengela “kwikala na lusekelo”? (Nga. 6:4) Umvwe twi bapainiya beikajila bapana maola 130 nangwa twi basapwishi bo baswisha kupana maminiti 15, atweba bonse twafwainwa kusekela pa kwingilako mwingilo wa Yehoba na muchima yense.—Sala. 100:2.
2. Mambo ka o twafwainwa kwibikako kwingila mwingilo wa Yehoba?
2 Nkambo Mfumu wa bintu byonse aye Yehoba utambwila byonse byawamisha byo tumupa. (Mala. 1:6) Mambo akuba twa mutemwa, twipana kuba kyaswa muchima wanji. Pa kupwa ñondo, umvwe twaingijile papelela bulume bwetu kupana kimye ne ngovu kwingila mwingilo wa Yehoba, kwakubula nangwa kuzhinaukatu ne tukekala balusekelo. (Mana 3:9) Nangwa byonkabyo, umvwe jiwi jetu ja mu muchima kejituzhachishe, twakonsha kumona byo twakonsha kuwamishako ñingijilo yetu.—Loma 2:15.
3. Mambo ka o kyatamina kwiesakanya byo twingila na bingila bakwetu?
3 “Kechi mu Bintu bya Bakwabo Ne”: Kechi kyawama kwesakanya byo twingila na bingila bakwetu ne. Kimye kimo bintu byaluka kabiji bulume bwa kwingila nabo bwa enda kupusana pusana. Kwiesakanya byo twingila na bingila bakwetu kwakonsha kwitulengela kutendeka kwitota nangwa kwilengulula. (Nga. 5:26; 6:4) Yesu kechi waesakanyanga byo aingilanga na bakwabo ne. Wibasanchilanga pa kwingila mwingilo kwesakana na papelejile bulume bwabo.—Mako 14:6-9.
4. Twakonsha kufunjilako ka ku kishimpi kya kwa Yesu kya matalenta?
4 Mu kishimpi kyanji Yesu kya matalenta, bamingilo batambwile matalenta “kwesakana na bulume bwabo.” (Mat. 25:15) Kimye nkambo yabo kyo abwelele na kumona mingilo yo baingijile, baingijile kwesakana na papelejile bulume bwabo wibasanchijile ne kusekela pamo ne nkambo yabo. (Mat. 25:21, 23) Umvwe twibikako kusapwila mambo awama a bufumu, tuketabilwa kwi aye ne kwikala ba lusekelo!